YUZÜNGTHALO 6
6
Thiyuzüng Atobe
1“Kheakü ha nüsa ki thsangyushihpü Atungpuh nüsa Thrünpuh thiyukhümbo, yakzanbo tüsho thiyuzüngbo, junangde nüsanü hode yübah amükühpü lakhi lo ching nüsanü yande arhimobah, 2ju ruk inü nüsa, nüsa tsührü tüsho tsührütsührü ki thiyukhüm jihkhi, api yakzanbo tüsho thiyukhümbo zopü nüsanü Atungpuh nüsa Thrünpuh, rhangdung amuyung wüntrebah, tüsho nüsa kutsüp ashang labah. 3Jumonü O Israel aniang, tüsho ha yande arhimopü kümkangang, junangde nüsa tsüde alabah, tüsho Atungpuh nüsa bebuhrü Thrünpuhnü nüsa ki thiyuchihchimkhi nangde niuhke tüsho mukhuke bukde alakhi lomi ching tode wüh bubah.
4“O Israel aniang: Atungpuh isa Thrünpuh ju lang Atungpuh ah! 5Nü mulong athrünkhinü, nü me athrünkhinü, tüsho nü sühmüh athrünkhinü Atungpuh nü Thrünpuh muzhoang. 6Tüsho inü khihni thiyukhüm jihkhi yu ha nüsa mulong ching labah; 7nüsanü jurü nüsa tsührübo ki düshihde athsangyubah, tüsho nüsa thüyam ching binchoki, limro tsahchoki, ayapchoki, tüsho awusuchoki thabah. 8Jurübo mütsan thsüde nüsa khahbo tüsho nüsa kingkangbo kheak rümkihang. 9Nüsanü jurübo nüsa yam khimdopü tüsho chipimurungbo kheak thrütkihang.
Mihyumanikhi Dünkheak Thiyukhüm
10“Tüsho hanangde alabah, Küyimki Atungpuh nüsa Thrünpuhnü nüsa bebuhrü Abraham, Isak, tüsho Jakob ki nüsa ki tode ajihpü thiyuchihchimkhi tüsho nüsanü amüthsükhi akheahakham kiutobo ching bebah arübanü, 11nüsanü yuka muzokhi thüyam kukruk atsünü mide, nüsanü amukiukhi kekungbo, nüsanü amükhimkhi kurungasolubo tüsho oliv sangdungbo–küyimki nüsanü tsühde reangkeambanü, 12nüsa Ijip lo, azhorü kuhi chingnü abekhitbuh Atungpuh mümihpü kümkangang. 13Nüsanü Atungpuh nüsa Thrünpuh wüntreang, tüsho api tankihang, tüsho api mung ching thiyuchihchim luang. 14Nüsanü nüsa mükamde alakhi püpürü thrünpuhbo dunglim düyan, 15tümüde nüsa lung lakhi Atungpuh nüsa Thrünpuh ju mükthsübuh Thrünpuh; jude yungsho Atungpuh bukakhiukkhi nüsa kheak labah, tüsho apinü nüsa alomi kheaknü dükheakshihbah.
16“Nüsanü Atungpuh nüsa Thrünpuh Massa ching rükakikhi nangde rükdaki. 17Nüsanü Atungpuh nüsa Thrünpuh yukhümbo, thiyumütsanbo, tüsho apinü nüsa ki thiyukhüm jihkhibo düshihde anide rhimoang. 18Tüsho nüsanü Atungpuh mük ki küpü alungkia tüsho atsüanü ju rhimoang, junangde nüsa tsüde alabah, tüsho Atungpuhnü nüsa bebuhrü kheak thiyuchihchimkhi alo atsü ching nüsanü yübah amükühbah, 19tüsho Atungpuhnü alokhikhi nangde nüsanü nüsa riri yankhita bahbah.
20“Arübe kim ching nü tsührünü nü ki keokhibah, Thiyumütsan, yakzanbo, tüsho Atungpuh isa Thrünpuhnü nüsa ki thiyukhüm jihkhi ha amütsan tümüa? 21Judüki nünü nü tsührü ki thabah: Isa Ijip ching Pharao bukkhüp azhorü lakheah, tüsho Atungpuh khah ato hode isa Ijip chingnü bekhit; 22tüsho Atungpuhnü Ijip, Pharao tüsho api yamkhün azhihde amükheahmihbe khinthiyinbe, tode atrebe isa mük ki huh. 23Tüshe apinü isa ju chingnü bekhitbah isa bebuhrü kheak isa jihpü alokhikhi lo ching bedarü. 24Tüsho kamruhroro tsüde alapü thsüde Atungpuh isa Thrünpuh wüntrepü thsungkheak Atungpuhnü isa ki harü yakzan alala anide arhimopü thiyukhüm jih, junangde khihni nangde apinü isa rhangdung lashihbah. 25Tüsho apinü isa ki thiyukhüm jihkhi nangde, harü yukhümbo kümkangde anisho isa thsungkheaknü ha thiyuro-lungki labah.
Currently Selected:
YUZÜNGTHALO 6: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
