JEREMIA 48
48
Moab dünkheak Thiyusheak
1Moab dünkheak Wuto A TU N GPU H , Israel Thrünpuhnü ha thachoh:
Nebo thsungkheak aha, ha thsümünima lah!
Kiriathaim achih ngüshihdo, ha ludo;
chipi achih ngüdo tüsho keamdo;
2Moab shikhi kheaküa müla.
Heshbon ching arünü anihbe azhihde amütsü lümkhi thsüdo:
“Arang, isanü anihbe trükshih lakhi chingnü dükheakshihanü!”
O Madmen kiuto, nü she zhikrangkhündo akambah;
nukshangnü nü yande müshambah.
3Aniang! Horonaim ching zhikhi khülang,
azhikkhi tüsho thsümünimkhi ato!
4Moab thsümünima lah!
Anihbe tsührübonü zhichoh!
5Tümüde Luhith muduh kheak arübo tripdüsükde wutuchoh;
tümüde Horonaim koyu kheak arünü thsünüde azhikhi sodo.
6Shanang! Nüsa khümkhitang!
Loshelo ching mütüm khora nangde laang!
7Tümütüsho nünü nü sühmüh tüsho nü lakhitbo kheak kindo,
nü she bede atsobah;
nü thrünpuh Kemosh ramtso ching,
api yo amükeamrübo tüsho yakzanshuhrübo bede dükde ayübah.
8Kiutobo aban kheak athsümünimrü arübah,
tüsho kiuto küpü she mutsokhit;
jindükhün dükheakbah tüsho adükhün thsümünimbah,
I Atungpuhnü asukdo.
9Moab kilim ghibo jihang, tümüde phinde atsobah,
anihbe kiutobo zhikrangkhündo she mülade alabah.
10Shepünü Atungpuh rhimo ching sühdukchonü muthrumünean; tüsho shepünü thiyih bukpü chingnü nukshang tuklochonü muthrumünean.
11Moab a api athunuchokinü zuzu lakheah, yukhu nangde azhihzhih kingmukhungdo; api a phüh khülang chingnü khülang mudungakeang, yungsho api a ramtso ching müyü; jumonü api kekhi judü lang lah tüsho api rhümthüneakhi mümüthri.
12Jumonü Atungpuhnü thachoh, api dungkhita bahshihpü, tüsho api phüh yihakeangpü tüsho api phüh adütre kamde ayihnakpü inü mihtsürü thiyipü nimung tsükjide arüchoh. 13Judüki Moab ju Israel yamkhünnü Bethel kheak kinkhi hode achih ngükhi nangde Kemosh dünkheaknü achih ngübah.
14“ Isa athrungrübo tüsho amüzhak thirithsürübo ah”
de küde thsah nüsanü thakhukpü?
15Moab tüsho api kiutobo thsümünimrü atudo,
tüsho api yo amokhitkhi athrününgtsüngbo alaksahpü ching yüdo,
kiulongthsüpuhnü thachoh, shepü mung Wuto Atungpuh la.
16Moab thsümütsü khah ki lah tüsho thsümüchipü niokheamde khiungchoh.
17Api kurungkheak tüzhoang, nüsa api yamhingrü alala,
tüsho sherünü api mung mükheahla;
thaang, “ Küde Wuto tso zhakde, müretahkhi tso!”
18O Dibon ching larübo,
nüsa müretahkhi chingnü akiang tüsho asungthulung lo kheak binang,
tümüde Moab thsümünimrü nüsa azhihde atubah tüsho nüsa chipi ayünkhi kiutobo thsümünimbah.
19Nüsa Aroer ching larübo!
Limro ki zhipang tüsho kheahang,
alihde atsorü aliberü ki keoang, “Tümü thsüa la?”
20Moab achih ngüshihdo, tümüde ha thsümünimdo;
tüzhoang tüsho tripang!
Moab thsümünima yaplah de Arnon ayung yeande mükheahshang.
21Mahkhapkhi adükhün lo kheak arüdo, Holon kheak, tüsho Jaza, Mephaath, 22tüsho Dibon, Nebo, Beth-diblathaim, 23tüsho Kiriathaim, Beth-gamul, Beth-meon, 24tüsho Kerioth, Bozra, tüsho Moab lomi kiutobo alala ching, limshu tüsho aphüni. 25Moab juh yihshakdo, tüsho api bin zhakdo, Atungpuhnü thachoh.
