AMOS 9
9
Atungpuh Mahkhap
1Inü Atungpuh ju kingaün sadam ki zhipde ngü, tüsho apinü tha: Akhimtan muniukniukyi khiungde dungjing ku kheak lakang, tüsho jurübo mihtsürü alala ku kheak aniukkhiang; tüsho sherü aninga lanü inü nukshangnü alaksahbah; arü she lang she shande mutso, arü she lang she mutsokhi. 2Arünü Ashe-lomi ching kiude yüzahzah she, ju chingnü I khahnü arü lubah; arünü thüning kheak künkihkih she ju chingnü inü arü bekhibah; 3arünü Karmel mujuk kheak jikjik she, ju chingnü inü arü yimkhitbah; tüsho arünü I mikinü keto alunglim jikjik she, ju ching inü ke-phuruto ki thiyukhüm jihbah, tüsho junü arü nguhbah. 4Tüsho arünü ramtso ching arü riri miki yüyü she, ju ching inü nukshang ki thiyukhüm jihbah, tüsho junü arü laksahbah; tüsho inü arü kheak athsümünim thsungkheaknü I mükbo kheahkihbah tüsho atsü thsungkheak yung.
5 Atungpuh , Wuto T H RÜ NPU H ,
shepünü alomi qiucho tüsho ju niucho,
tüsho ju ching larü alala tüzhocho,
tüsho ju alala Nile nangde akihcho,
tüsho Ijip ching Nile nangde keamyuklocho;
6shepünü yinmi ching nihbuh akube khiungshakbo thsücho,
tüsho alomi kheak khimtanbo thsücho;
shepünü keto kebo jicho tüsho alomi kheak dungkhitcho–
Atungpuh ju api mung lah.
7Nüsabo I kilim Ethiopiarü ruk yung de, O Israel mihtsürü? Atungpuhnü thachoh. Inü Israelrü Ijip chingnü, tüsho Filistiarü Kaphtor chingnü tüsho Siriarü Kir chingnü mübekhit de? 8Atungpuh T H RÜ NPU H mükbo ju neak lakhi kiulongthsü kheak lah, tüsho inü ju alomi kheaknü adükheakshihbah; inü Jakob yamkhün lang shahde müdükheakshih, Atungpuhnü thachoh.
9Tümüde kheahang, inü thiyukhüm jihbah tüsho khürünü ayikeangnü ayikhi nangde trükshih alala bolung müthülünkhi yihkhita bahpü inü Israel yamkhün ayibah. 10I mihtsürü aneakrü alala nukshangnü ashebah, sherünü tha, “Amütsünü isa müyanphuh yungsho mushoru.”
Arübe ching Israel Lalopü
11Ju nimung David khimyam keama lakhi inü alahmusubah, tüsho azhakkhibo thsülobah, tüsho athsümünimkhibo lahmusubah, tüsho awün nimungbo nangde athsülobah; 12junangde arünü Edom aningkhi tüsho I mung tamde ajikhi trükshihbo alala kuka lubah, ha rhimobuh Atungpuhnü thachoh.
13Nimungbo arümuroh, Atungpuhnü thachoh,
küyimki wochakrünü yimlurü alihhoba tüsho kurungaso-nitrünü müjih yangrü alihhoba;
müzüngbonü yukhu aniung atsamkhibah tüsho junü awungbo alala bukbah.
14Inü I mihtsürü Israel kuhi jihlobah,
tüsho arünü athsümünim kiutobo thsülobah tüsho jurü ching labah;
arünü kurungasobo yangbah tüsho jurü yukhu yungbah,
tüsho arünü awündobo thsübah tüsho sangaso tsühbah.
15Inü I mihtsürübo lomi kheak khimbah,
tüsho inü arü kilim jihkhi lo chingnü küyimkishe arübo mürukkhitlo,
Atungpuh nüsa Thrünpuhnü thachoh.
Currently Selected:
AMOS 9: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
