1 TESALONIKA 5
5
Atungpuh Arüpü thsungkheak Thsakhamkhi
1Tüshe keoniorübo, kim tüsho nimung thsungkheaknü nüsa ki thrütpü tümü yihnüpü müla. 2#Mt 24.43; Lk 12.39; 2 Pet 3.10Tümüde Atungpuh nimung ju azhing ching ahührü khülang nangde arübah de nüsanü mükheahlah. 3Küyimki mihtsürünü, “Mungtsü tüsho akhümkhit” de athabanü mübünkeangkhi liberü kheak zübethsünükhi nangde zukleangnü arü kheak athsümünim arübah, tüsho arü mutsokhide alabah. 4Tüshe keoniorübo, ha nimungnü ahührünü nangde nüsa müyinsahshihpü thsüde nüsa amiting ching müla. 5Tümüde nüsa alala ayin tüsho animung tsührübo ah; isa ju azhing yungsho amiting yo yung. 6Jumonü püpürü nangde isanü müyapnü tüshe isanü kurhanganü tüsho rhüngrhüngde danyukanü. 7Tümüde sherünü yapchonü azhing ching yapchoh, tüsho sherü müshangchonü azhing ching müshangchoh. 8#Efi 6.13-17Tüshe isa ju animung yo a le, isanü rhüngrhünganü, tüsho akin tüsho amuzho treangkhümbe yihanü, tüshe akhümkhit mulonglam thsungkheak yinchikuthran thrananü. 9Tümüde Thrünpuhnü isa bukakhiukpü thsungkheak yung, tüshe isa Atungpuh Jisu khrista hode akhümkhit ngüpü mokhit. 10Isa arhang lalashe yungsho shea lalashe api lung isa rukhüh lapü thsüde isa dünkheaknü api she. 11Jumonü nüsanü rhimode alakhi nangde khülangnü khülang tuthsukachihang tüsho shuhkihachihang.
Akheamde Thsangdankhi
12Tüshe keoniorübo, nüsa bolung rhimorü tüsho Atungpuh lung nüsa limbede thsangdanrü ki wüntre jihang de nüsa ki mushuchoh, 13tüsho rhimo dünkheaknü amuzho ching khide changde arü ki wüntre jihang. Nüsa bolung mungtsü laang. 14Keoniorübo, yomuhyothsünrü athsunganahpü, mulong ninirü yanmusupü, reangmüzahrü rungpü, arü alala kheak arümkheampü isanü nüsa ki tuthsukchoh. 15Nüsa shenü she amütsü müthri amütsü müjihlopü mütsanang, tüshe kamruhroro khülangnü khülang tüsho alala ki atsü rhimopü yimang. 16Kamruhroro asühachihang, 17müdüchingde tamkhüntamnüang, 18kuhi alala ching makshe jihang, tümüde ha nüsa thsungkheak Jisu Khrista ching Thrünpuh lümkhi ah. 19Me dümütshih, 20müchitkhi mükhemükim düthsü, 21tüshe lüpdükhi rükakheahang; tümü atsüanü düngde ramrihang, 22amütsü mungjibo chingnü bahkhiang.
23Thrünpuh mungtsünü nüsa abümnü tsangkhitshang; tüsho isa Atungpuh Jisu Khrista arüchoki nüsa me rhangdung tüsho pang areak mükihde zoang. 24Shepünü nüsa jichonü thiyuro lah, tüsho apinü ju rhimobah.
25Keoniorübo, isa thsungkheak tamkhüntamnüjang.
26Amüsüh mün müthsüpkhinü keoniorü alala ki salüm jihang.
27Ha kihüm keoniorü alala ki kheang de Atungpuh hode inü nüsa ki mushuchoh.
28Isa Atungpuh Jisu Khrista amüthsüm nüsa lung laang.
Currently Selected:
1 TESALONIKA 5: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
