2 KORINT 9
9
Khristanrü Rungachihpü
1Kheakü akinrübo rungpü kingaün dünkheak inü nüsa kilim thrütpü yihnüpü müla, 2tümüde nüsanü ahobe kamnü ründe Akaia ching thsakhama lakhi mükheahbah thade, nüsa dünkheak inü Macedonia mihtsürübo ki kükheangchoh; tüsho nüsanü akünsahkhinü arü ahihdo thurumusudo. 3Tüshe inü nüsa dünkheak kükheangkhi mütsanpü akeangkeang mükampü thsüde keoniorübo thiyichoh, junangde inü nüsa ki thakhi nangde nüsanü athsakhambah; 4jude yungsho Macedoniarü khürü I lung arübah nüsa müthsakhamde ngüsho, khide mulong tode labah nüsa dünkheak thapü tümü mülade isa achih ngübah. 5Jumonü I müngühnü keoniorübo nüsa kilim tuthsuka yüshihbah nüsanü alokhikhi thsambah amüngühnü tsanglungpü yihnüpü lah de inü lümdo, junangde reangkihde yung tüshe mulongkhi thsambah nangde ju thsakhama labah.
6Shepünü nükde ahiubanü nükde yimlubah, tüsho shepünü hihde ahiubanü pheangde ayimlubah de lümkhitang. 7Mihtsürü abannü mükünmuthsung yungsho arochihde yungde nihbuh mulongnü apungkhikhi jihang, tümüde asühde ajihrü Thrünpuhnü muzhochoh. 8Tüsho Thrünpuhnü nüsa kilim müngühmühi lüpdükhi suhdahde ajihpü kuklah, junangde nüsa kamruhroro lüpdükhi suhdahde alabah tüsho rhimo atsübo thsungkheak suhdahde ajihbah. 9Ha thrüta lah,
“Apinü zhochihrü kilim salade jihchoh,
api thiyuro-lungki lünnü rünkhiungde lah.”
10Shepünü müjih-hiurü kilim müjih tüsho atsühpü yikhap jihchonü nüsa müjih bushihbah tüsho nüsa thiyuro-lungki yimlukhi alü kamshihbah. 11Nüsa limro lüpdükhi ching lakhitshihbah, junangde kim aban salade alabah, tüsho isa hode nüsa salakhinü Thrünpuh ki makshe jihshihbah; 12tümüde ha tankih rhimokhinü akinrü yihnüpü lakhi lang müjih tüshe Thrünpuh kilim makshe jihpü hihde kamshihchoh. 13Ha tankihkhi mütsankhi ching, nüsanü Khrista thiyusheak-atsü mihyuanikhi tüsho arü le püpürü alala thsungkheak salade arungkhi hode arünü Thrünpuh müretahshihbah. 14Tüsho Thrünpuhnü nüsa kilim münchi hode amüthsüm jihkhinü, arünü sükde amuzho lade nüsa thsungkheak tamkhüntamnüjihbah. 15Müthakhukbe api thsambah thsungkheak Thrünpuh kilim makshe jihang!
Currently Selected:
2 KORINT 9: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
