2 KORINT 7
7
1Amuzho müyamrübo, tümütüsho isa harü alokhikhibo lah, pang tüsho me müneankhi lüpdükhi chingnü isanü müsühkhitanü, tüsho Thrünpuh trekhi ching banthsangkhi amüsüh kamanü.
Paul Asühkhi
2Isa kilim nüsa mulongbo khimshuhang; isanü she ki amülim müthsü, isanü she ki müthsümünim, isanü she ki mülapyukde mürhimo. 3Inü ha nüsa bahyukde mütha, tümüde inü akhuhlim, rukhüh shepü tüsho rukhüh lapü nüsa ju isa mulong ching lah de thado. 4Inü nüsa kheak mulongram ato lah; nüsa hode kükheangkhi ato lah; I a sühakhimnü mide lah. Isa thsünü alala ching I khide asühdo.
5 #
2 Kor 2.13
Tümütüsho küyimki isa Macedonia ching arükhea, isa pang sühakhim müla, lüpdükhi lim küpkhuk lakheah. Wungdo rukachih, alunglim atrebe lakheah. 6Tüshe akheamkhibe ching larü mulong shukheamrü Thrünpuhnü Tita arüshihde isa mulong shukheam, 7tüsho api arükhinü lang yung, tüshe nüsanü api kilim mulong shukheam jihkhinü she ah. Nüsanü I mürheangkhi, sükde nüsa mulong rozhakkhi, nüsanü mulongsahde lümrhihkhi isa ki thado, junangde inü alü thsüde asüh.
8I yo kihümnü nüsa mulong tukthsüshih-a lalashe inü mülümrhihlo (lüma lalashe), tümüde ju kihümnü anükhühkheak lang thsüthsü she nüsa mulong tukthsüshihkhi inü ngüdo. 9Nüsa mulong tukthsükhinü yung, tüshe nüsa mulong tukthsükhinü mulong müthrikhi thsungkheak I asühchoh; tümüde Thrünpuh lümkhi yande nüsanü mulong tukthsü, junangde isa hode nüsa akeangkeang ching müthsünü. 10Tümüde Thrünpuh lümkhi yande mulong tukthsükhinü akhümkhit lim bepü mulong müthri akhiukshihchoh tüsho tümü mülümalo, tüshe alomi yande mulong tukthsükhinü ashepü akhiukshihchoh. 11Ha Thrünpuh lümkhi yande mulong tukthsükhinü nüsa kheak tümü akhiukshih-a lanü kheahang: azhihayihkhi, nüsa müsühde alapü mulongdakkhi, thiyuro, bukakhiukkhi, lamlamsahdo, künsahde, lümrhihpü, thiyuro rhimo kheahpü thsakham. Hadürü alala ching nüsa müsühde alakhi mütsan. 12Jumonü inü nüsa kilim thrüta lalashe, ju amülim rhimobuh yungsho amülim hode thsünübuh dünkheak yung, tüshe nüsanü isa lümrhihkhi ju Thrünpuh miki akhiukpü ah. 13Jumonü isa mulong shukheam lah.
Tüsho isa mulong shukheamkhi kheak khiode Tita asühkhi ching isanü alü asühachihchoh, tümütüsho nüsa alalanü api lümkhi sühakhimshih. 14Tümüde inü nüsa dünkheak api ki kükheangkhi ching nüsanü I achih müngüshih; tüshe isanü nüsa ki thakhi lüpdükhi thiyuro lakhi nangde, Tita miki isanü kükheangkhi thiyuro mütsando. 15Tüsho nüsa alalanü mihyuanide, trede tüsho ajande api leangkhikhi lümkhitchoki apinü nüsa muzhokhi atobe kamchoh. 16I asühchoh, tümütüsho inü nüsa kheak athülünkhi mulongram lah.
Currently Selected:
2 KORINT 7: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
