1 TIMOTHI 6
6
1Sherü yamlarü thsülanü arü putungrü ki wüntre alala jihpü thülünlah de alümbeah, junangde Thrünpuh mung tüsho thsangyukhi mungchih müla. 2Tüsho sherü akinrü putungrübo lanü, keoniorü thsümonü arü ki wüntre müjihde düla; tüshe atsübenü arü tankihang tümütüsho arü rhimo hode sherü alü thsüa lanü akinrübo tüsho arünü amuzhokhi lah. Nünü harü arü ki thsangyuthsangrabeah tüsho tuthsukbeah.
Arükchih Thsangyukhi tüsho Thiyuro Lakhitbo
3Khürünü arükchih kingaünyakzan thsangyukhi tüsho Atungpuh Jisu Khrista thiyuro yubo tüsho akin thsangyukhi kheak mayesho, 4api kükheanglah tüsho tümü mümükheah; api a alanaji lümkhi amütsü tüsho atsangachihpü künkhi lah, junü mükthsü, marüpachih, dünthamungtha, mulong rüngkhi, 5tüsho thiyuro mülade tüsho akinkhi ju alarü kampü limro ah de alümkhi mihtsürü dükeak atsangachih akhiukshihchoh; 6suhdahlah de lümsho akinkhi ching alü ato lah; 7tümüde isanü alomi ching tümü hande marü, tüsho isanü alomi chingnü tümü she mulukhuk; 8tüshe isa tsühyungbe tüsho khimmih lasho isa thsungkheak ju suhdahkhi labeah. 9Tüshe sherünü alarü kampü künchonü rükaki ching, azheang ching tüsho makhade mihtsürü thokheambe tüsho athsümünimbe ahihdo ching yüzahchoh. 10Tümüde sho muzhokhi ju amütsü alala yo aying ah; ha künkhi hode khürü akin chingnü bephülapde tsodo tüsho hihde dukmüsüpkhinü arü mulongbo chinkhitdo.
Bümdung Thsangdankhi
11Tüshe nü Thrünpuh mihtsürü, ha alala bahkhiang; thiyuro-lungki, akinrü thsüpü, akin, amuzho, arümkheam, azhihayih kheak kheahkihang. 12Akin keochih atsü keochihang; ahihdo thiyumütsan mikinü alokhichoki nü jikhi lün rhangdung ramrihang. 13#Jhn 18.37Alala kilim rhangdung jihbuh Thrünpuh tüsho Pontia Pilat miki thiyumütsan tsüde alokhikhi Jisu Khrista mikinü, 14isa Atungpuh Jisu Khrista marüyi khiungde areak yungsho mungchih mülade ha yukhüm zopü inü nü ki tuthsukchoh; 15tüsho ha kim dükdü ching, müngühmühi tüsho wuto ju lang, kiulongthsürübo kheaknü Kiulongthsürü tüsho atungrübo kheaknü Atungrü, 16api lang amüshebe tüsho mukhiungkhukbe ayin ching lah, shenü she müngü yungsho angüpü mukuk. Api kilim lünnü wüntre tüsho sühmüh lashang. Amen.
17Ha lomi ching mükükheangpü tüsho mümütsankhi lakhit ching yungde, isa asühshihpü lüpdükhi muzhomopungde ajihbuh Thrünpuh kheak arü mulonglam zopü alarü ki thiyukhüm jihang. 18Arünü atsü rhimode, atsü rhimokhi ching lakhitde, salade tüsho jihchungpü künde alabeah, 19hanangde arübe ching arü thsungkheak khimtan atsü thsüchoh, junangde arünü atsütsü rhangdung lakhi rhangdung kheak ramrihbah.
20O Timothi, inü nü ki tümü thiyidünü kümkangang. Amükinrü yu tüsho arükchihnü “Mükheahmudu” de ajikhi atsangachihkhibo bahkhiang, 21tümüde ha thakhi hode akin chingnü bephülapde tsodo.
Thrünpuh nü lung lashang.
Currently Selected:
1 TIMOTHI 6: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
