DANIEL 9
9
Daniel Tamkhüntamnü
1Midiarü Zerzes tsührü Darius, Babilon kiulongthsübo kurungkheak yakzanshuhrü kam. 2Api kiulongthsü atan kam ching, I Danielnü Atungpuhnü wukihrü Jeremia ki thakhi nangde, kam nerü Jirusalem thsümünimpü dünkheak amüsüh hümbo khede tüsho lümakheahde alakheah.
3Jushu inü tamkhüntamnü chingnü mushude khümkeak thsüde tüsho shungliukhim yihbah awah ching awuhde Atungpuh T H RÜ NPU H kilim rholode yü. 4Inü Atungpuh I Thrünpuh ki tamkhüntamnü tüsho neak alokhide tha, “ O, Atungpuh , ato tüsho atrebe Thrünpuh, shepünü nü muzhorü kheak tangzüng tüsho mihmüthsüm zocho tüsho nü yukhüm zocho, 5isanü mihbukmuyuk rhimode tüsho azhihde nü yukhümbo tüsho yuzüngbo kheaknü rholobah tsode neak yihbeakdo tüsho amülim thsüdo. 6Isanü nü mung chingnü isa kiulongthsürübo, yakzanshuhrübo, isa jipürübo, tüsho lomi mihtsürü alala ki asukkhi nü yamlarübo ki mani. 7Atungpuh , nü thiyuro-lungki ah, tüshe khihni khiungde Juda mihtsürü tüsho Jirusalem mihtsürü tüsho Israel alala, aphüni tüsho limshu, nünü isa hiumüzütkhi lomi alala ching isanü nü ki müthülünkhi hode isa miro müdünkhitde lah. 8O Atungpuh , isa le isa kiulongthsürübo, isa yakzanshuhrübo tüsho isa bebuhrünü isanü nü azhihde neak yihbeakkhi hode isa miro müdünkhit. 9Isanü api azhih-a lalashe Atungpuh isa Thrünpuh ju mihmüthsüm tüsho neak bahjihrü lah; 10isanü Atungpuh isa Thrünpuh ki mani yungsho api yamlarü wukihrübo hode api yakzanbo isa ki jihkhi isanü muzo. 11Israel alalanü nü ki anipü reanglode nü yakzan lakmihdo tüsho rholode tsodo. Jumonü Thrünpuh yamlarü Mosa yakzan ching thrütkhi muthrumünean tüsho thiyuchihchim isa kheak dungkih, tümütüsho isanü nü azhihde neak yihbeak. 12Nünü isa le isa yakzanshuhrü azhihde asukkhi yubo thsümütsü ato isa kheak dünjishih. Thüning athrünkhi bukkhüp Jirusalem kheak rhimokhi nangde küyimkishe mürhimoakheahyi. 13Mosa yakzan ching thrüta lakhi nangde ha thsümütsü alala isa kheak arüdo, tütüshe isa neakbo chingnü rholode tüsho nü thiyuro anide isanü Atungpuh isa Thrünpuhnü amulongkhi müyim. 14Atungpuhnü isa kheak thsümütsü handarüpü lüm müshangmang, tümüde Atungpuh isa Thrünpuh ju apinü arhimokhi lüpdükhi ching thiyuro-lungki lah; tütüshe isanü api ki mihyumani. 15Kheakü, O Atungpuh isa Thrünpuh, shepünü khah ato hode nü mihtsürü Ijip chingnü bekhit tüsho khihni ha khiungde nü mung thude kamshihkhea, isanü neak yihbeakdo, isanü amülim thsüdo. 16O Atungpuh , nü thiyuro-lungki rhimobo yande, nü bukakhiukkhi tüsho mulong zhipzhip, nü kiuto Jirusalem, nü amüsüh wung chingnü tsoang; isa neakbo tüsho isa jipürü mülimkhibo hode, Jirusalem tüsho nü mihtsürübo isa mühirü alala ki münedung khülang kamdo. 17Jumonü kheakü, O isa Thrünpuh, nü yamlarü tamkhüntamnükhi tüsho apinü mushukhi sojang, tüsho O Atungpuh , nü mung chingnü, thsümünima lakhi nü arüngakopung kheak nü miro yinshang. 18O I Thrünpuh, nü nükhün muphoang tüsho aniang; nü mükbo khimshuhang tüsho isa thsümünimkhi tüsho nü mung tamde ajikhi kiuto kheahang, tümüde isa thiyuro-lungki dünkheaknü isanü nü miki mushukhi yung, tüshe nü mihmüthsüm ato dünkheaknü ah. 19O Atungpuh , aniang; O Atungpuh , neak bahjang; O Atungpuh , anijang tüsho rhimoang; nü mung chingnü dashu, O I Thrünpuh, tümütüsho nü kiuto tüsho nü mihtsürübo nü mung chingnü jia lah.”
Gabrielnü Müchit Thanakkhi
20Inü I Thrünpuh amüsüh wung thsungkheak Atungpuh I Thrünpuh ki I neak tüsho I mihtsürü Israel neak alokhide asuk tüsho tamkhüntamnü thsü. 21I tamkhüntamnüde alachoki, akhuh ngükhi michih ching inü angübuh mihtsürü Gabriel arelim kingaünkhi kim ching I ki phinde aki. 22Api arü tüsho I ki tha, “ O Daniel, kheakü I nü kilim lümlung tüsho anikhitkhi jihpü arükheah. 23Nü tamkhüntamnü tankihchoki, nü ki alojih, ju nü ki thapü I arüchoh tümüde nü khide muzhodakkhi lah. Jumonü thiyusheak lümakheahang tüsho michih anikhitang.
24“Thünenü shu nerü kambo ju nü mihtsürü tüsho amüsüh kiuto thsungkheak akhua zojihlah: alakmihkhi banshihpü, neak kheamshihpü, amülim dünthsükhipü, lün thsungkheak thiyuro-lungki hanyukpü, michih tüsho wukihrü chido yümdopü, tüsho khide Amüsüh Dangpung müsükhitpü lah. 25Jumonü mükheahang tüsho anikhitang: Jirusalem thsülopü thiyu wukhiukkhi chingnü mujude-mokhitkhi limberü khülang kim khiungde thünenü shu thüne kambo labah; tüsho thünenü shu rukrükheak mahne kambo ching ju kiudunglimrobo tüsho khuhtotsunglobebo bede athsülobah, tüshe ha küpkhuk kim khülang labah. 26Tüsho thünenü shu rukrükheak mahne dunglim mujude-mokhitkhi laksahbah tüsho wulakhi yakzanshuhbuh yo thirithsürünü azahbah kiuto tüsho arüngakopung thsümünimbah. Akheam ju keking khülang nangde arübah: Akheam khiungde thirithsü labah, tüsho athsümünimpü thsakhama lah. 27Apinü mihtsürübo ahihdo kheak kam thüne düküngde thiyuchihchimkhi khülang labah, tüsho küyimki ha kim thripkhüh hobanü, apinü laksah-a kingaünkhi tüsho kingaünbo kheamshihbah. Athsümünimbe mihtrebe ju arüngyam ku kheak labah tüsho ha ju kheak akheam marüchoki khiungde alabah.”
Currently Selected:
DANIEL 9: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
