JIHUSUA 4
4
Lümrhih Lungbo Khimkhi
1Küyimki mihtsürü athrünkhi Jordan hokhea, Atungpuhnü Jihusua ki tha, 2“ Trük aban chingnü khülang khülang mihtsürü 12 mokhitang, 3tüsho Jordan phulung ching amükeamrü zhippung chingnü lung 12 shuh-a handarübahle, nüsa khihre binkheampü lakhi dangpung ching thiyukhüm jih-a khimshang.”
4Jumonü Israel ching mihtsürü 12 mokhitkhi ju Jihusuanü ji 5tüsho apinü arü ki tha, “Atungpuh nüsa Thrünpuh sangdan müngüh Jordan phulung yüang, tüsho Israel trük abande nüsa dubuh kheak lung khülang khülang shuhkih-a hanang. 6Ha lungbo hode Atungpuhnü arhimokhi mihtsürübo ki lümkhitloshihbah. Arübe kim ching nüsa tsührübonü ha lungbo amütsan keokhisho, 7Atungpuh tangzüng sangdan ayung hanhochoki, Jordan keto mubukde akamkheah de arü ki thaang. Ha ching tümü dünjikheanü Thrünpuhnü mihtsürübo ki lünnü ha lungbo hode alümkhitshihbah.”
8Jihusuanü thiyukhüm jihkhi nangde Israelrünü rhimo. Atungpuhnü Jihusua ki thakhi nangde, arünü Israel trük abande lung 12 Jordan phulung chingnü lubahle arü binkheampung handarü khim. 9Tüsho Jihusuanü she tangzüng sangdan hanrü amükeamrü zhippung Jordan phulung ching lung 12 khim, jurü khihni khiungde zhiplah. 10Thrünpuhnü Jihusua ki thiyukhüm jihkhi alala mihtsürübonü mürhimokhamchoki khiungde sangdan shuhrü amükeamrübonü Jordan phulung ching zhipde aleang. Haju ha Mosanü thiyukhüm jihkhi yande rhimo, tüsho mihtsürübonü niokheamde ayung ju ho.
11Küyimki arübo dükihlim peang khiungkhea, amükeamrübonü A TUN GPU H tangzüng sangdan hanbah mihtsürübo müngüh yü. 12Mosanü thiyukhüm jihkhi yande, Reuben, Gad tüsho Manase chamkhüh trükbonü keochihpü thsühnuk thsakhambahle Israelrü müngüh yü. 13Mihtsürübo 40,000 ngüm keochihpü thsüde Atungpuh müngüh Jirikho dükhün ching yü. 14Ju nimung Atungpuhnü arhimokhi hode Israel mihtsürü miki Jihusua ato kamshih. Mosa kheak wüntre jihkhi nangde api rhangdung amuyung arünü api kheak wüntre jih.
15 Atungpuhnü Jihusua ki tha, 16“ Amükeamrübo tangzüng sangdan hanbah Jordan chingnü akhiukshihpü thiyukhüm jihang.” 17Jihusuanü thiyukhüm jih, “ Jordan chingnü akhiukang.” 18Küyimki Atungpuh tangzüng sangdan hanrü amükeamrübo Jordan phulungnü akhiuk tüsho amükeamrübo jingnü alo akung qiukhea, Jordan ke ju abukpung alodarü tüsho püpüki nangde ayung mide buk.
19Mihtsürübo akhuhbe khinu thürü nipü Jordan chingnü akhiuk tüsho Jirikho aniakhiuklim, Gilgal ching binkheampü khimyam thsü. 20Ju ching Jihusuanü Jordan ching yo lung 12 handarünü khim. 21Apinü Israelrübo ki tha, “ Arübe kim ching, nüsa tsührübonü ha lungbo amütsan keokhisho, 22Israelrü Jordan hode akung lo ching yükhi arü ki mükheahshang. 23Amürüm keto ngahshihkhi nangde, nüsa muhochoki khiungde Jordan keto she Atungpuh nüsa Thrünpuhnü ngahshihdo de arü ki nüsanü thaang. 24Ha hode alomiküp ching mihbüm abannü Atungpuh wu-sühmüh ato mükheahbah, tüsho Atungpuh nüsa Thrünpuh nüsanü lünnü wüntre jihbah.”
Currently Selected:
JIHUSUA 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
