YUZÜNGTHALO 17
17
1“Nünü Atungpuh nü Thrünpuh ki lapha kihkhi moshipung yungsho namfimihnununü dükingaün, tümüde ju Atungpuh nü Thrünpuh kilim athraneanbe lah.
2“Atungpuh nü Thrünpuhnü ajihkhi chipimurungbo khüp athrürü yungsho aliberü khürünü api ki tangzüngkhi thsümünimde Atungpuh Thrünpuh miki amütsü rhimokhi ngüsho, 3shepünü tsode yünü püpürü thrünpuhbo tankihde inü thiyukhüm müjihkhi ani, khinu yungsho thüning kheak lakhi khürü kingaünbanü; 4tüsho ju nü ki thabahle nünü sosho, nünü ju atsüngalim thsüde yima kheahang. Tüsho ju thiyuro thsüa lasho tüsho hadürü athraneanbe Israel ching dükde yihbeaka lasho, 5nünü amütsü rhimorü athrürü yungsho aliberü ju nüsa chipimurungbo ki bede akhiukang, tüsho lungnü rusahang. 6Shepü ashepü thülünlanü mahne yungsho mahsamnü thiyumütsan jihkhi hode asheshihbah tüshe thiyumütsan khülang hodünü a api müsheshih. 7Api sheshihpü thsungkheaknü thiyumütsan jihrünü akhuh khah chungbah, tüsho jushu mihtsürübonü khah chungbah. Junangde nüsanü amütsü mihtsürü nüsa lungnü yihkhita bahbeah.
8“Nüsa thsungkheaknü mahkhappü chakde dünjisho, lakhitkukruk alim dünkheak yungsho thiyih bukkhi tüsho mihtsürü laksahkhi, küyimki hadürü dünjibanü Atungpuh nüsa Thrünpuhnü amokhitkhi kingaünpung ching yüang, 9tüsho nüsanü ju Levirü amükeamrü tüsho ju kim ching rhimoyam ching lakhi mahkhaprü ki keokhiang, tüsho arünü ju dünkheak mahkhapshang. 10Atungpuhnü amokhitkhi dangpung ching arünü nü ki mütsande athakhi yande nünü kümkangde rhimoang. 11Arünü yakzan yu mütsande nüsa ki thsangyukhi tüsho mahkhapkhi yande nüsanü rhimoang; nüsanü tsülim yungsho huzulim anguhde nüsa ki thakhi kheaknü dütso. 12Khürünü mahkhaprü yungsho Atungpuh nüsa Thrünpuh tankihrü amükeamrü ki mihyumanide azhihsho api asheshihbah; hanangde nüsanü amütsürü Israel chingnü yihkhita bahang. 13Judüki mihtsürü athrünkhinü ju sobahle atrebah tüsho shenü she arhimolopü mümürang.
Kiulongthsürü Dünkheak Thsangdankhi
14“Küyimki nüsanü Atungpuh nüsa Thrünpuhnü ajihkhi lo ching arübah müküh-a labanü, tüsho isa mühirü trükshihbo nangde isa kurungkheak kiulongthsürü zobah de athabanü; 15nüsanü tsükjide Atungpuh nüsa Thrünpuhnü amokhitkhi kiulongthsürü nüsa kurungkheak mokhitbah; nüsa keoniorü bolungnü khülang nüsa kurungkheak nüsanü kiulongthsürü mokhitbah; nüsanü keoniorü yungde khiungkerü khülang nüsa kurungkheak kiulongthsürü dümokhit; 16tüshe kiulongthsüpuhnü anihbuh bonungrü thsungkheak khora hihde mubushihbeah, tüsho apinü mihtsürübo khora thulopü Ijip ching müyüshihbeah, tümütüsho api mihtsürü küyimkishe ju ching alode müyüshihpü Atungpuhnü thado. 17Apinü niuberü ahihdo muzobeah, jude yungsho api mulong Atungpuh kheaknü chamkhide atsobah; yungsho apinü shotoyinchi le suna hihde muzobeah. 18Küyimki api kiulongthsürü binkiu kheak binbanü Levirü amükeamrübonü azokhi Thrünpuh yakzan tüsho thsangyukhi hüm chingnü anihbuh thsungkheak shihküp kheak thrütkih-a zobeah. 19Tüsho ju api ki labah tüsho apinü ju api rhangdung amuyung khebah, junangde apinü Atungpuh api Thrünpuh wüntrepü mükheahbah; tüsho kümkangde ha yakzan tüsho thiyuzüngbo yande arhimobah. 20Junangde apinü nihbuh keoniorü kheaknü api atsübe ah de mülüm, tüsho thiyukhüm chingnü tsülim yungsho huzulim manguh tüsho Israelrü bolung api kiulongthsü ching api tüsho tsühsoniusobonü lün ahihdo yakzan shuhbah.
Currently Selected:
YUZÜNGTHALO 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
