JONA 4
4
Jona Bukakhiukkhi tüsho Thrünpuh Mihmüthsüm
1Tüshe ha Jona ki khide masühbe lakheah, tüsho api bukakhiukde kam. 2Apinü Atungpuh ki tamkhüntamnü tüsho tha, “ O Atungpuh ! Ha inü I lomi ching lachoki thakhi yung de? Hamonü inü atankih ching Tarshish lim tsokheah; tümüde nü a amuzho tüsho mihmüthsüm Thrünpuh, arünnü bukakhiukchoh, amuzhodakkhi ching suhdahlah, tüsho thsümüchipü chingnü lümalopü thsakhamlah de inü mükheahlah. 3Tüsho kheakü, O Atungpuh , muzhobah I kheaknü I rhangdung luang, tümüde I thsungkheak a alapü kheaknü ashekhi atsübe ah.” 4Tüshe Atungpuhnü tha, “ Nü bukakhiukpü alim la de?” 5Judüki Jona nü kiuto chingnü wukhiuk tüsho kiuto aniakhiuklim bin, tüsho anihbuh thsungkheak ju ching yünshim khülang thsü. Kiuto ju tümü kambanü kheahde aleangpü, apinü ju alamme khüp bin.
6 Atungpuh Thrünpuhnü sangrung khülang arüshih, tüsho api phü mushukhi chingnü khümkhitpü thsüde, api ku kumung alamdoshihpü Jona kumung zojih; jumonü sangrung dünkheaknü Jona khide asühde alakheah. 7Tüshe küyimki ashidopü yapsu kamkhea, Thrünpuhnü ari arüshihbah sangrung müjakabahshih, junangde ju yiuhabah. 8Küyimki ani akhiukkhea, Thrünpuhnü aniakhiuklim pung atak khülang thsakham, tüsho aninü Jona ku kheak thsahkih, junangde Jona lungabah tüsho apinü ashepü kün. Apinü tha, “ I alapü kheaknü ashekhi lang atsübe ah.”
9Tüshe Thrünpuhnü Jona ki tha, “Sangrung dünkheaknü nü bukakhiukpü alim la de?” Tüsho apinü alo, “Am, ashepü bukakhiukchoh.” 10Judüki Atungpuhnü tha, “ Nünü, ha thsungkheak mürhimokhi tüsho mutoshihkhi sangrung dünkheak lümrhihchoh; ha tsüngrekhüh chingnü arü tüsho tsüngrekhüh chingnü dükheakabah. 11Dale küdükhüh inü ju kiuto ato Nineve kheak amuzho mülapü. Ju ching amülim mülakhi mihtsürübo 120,000, tüsho shiwühbo she ahihdo lah!”
Currently Selected:
JONA 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
