1 SAMUEL 8
8
Israelnü Kiulongthsürü Kheangkhi
1Küyimki Samuel ashinbuhrü kamkhea, apinü atsührübo Israel kurungkheak mahkhaprübo kamshih. 2Atsührü adüjibuh mung ju Joel, mahnepü mung Abija; ane ju Beersheba ching mahkhaprü lakheah. 3Tütüshe atsührübonü api ru müyan, tüshe alü thsüpü lim anguhabah; arünü buknim lu tüsho thiyuro thsungphülap.
4Judüki Israel azothsürü alala mukhung tüsho Rama ching Samuel kilim arü, 5tüsho api ki tha, “Nü ashinbuhrü ah tüsho nü tsührübonü nü ru müyan; jumonü mührü trük nangde isa kurungkheak yakzan shuhshihpü kiulongthsürü khülang mokhitjang.” 6Tüshe arünü, “Isa kurungkheak yakzan shuhshihpü isa kilim kiulongthsürü khülang jihang” de athachoki Samuel masühde kam. Jumonü Samuelnü Atungpuh ki tamkhüntamnü, 7tüsho Atungpuhnü Samuel ki tha, “ Mihtsürübonü nü ki thakhi arü düsheak alala ching anijang; tümüde arünü nü mübahyuk, tüshe arü kurungkheak kiulongthsürü zokhi hode I bahyukdo. 8Inü arü Ijip chingnü bekhitkhi nimungnü khihni khiungde I bahyukde tüsho püpürü thrünpuhbo tankihkhi nangde, arünü nü kheak rhimochoh. 9Jumonü kheakü, arü düsheak anijang; nünü lang arü ki düshihde dühdang, tüsho arü kurungkheak yakzan shuhpü lakhi kiulongthsüpuh limrobo arü ki huhang.”
10Jumonü Samuelnü Atungpuh yu alala api ki kiulongthsürü khülang kheangrü mihtsürübo ki tha. 11Apinü tha, “ Harü ha nüsa kurungkheak yakzan shuhpü lakhi kiulongthsüpuhnü arhimobe limrobo ah: apinü nüsa tsührübo lubah api khora-lolungbe tüsho khora beshihbah, tüsho api khora-lolungbe müngüh alihshihbah; 12tüsho apinü chithürü tüsho thünim kurungkheak wühkenorü mokhitbah, tüsho khürü api lu phünpü tüsho yimlushihpü, tüsho keochihbe tsungthsüh tüsho khora-lolungbe kukrukbo thsüshihpü mokhitbah. 13Apinü nüsa tsührü aliberübo rhümthüneabe mujurü, dükihthürarü tüsho yikhap nungrü thsüpü lubah. 14Apinü nüsa lubo, kurungasolu tüsho oliv sangaso yi atsüdakbo lua api bukkhüp rhimorübo kilim jihbah. 15Apinü nüsa hi tüsho kurungasobo chingnü thürü shihcham lubah api yo atorübo tüsho ayamlarübo kilim jihbah. 16Apinü nüsa yamlabuhrü tüsho yamlaberü lubah, tüsho nüsa akam-shiwüh le donki atsüdakbebo lubah tüsho api rhimo thsüshibah. 17Apinü nüsa mihnubo chingnü thürü shihcham lubah, tüsho nüsa api bukkhüp azhorü thsübah. 18Tüsho ju nimung ching nüsanü nüsa kiulongthsürü mokhitkhi dünkheak nüsanü azhibah; tüshe Atungpuhnü ju nimung nüsa ki malojih.”
19Tüshe mihtsürübonü Samuel yu anipü reanglo; arünü tha, “Yung! tüshe isa kurungkheak kiulongthsürü khülang zopü isanü mulongkhitdo, 20junangde isa she mührü trük nangde alabah, tüsho isa kiulongthsüpuhnü isa yakzan shuhbah tüsho isa müngüh yübah keochihbah.” 21Küyimki Samuelnü mihtsürübonü athakhi yu alala sokhea, apinü Atungpuh ki thalo. 22Atungpuhnü Samuel ki tha, “ Arü yu aniang tüsho arü kurungkheak kiulongthsürü khülang zojang.” Samuelnü Israel mihtsürü ki tha, “Nüsa alala thüyam lim alode yüang.”
Currently Selected:
1 SAMUEL 8: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
