YUZÜNGTHALO 29
29
Moab ching Tangzüng Thsülokhi
1Harübo ha apinü arü kheak Horeb ching tangzüngkhi lung ajakde Israel mihtsürübo ki Moab ching thiyukhüm jihshihpü Atungpuhnü Mosa ki tangzüngkhi jihkhibo ah.
2Kheakü Mosanü Israelrü alala jibahle arü ki tha: “Atungpuhnü nüsa mük kinü Ijip lomi ching, Pharao tüsho ayamlarü le api lo alala ching rhimokhi nüsanü ngüdo. 3Atrebe arümbo, amüyinsahbebo tüsho khinthiyinbe atobo nüsa müknü ngüdo. 4Tütüshe ha nimung khiungde, Atungpuhnü nüsa ki anikhitpü lüm, angüpü mük tüsho asopü nükhün müjih. 5Tüsho inü nüsa sunglo ching kam yirü bedo. Nüsa khimmihbo tüsho nüsa jingkhümpübo mümürhüt; 6nüsanü yikhap mütsüh, yungsho yukhu le püpü ayungbe muyung; tüshe nüsanü api ju Atungpuh nüsa Thrünpuh ah de amükheahpü thsüde Atungpuhnü nüsa tsühyungpü jih. 7Tüsho küyimki nüsa ha dangpung ching arükhea, Heshbon kiulongthsüpuh Sihon tüsho Bashan kiulongthsüpuh Og anenü isa bede keochihpü akhiuk, tüsho isanü arü kuk. 8Isanü arü lo ludo tüsho yamrüplurüp thsüde Reubenrü, Gadrü tüsho Manase trük chamkhüh kilim jih, 9jumonü ha tangzüngkhi yubo zoang tüsho rhimoang, junangde nüsanü arhimokhi alala ching alü thsübah.
10“Khihni nüsa alalanü A TUN GPU H nüsa Thrünpuh miki zhipang: nüsa limberübo, nüsa azothsürübo, nüsa torübo tüsho Israel mihtsürü alala, 11nüsa tsührü aninibo tüsho nüsa niuberübo–kheaküshe nüsa khimyam ching lakhi khiungkerübo, nüsa sangyihrü chingnü kekhiprü khiungde– 12junangde nüsanü Atungpuh nüsa Thrünpuh tangzüngkhi ching tüsho Atungpuh nüsa Thrünpuhnü khihni nüsa ki thiyuchihchimkhi ching yüzahbah, 13junangde apinü khihni nüsabo api mihtsürü kamshihbah, tüsho apinü nüsa le nüsa jipürü Abraham, Isak tüsho Jakob ki thiyuchihchimkhi nangde api nüsa Thrünpuh thsübah. 14Inü ha tangzüng tüsho thiyuchihchim nüsa ki lang müthsü, 15tüshe Atungpuh isa Thrünpuh miki isa lung zhiprü, tüsho khihni isa lung mülarü ki she thsüchoh.
16“Tümüde isa Ijip lo ching lakhi tüsho nüsanü hode arükhi, künangde trükshihbo lung isa hode arükheanü nüsanü mükheahlah, 17tüsho arü bolung lakhi athraneanbe tüsho sang le lung tüsho shotoyinchi le sunanü athsükhi sangthsü nüsanü ngüdo; 18khükia nüsa bolung athrürü yungsho aliberü yamkhün yungsho trük, Atungpuh isa Thrünpuh kheaknü mulong rholobah harü trükshih thrünpuhbo tankihbah, tüsho nüsa bolung aying akhüh tüsho ari zahkhi sang nangde alabah; 19tüsho küyimki hadürü mihtsürünü ha muthrumüneankhi sobanü, apinü nihbuh mulong ching müngühmühide athabah, ‘Inü I mulongnü alümkhi ching tsah-a lalashe I mungtsü labah.’ Hanü nüsa atsü tüsho amütsü chido thsümünimbah. 20Atungpuhnü api neak mübahjih; tümüde Atungpuh bukakhiukkhi tüsho api mükthsükhi ju mihtsürü kheak alü trubah, tüsho ha hüm ching thrüta lakhi muthrumünean alala api kheak akihbah, tüsho Atungpuhnü api mung thüning khüpnü nankhita bahjihbah. 21Tüsho ha yakzan hüm ching thrüta lakhi muthrumünean tangzüngkhi nangde Atungpuhnü api thsümüchipü thsungkheaknü api Israel trükbo alala chingnü bemuwuhbah.
22“Junangde nüsa dunglim asürükhi tsührübo lün, tüsho limshu lomi chingnü arükhi khiungkerübonü Atungpuhnü ju lo ching arüm tüsho tukthsü zojihkhi ngübahle athabah: 23‘ Alo athrünkhi kelülü lung, thimi tüsho atak ah; ha ching mümükhean, yungsho maso tüsho rim tümü she mumukhuh, ha Atungpuhnü abukakhiukchoki thsümünimkhi Sodom tüsho Gomorra, Adma, tüsho Zeboiim nangde alabah.’ 24Trük alalanü athabah, ‘ Tümüde Atungpuhnü ha lo ching hade arhimokhea? Tode abukakhiukkhi ha tümü amütsan?’ 25Judüki mihtsürübonü athabah: ‘ Tümütüsho apinü arü Ijip lo chingnü bede akhiukchoki Atungpuh arü jipürü Thrünpuhnü tangzüngkhi arünü bahyukdo; 26tümüde arünü yübah arü ki mümülükhi tüsho arünü mümükheahkhi püpürü thrünpuhbo tankih tüsho kingaün. 27Tüsho ha hüm ching thrüta lakhi muthrumüneanbo handarüpü thsüde Atungpuhnü ha lo azhihde abukakhiuk. 28Tüsho Atungpuhnü abukakhiukde arü rukkhita arü lomi chingnü püpürü lomi ching yüshih, tüsho khihni khiungde lah.’
29“Aramkhi kukruk ju Atungpuh isa Thrünpuh yo ah, tüshe akhiukahuhkhibo lünnü isa tüsho isa tsührübo yo ah, junangde isanü ha yakzan anibah.
Currently Selected:
YUZÜNGTHALO 29: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
