JEREMIA 28
28
Arükchih Wukihbuh Hanania
1Ju kam ching, Juda kiulongthsüpuh Zedekia kiulongthsü atankihlim peang, kam phüyi khinu phüngüpü ching, Gibeon chingnü Azzur tsührü wukihbuh Hanania nü Atungpuh yam ching amükeamrübo tüsho mihtsürü alala mikinü I ki tha, 2“ Wuto Atungpuh , Israel Thrünpuhnü ha thachoh: Inü Babilon kiulongthsüpuh sangkaplak yihshakdo. 3Kam mahne dükeaknü Babilon kiulongthsüpuh Nebukednezarnü ha dangpung chingnü Babilon ching lude ayükhi Atungpuh yam ching yo phühlungbo alala ha dangpung ching hanlodarübah. 4Inü Jehoiakim tsührü Juda kiulongthsüpuh Jehoiakin she tüsho Juda chingnü Babilon ching ramtso yürü alala belodarübah, Atungpuhnü thachoh, tümüde inü Babilon kiulongthsüpuh sangkaplak yihshakdo.”
5Judüki wukihbuh Jeremianü amükeamrübo tüsho Atungpuh yam ching zhiprü mihtsürü alala mikinü wukihbuh Hanania ki asuk; 6tüsho wukihbuh Jeremianü tha, “Amen! Atungpuhnü jude thsüshang; Atungpuhnü nünü müchitkhi yubo dünjishang shi, tüsho Atungpuh yam ching yo phühlungbo tüsho ramtsorü alala Babilon chingnü ha dangpung belode arüshang shi. 7Tüshe nünü sode tüsho mihtsürü alalanü sode inü asukkhi yu kheakü aniang. 8Jipü kim chingnü wukihrübonü I tüsho nü müngüh, lomi ahihdo tüsho kiulongthsü atobo azhihde thirithsü, khümzung tüsho arüm-tukthsü müchit. 9Wukihrü shepünü mungtsü müchitbah, wukihbuh yu dünjibanü, Atungpuhnü wukihbuh dükde thiyia lah de mükheahbah.”
10Judüki wukihbuh Hananianü wukihbuh Jeremia hung kheaknü sangkaplak lubahle yihshak. 11Tüsho Hananianü mihtsürü alala mikinü asuk, “Atungpuhnü ha thachoh: Hanangde inü kam mahne dükeaknü trükshih alala hung kheaknü Babilon kiulongthsüpuh Nebukednezar sangkaplak yihshakbah.” Tüsho wukihbuh Jeremia nü nihbuh limro ching yü.
12Wukihbuh Hananianü wukihbuh Jeremia hung kheaknü sangkaplak yihshakbah anükhüh dunglim, Atungpuh yu Jeremia kilim arü: 13Yüang, Hanania ki thaang, Atungpuhnü ha thachoh: Nünü sangkaplak yihshakdo tüsho ju müthripü yinchikaplak thsüdo! 14Tümüde Wuto Atungpuh , Israel Thrünpuhnü ha thachoh: Inü trükshih alala hung kheak yinchikaplak yihkihjihdo, junangde Nebukednezar tankihbah, tüsho arünü dükde api tankihbah; inü api kilim mütüm shiwühbo she jihdo. 15Tüsho wukihbuh Jeremianü wukihbuh Hanania ki tha, “Aniang, Hanania, Atungpuhnü nü müthiyi, tüsho nünü ha mihtsürübo akeangyu ching kinshihchoh. 16Jumonü Atungpuhnü ha thachoh: Inü nü alomi kheaknü yihkhita bahpü thsüchoh. Ha kam ching nü ashebah, tümütüsho nünü Atungpuh azhihde asukdo.”
17Ju kam, khinu thünepü ching, wukihbuh Hanania sheabah.
Currently Selected:
JEREMIA 28: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
