JONA 1
1
Jonanü Atungpuh ki Mihyumanikhi
1Kheakü Amittai tsührü Jona kilim Atungpuh yu arü, 2“ Kiuto ato Nineve lim yüang, tüsho ju azhihde zhiang; tümütüsho arü mihbukmuyukbo I miki akihdo.” 3Tüshe Jonanü Atungpuh mikinü Tarshish lim tsopü tsahmusu. Apinü Joppa ching yüki tüsho Tarshish lim yükhi sangkung khülang ngü; jumonü apinü hantsah-trün ju jih tüsho Atungpuh mikinü tsokhide Tarshish lim yüpü sangkung kheak yükih.
4Tüshe Atungpuhnü apung ato khülang keto kheak arüshih, tüsho sangkung ju athsümünimpü thsüde chinthrüm ato keto kheak arü. 5Judüki sangkung berübo müyinnimde kam, tüsho mihbüm abannü nihbuh thrünpuh ki zhi. Arünü sangkung ching lakhi kukrukbo arü thsungkheaknü hiphipde akamshihpü keto ching bah. Judüchoki, Jona a sangkung damkhi kheak yüzahnü yapsherakraka lakheah. 6Wühkenobuhnü arü tüsho api ki tha, “Tümü thsüde nü a yapshea la le? Asürang, nü thrünpuh ki jiang! Khükia thrünpuhnü isa thsungkheak lümrhihbah, junangde isa müdükheak.”
7Sangkung berübonü khülangnü khülang ki thaachih, “Arang, isanü azan thsanü, junangde she dünkheaknü ha thsümütsü isa kheak arüa lanü isanü amükheahbah.” Jumonü arünü azan thsü, tüsho azan ju Jona kheak akhiuk. 8Judüki arünü api ki tha, “Tümü thsükhi ha thsümütsü isa kheak arükheanü isa ki thaang? Nü tümü rhimorü a? Nü küchingnü arükhea? Nü lomi tümü a? Tüsho nü tümü mihtsürü a?” 9Apinü alo, “ I Ibrirü ah. Inü yinmi Thrünpuh, keto tüsho akung lomi thrünrü Atungpuh kingaünchoh.” 10Judüki mihtsürübonü alü trede kam, tüsho api ki tha, “Tümü thsükhi nünü ha rhimokhea!” Tümüde api ju Atungpuh mikinü tsokhichoh de mihtsürübonü mükheah, tümütüsho apinü arü ki thaa lakheah.
11Judüki arünü api ki tha, “ Isa thsungkheaknü keto keamlopü thsüde isanü nü kheak tümü rhimoba?” Tümüde keto ju alübe alübe müküpde alakheah. 12Apinü arü ki tha, “ I shuhkihang tüsho keto ching jipyukang; jushunü nüsa thsungkheak keto keamlobah; tümüde I dünkheaknü ha chinthrüm ato nüsa kheak arüdo de inü mükheahlah.” 13Judüalalashe mihtsürübonü sangkung ju alo lim belodarüpü müküpde be, tüshe arünü mukuk, tümüde keto ju arü azhihde alübe alübe tode kam. 14Judüki arünü Atungpuh ki zhi, “ O Atungpuh , muzhobah ha mihtsürü rhangdung dünkheak isa düsheshih. Amülim mülarü mihtsürü laksahkhi thsungkheak isa ki mah dükhap, tümüde O Atungpuh , nünü amulongkhi nangde nünü rhimodo.” 15Jumonü arünü Jona shuhkih tüsho keto ching api jipyuk; tüsho keto müküpkhi ju keamlo. 16Judüki mihtsürübonü alü Atungpuh trede kam, tüsho arünü Atungpuh kilim laksah-a kingaünkhi jih tüsho thiyuchihchimbo thsü.
17Tüshe Atungpuhnü Jona muyushihpü thüngüh ato khülang thsakham; tüsho Jona ju thüngüh buk ching nimung mahsam tüsho tsüngre mahsam lakheah.
Currently Selected:
JONA 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
