JOHAN 2
2
Kana ching Arhangrü Thünio
1Nimung mahsampü ching Galilee yo Kana kiuto ching arhangrü thünio lakheah, tüsho Jisu abe ju ching lakheah. 2Kheakü Jisu tüsho api jingyanrübo chido arhangrü thünio ching ju jiyuk. 3Tüsho küyimki yukhu banabahkhea, Jisu abenü api ki tha, “Arü yukhu müla.” 4Jisunü alibe ki tha, “Aliberü, nünü I ki tümü thsüpü? I kim marüyi.” 5Abenü yamlarübo ki tha, “Apinü nüsa ki tümüpürü thachonü, ju rhimoang.”
6Ju ching Jihudarünü arüngako müsühmüra thsungkheak ahorikhi qiumuk 20 le 30 yüzahkhi lung pangjiphüh 6 lakheah. 7Jisunü yamlarübo ki tha, “Pangjiphühbo ching ke mide yukang.” Tüsho arünü mikhiukde yuk. 8Tüsho apinü arü ki tha, “Kheakü ke anükhüh khipkhitang, tüsho thünio putungpuh ki lude yüang.” Tüsho arünü ju lu. 9Küyimki thünio putungpuhnü ke yungakheahkhea, ju yukhu kama lakheah, tüsho küchingnü arükheanü mümükheah (tüshe ke khiprü yamlarübonü a mükheahde alakheah); jumonü apinü yamkhün-kambuh ju ji. 10Tüsho apinü anihbuh ki tha, “Mihtsürü abannü akhuhde yukhu akebe ahiuhchoh, tüsho küyimki hanrübo müshangbanü amükebe ahiuhchoh; tüshe nüsa a kheakü khiungde yukhu akebe zoa lah.”
11Ha akhuhbe khinthiyinbe Jisunü Galilee ching lakhi Kana ching rhimo, tüsho api müretah akhiuka huh; tüsho ajingyanrübonü api kheak kin.
12 #
Mt 4.13
Ju dunglim api le abe, keoniorübo tüsho api jingyanrübonü Kapernaum lim yüki, tüsho arünü ju ching nimung anükhüh mung.
Jisunü Arüngyam Müsühkhi
(Mt 21.12-13; Mk 11.15-17; Lk 19.45-46)
13Kheakü Jihudarü phunghothünio thüninde alakheah, tüsho Jisunü Jirusalem lim wutu. 14Tüsho apinü arüngyam ching moshipungbo le namfimihnu tüsho müthrithrümpübo tüsho sho müthriachihrübo shothsümolode ngü. 15Apinü arhapbe liubo thsübah namfimihnubo le moshipungbo bede arüngyam chingnü arü alala yankhitabah, tüsho apinü sho müthriachihrü shonakbo hiumüzütjihde dükhüm lahyuka bahjih. 16Tüsho apinü müthrithrümpü yinrübo ki tha, “Harü lubah tsoang! I Buh yam ju yinzüyindo yam dükamshih!” 17Judüki api jingyanrübonü ha thrüta lakhi lümkhit, “Nü yam mürheangkhinü I aniuabahdo.” 18Jumonü Jihudarübonü api ki tha, “Nünü ha rhimopü alim lah de ahuhpü isa ki khinthiyinbe tümü rhimoba?” 19#Mt 26.61; 27.40; Mk 14.58; 15.29Jisunü arü ki alo, “Ha arüngyam khapkheamang tüsho inü ju nimung mahsam chingnü athsülobah.” 20Judüki Jihudarübonü tha, “Ha arüngyam thsüpü kam yirükheak thuruk ludo, tüsho nünü ju nimung mahsam chingnü athsülopü?” 21Tüshe apinü api pang arüngyam dünkheak thade alakheah. 22Jumonü küyimki api ashe chingnü arhang kamlokheanü apinü arü ki thakhi ajingyanrübonü lümkhit; tüsho arünü amüsühyu le Jisunü athakhi yu kin.
Jisunü Mihtsürü Yakli Mükheahkhi
23Küyimki api phungho-thünio lachoki Jirusalem ching lakhea, apinü khinthiyinbe rhimokhi ngüchoki ahihkhühnü api mung ching kin. 24Tüshe Jisunü arü kheak akin müla, tümüde apinü mihtsürü alala mükheah, 25tüsho khürünü mihtsürü dünkheak thiyumütsan thsüpü yihnüpü müla, tümüde apinü mihtsürü kheak lakhi alala mükheah.
Currently Selected:
JOHAN 2: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.