EZEKIEL 5
5
Ezekiel Ku Hütkhi
1Mihtsürü tsührü, kheakü nuk ayuk khülang luang tüsho nü kuyü le münnam hütpü kuhütrü nuk nangde shuhang. Jushu adünpü thsungkheak adünbe luang tüsho kuyü chamnakang. 2Küyimki kiuto yankhi akheam thsübanü, kuyü shihchamkhüh monü kiuto alunglimnü takang. Shihchamkhüh lubah nü kiuto aleanglim mükamchoki nukshangnü kimshakang. Tüsho shihchamkhüh ju apung ching hiumüzütang, tüsho inü arübo nukshang thokhita shuhbah yande müshambah. 3Tüsho kuyü müthsünkhüh lubah nü khim ching düma zoang. 4Kheaküshe, anükhüh luang tüsho mo ching yuka takang. Ju chingnü Israel trükshih alala ching mo bude ayübah.
5Ha Wuto Atungpuhnü thachoh: Ha Jirusalem ah; lomi alalanü anihbe mükamdobah inü anihbe trükshihbo phulung zojih. 6Tütüshe mihbukmuyukkhi ching anihbenü nihbe mükamde alakhi trükshihbo tüsho lomibo kheaknü alü I yakzanbo tüsho I yuzüngbo azhih. Anihbenü I yakzanbo bahyuk tüsho I yuzüngbo thsunglo. 7Jumonü Wuto Atungpuhnü ha thachoh: Nünü nü mühi trükshihbo kheaknü alü mihyu mani tüsho I yuzüngbo müyan yungsho I yakzanbo muzo, tüshe nü mühi trükshihbo yuzüng yande rhimodo. 8Jumonü Wuto Atungpuhnü ha thachoh: Jirusalem, inü I küdah thsüde nü azhihchoh, tüsho trükshihbo mikinü inü nü mahkhapbah. 9Athraneanbe nü sangthsü alala dünkheaknü inü küyimkishe mürhimokhi nü kheak rhimobah. 10Jumonü nüsa bolung ching buhrübonü arü tsührübo tsühbah tüsho tsührübonü arü bebuhrübo tsühbah. Inü nü kheak thsümüchi jihbah tüsho nüsa aninga larü alala apungbo ching müzütshihbah. 11Jumonü Wuto Atungpuhnü thachoh, I arhang lah, tümütüsho nünü athraneanbe kukrukbo alalanü I yo arüngyam müneanshihdo, inü I küdah thsüde amuzho lulobah; inü nü kheak muzhode mükheah yungsho nü maningshih. 12Nüsa shihchamkhüh arüm yungsho khümzungnü ashebah; nü mühide shihchamkhüh nukshangnü akeambah; tüsho shihchamkhüh apungbo ching hiumüzütbah tüsho nukshang thokhitbah yande müshambah. 13I reangmükeamyi khiungde nünü I bukakhiukkhi tüsho I mulong zhipzhipkhi amüküp alala mütsanbah. Küyimki ha alala dünjibanü, nü thiyuro mülakhinü I Atungpuhnü bukakhiukde nü ki asukdo de nünü mükheahbah. 14Inü nü thsümünimbah tüsho nü mühide trükshih bolung, atsahhorü alala miki münedung kamshihbah. 15Küyimki I bukakhiukde tüsho mulong zhipzhipde nü thsümüchibanü, nü mühi lakhi trükshih alalanü atrebah. Arünü nü kheak thraneande luhmünebah. 16Küyimki inü nü kheak ashebe tüsho khümzung hühzobonü akipbanü, inü nü thsümünimpü kipbah. Inü nü kheak khümzung alü alü handarübah tüsho nü tsühyungpü ngüpung yihdojihbah. 17Inü khümzung tüsho mütüm shiwühbo nü azhihde athiyibah, tüsho arünü nü tsührübo sheshihbah. Arüm tüsho thiyih bukkhinü nü hoshihbah tüsho nü azhihde nukshang handarübah, I Atungpuhnü asukdo.
Currently Selected:
EZEKIEL 5: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
