EFISIA 1
1
1 #
Yunir 18.19-21; 19.1 Thrünpuh lümkhi hode Jisu Khrista amüsüh-thsangyurü Paul kilimnü,
Jisu Khrista ching thiyuro lakhi amüsührü kilim:
2Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü laang.
Khrista ching Me Müngühmühi
3Yinmi kiulongthsü ching me müngühmühibo Khrista ching isa müngühjihbuh, isa Atungpuh Jisu Khrista Abuh Thrünpuh shiang. 4Api miki isa amüsüh tüsho areak mükihde alapü alomi khimtan müngühnü apinü isa api lung mokhit. 5Api lümkhi ayannü Jisu Khrista hode isa api tsührü thsüpü lümjung, 6ju apinü muzhodakbuh lung isa kheak akeangnü ajihkhi api müretahkhi amüthsüm shijihpü lakheah. 7#Kol 1.14Api amüthsüm lakhit ayannü neakbo bahjihkhi api thiyih hode api kheak isa rhokhitkhi lah, 8ju apinü lümlung tüsho anikhitkhi ching isa suhdahde kamshih. 9Tüsho Khrista ching apinü alümkihkhi atsü yande api aram lümkhi isa ki mükheahshih, 10junangde yinmi ching tüsho alomi kheak lüpdükhi api kheak arihpü kim-khiukkhi lümkhi thsü.
11Lüpdükhi api lümthiyan yande rhimobah, api lümkhi yande akhujungkhinü, isanü api lung yamrüplurüp ngü, 12junangde isa akhuhde Khrista kheak kinrü ju api müretah shijihpü thsungkheak labah. 13Nüsanü akhümkhit thiyusheakatsü thiyuro so dunglim api kheak kin; kheaküshe nüsanü api kheak kinde, alokhikhi Amüsüh Menü amütsan yüm. 14Me ju api müretah shijihpü isanü lakhit-kukruk muluyi khiungde isa yamrüplurüp ngüpü thiyuchihchim lah.
Paul Tamkhüntamnü
15Jumonü inü she, Jisu Khrista ching nüsa akin tüsho amüsührü alala thsungkheak nüsa amuzho so dunglim, 16I tamkhüntamnü ching nüsa tamde nüsa thsungkheak makshe jihpü anüzhak müthsü: 17junangde isa Atungpuh Jisu Khrista Thrünpuh, müretah Abuhnü lümlung me tüsho api mükheahkhi ching amikheak akhiukkhi nüsa kilim jihbah, 18nüsa anikhitpü mük khimshuhjihbah, junangde apinü ajikhi mulonglam, amüsührü lung api yamrüplurüp müretah lakhitbo nüsanü amükheahbah, 19tüsho tümü ju api wu ato rhimokhi yande akinrü isa kilim makekhukkhi api sühmüh tokhi la, 20küpü apinü ashe chingnü arhang kamloshihchoki tüsho yinmi kiulongthsü ching akhah tsülim binshihchoki Khrista kheak rhimokhea, 21thiyuzüng, thiyukhümsühmüh, yakzan shuhkhi, tüsho ha lün ching lang yungde arüpü lakhi ching she mung jia lakhi alala kumung changlah; 22#Kol 1.18tüsho apinü alala api jing khüp yüzahshih, tüsho borü thsungkheak alala kumung api aku kamshih. 23Borü ju Khrista pang, alala mishihbuh api abanathsangkhi lah.
Currently Selected:
EFISIA 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