26Moab müshangshang, tümütüsho apinü Atungpuh azhihde müretahdo; anihbuhnü mülümkhi ching Moab awuhshang; api she münedung kambah. 27Api mahühmüdama lalashe Israel ju nü thsungkheaknü münedung lakheah; tüshe nünü api dünkheak asukchoki nü ku lukchoh!
28O Moab ching larübo! Kiutobo bahang, tüsho lungto ching laang, lungku münküp kheak asap shukhi müthrithrümpü nangde thsang. 29Isanü Moab kükheangkhi–api khide kükheanglah–changde alümkhi, lülüshishikhi tüsho api bukakhiukkhi tüsho api mulong ching juno-lümlung lakhi sodo. 30Inü api bukakhiukkhi mükheahlah, Atungpuhnü thachoh; api kükheangkhi amülim, api rhimobo amülim. 31Jumonü inü Moab thsungkheak mulong rozhakde tripchoh, inü Moab alala thsungkheak tripchoh; Kir-heres mihtsürü thsungkheak inü mitripchoh. 32O Sibma kurungaso! Inü Jazer kheaknü alü nü thsungkheak tripchoh. Nü khahbonü keto holah, Jazer khiunglah; nü yo muzhu sangaso tüsho kurungaso yimlukhi kheak athsümünimrü yükihdo. 33Asühara tüsho asühachihkhi Moab amüdang lomi chingnü lude tsodo; inü yukhu nitpung chingnü yukhu tuklodo; shenü jurübo asühachihde münit; azhikhi ju asühachihde azhikhi yung.
34Heshbon tüsho Elealenü tripchoh; arü düsheak Jahaz khiungde, Zoar chingnü Horonaim tüsho Eglath-shelishiya khiungde alanchoh. Tümüde Nimrim kebo she zhikabahdo. 35Atungpuhnü thachoh, Moab ching sherünü achang dangpung ching laksah-a kingaüncho tüsho arü thrünpuhbo kilim taka kingaünchonü inü akheamshihbah. 36Jumonü khungpi khungkhi nangde I mulongnü ashechoh, tüsho khungpi nangde Kir-heres mihtsürü thsungkheak I mulongnü ashechoh; tümüde arü lakhit ngükhi dükheakdo.
37Tümüde mihbüm aban ku hüta lah tüsho mükhühnam nipa lah; alala khahbo kheak atsütkhibo lah, tüsho chim kheak shungliukhim lah. 38Moab yam-münbo alala kheak tüsho wungdo ching tümü müla tüshe atüzhokhi lah; tümüde shenü mulunekhi phüh nangde inü Moab yihrüpdo, Atungpuhnü thachoh. 39Ha küde thsah yihrüpa la! Künangde arünü mulong rozhakcho! Künangde Moabnü achihde adüthsün rholokhea! Jumonü Moab a api yamhingrü alala ki münedung tüsho atrebe kamdo.
40Tümüde Atungpuhnü ha thachoh: Kheahang, api müleang nangde phinkhibah, tüsho Moab azhihde aghidükeangbo chutreakbah; 41Kerioth kiutobo ju ayanbah tüsho chipi ayünkhibo thsümünimbah. Ju nimung Moab thirithsürübo mulong ju aliberü thsünükhi nangde alabah. 42Trükshih khülang lakhi chingnü Moab thsümünimbah, tümütüsho apinü Atungpuh azhihde wusudo. 43Atrebe alokhün, tüsho azheang nü müngüh lah, O Moab ching larübo! Atungpuhnü thachoh. 44Atrebe chingnü atsorü abannü alokhün ching keamyukbah, tüsho alokhün chingnü akünkhitrü abannü azheang ching phuhbah. Tümüde harübo inü Moab kheak arü thsümüchipü kam ching handarübah, Atungpuhnü thachoh. 45Heshbon alamme khüp tsotsahrümtsahrübo keaka tukloa lah; tümüde Heshbon chingnü mo khülang, Sihon yam chingnü motru khülang akhiukbah; hanü Moab kingkang, alanaji mihtsürü thangphülang aniubah. 46Nü are O Moab! Kemosh mihtsürü dükheakdo, tümüde nü tsührübo tüsho nü tsührübebo ramde tsodo. 47Judüalalashe inü hashu nimungbo ching Moab kuhi jihlobah, Atungpuhnü thachoh. Ha khiungde Moab kheak mahkhap lah.
Currently Selected:
JEREMIA 48: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
