ISAIA 60

Arübe Jirusalem Müretahkhi

1Asürang, yinshang; tümüde nü yo ayin arüdo,

tüsho Atungpuh müretahkhi nü kheak asürüdo.

2Kheahang, amitingnü alomi lüpdobah,

tüsho kheahde amitingkhinü mihtsürübo yihdobah;

tüshe Atungpuh nü kheak asürübah,

tüshe api müretahkhi nü kheak labah.

3Trükshihbonü nü yo ayin lim arübah,

tüsho khiungkerübonü nü yo yapsu ayinatrüm lim arübah.

4Nü mükbo züngkihang tüsho mükamde kheahang;

arü alala rukhüh mukhungchoh,

arübo nü kilim arüchoh;

nü tsührübo limshu chingnü arübah,

tüsho nü tsührübebo arü mütrürü bin kheak shuhbah.

5Judüki nünü akheahbah, tüsho zhingzhingde alabah;

nü mulong ajanbah tüsho asühachihbah,

tümütüsho müthangmüsünkhi keto nü kheak handarübah,

trükshihbo lakhit nü kilim arübah.

6Mükhebinkhi kemelbonü nü lomi zündobah,

Midia tüsho Epha kemel nunubo;

Sheba ching yo alala arübah.

Arünü suna tüsho jinjinlak handarübah,

tüsho Atungpuh mung shikhi zhiyukjihbah.

7Kedar mihnu boto alala nü ki mukhungbah,

Nebaioth namfimihnupungbonü nü tankihbah;

arübo I kingaün sadam kheak aleangkhikhukbe labah.

Tüsho inü I müretahkhi yam müretahshihbah.

8Amo nangde phincho ha tüsho müthrithrümpü arü sap lim phinde arükhi nangde la ha sherü a?

9Tümüde keyean lomibonü I aleangbah,

Tarshish sangkungbo akhuhlah,

nü tsührübo limshu chingnü bedarüpü,

arü lung shotoyinchi tüsho suna,

Atungpuh nü Thrünpuh tüsho Israel Amüsüh Thrünpuh mung thsungkheak,

tümütüsho apinü nü müretahshihdo.

10Khiungkerübonü nü chipibo thsüjihbah,

tüsho arü kiulongthsürübonü nü tankihbah;

tümüde I bukakhiukkhi ching inü nü kingmülün,

tüshe I mung chingnü nü kheak I amüthsüm lakheah.

11Nü chipiripitbo kamruhroro khimshuh-a labah;

animung tüsho are mürihde alabah,

junangde trükshihbonü arü lakhit nü kilim handarübah,

arü kiulongthsürübonü bebah dungde arübah.

12Tümüde nü mütankihpü lakhi trükshih tüsho kiulongthsü adükheakbah;

jurü trükshihbo shahde thsümünima labah.

13Lebanon müretahkhi nü kilim arübah,

saipress, juniper, tüsho tsünsang,

I arüngyam jak tsüshihpü;

tüsho I jing dubopung inü müretahbah.

14Nü junorü tsühsoniusobonü nü ki mükhümde arübah,

tüsho nü mükhemükimrü alala nü jing ki khukningde arübah;

arünü nü ki Israel Amüsüh Thrünpuh yo Zion,

Atungpuh kiuto de ajibah.

15Nü bahyuka tüsho thraneana shenü mütsahhode lalashe,

inü nü lünnü wüntre-müretah kamshihbah,

lün alala ching asühachihshihbah.

16Nünü trükshihbo kheaknü niuhke dukbah,

nünü kiulongthsürübo niuh dukbah;

tüsho I Atungpuh , nü Khümkhitbuh tüsho nü Rhokhitrü,

Jakob yo Wuto Khülang ah de nünü amükheahbah.

17Müwayinchi müthri inü suna handarübah,

yinchi müthri shotoyinchi handarübah;

sang müthri sunalung, lung müthri yinchi labah.

Nü kheahrü thsüde inü Mungtsü lashihbah tüsho nü rhimo-putungrü thsüde thiyuro-lungki lashihbah.

18Thiyih bukkhi nüsa lomi ching kheaküa muso,

thsünimthsüshi nüsa aredung ching müla;

nünü nü chipibo ki Akhümkhit

tüsho nü chipiripitbo ki Mungshi de ajibah.

19Kheaküa animuro ani ju nü yo ayin müthsü yungsho azhing ching khinunü nü kilim ayin mütah;

tüshe Atungpuh lang akheam mülakhi nü yo ayin labah,

nü Thrünpuh ju nü müretahkhi labah.

20Nü yo ani kheaküa müyüzah,

yungsho khinunü aküdahnü mutsolo;

tümüde Atungpuh ju nü yo akheam müla ayin labah,

tüsho nü tüzhokhi nimungbo arün thsübah.

21Nü mihtsürü alala thiyuro-lungki labah;

arünü lünnü alomi lubah.

Arübo inü akhimkhi dübit, I khah rhimo,

junangde I müretahbah.

22Yamkhün aninibenü guk khülang kambah,

tüsho boto anikhühnü sühmüh lakhi trükshih kambah;

I Atungpuh ;

kim dükde ching inü ju nahde arhimobah.

Currently Selected:

ISAIA 60: YIMCBSI

Highlight

Copy

Compare

Want to have your highlights saved across all your devices? Sign up or sign in

Yimkhiung Naga CL Bible - AMÜSÜH HÜM

Learn More About AMÜSÜH HÜM CL Bible (BSI)