1 SAMUEL 6
6
Tangzüng Sangdan Jihlokhi
1 Atungpuh sangdan Filistia lomi ching khinu thüne lakheah. 2Judüki Filistiarünü amükeamrü le thümürübo ji tüsho tha, “Isanü Atungpuh sangdan küde athsüba? Isanü tümü bebah azopung ching alode ayüshihbanü isa ki thaang.” 3Arünü tha, “Nüsanü Israel Thrünpuh sangdan dükhea tsoshihpü thsüsho, akeangkeang düyüshih, tüshe küdüküdü she amülimkhi kingaün jihloa yüshang. Jushu nüsa thsüngubah tüsho tümü thsükhi api khah nüsa kheaknü muluakhinkheanü nüsanü amükheahbah.” 4Tüsho arünü tha, “ Api lung yüshihpü thsüde amülimkhi kingaün ju tümü a?” Arünü alo, “Filistia kiulongthsürü abande arümnü akhiukshihkhi suna mü phüngü tüsho suna phihnu phüngü; tümüde ha arüm nüsa le nüsa kiulongthsürübo kheak lakheah. 5Jumonü nüsanü alo thsümünimjihkhi mübo tüsho phihnu kiphahde thsang, tüsho Israel Thrünpuh ki müretahshang; khükijua api khah nüsa le nüsa thrünpuhbo tüsho nüsa lomi chingnü adükhebah. 6Tümüde nüsanü Ijiprü tüsho Pharaonü mulong müküpkhi nangde nüsa mulong müküpcho? Apinü arü kheak thsümüchishu lang arünü mihtsürü chamkhibah mutsoshihkhea de? 7Jumonü kheakü, khora-lolungbe aso khülang thsakhamang tüsho küyimkishe sangkap mühankhi moshi dreto ju kheak rhükkihang, tüshe anunubo a bede yünü ayam ching zoang. 8Atungpuh sangdan lubah lolungbe kheak yihkihang, tüsho küpü nüsanü amülimkhi kingaün suna nungkhi api lung mühahchonü tsüm ching yukbah arheang ching yukang. Jushu alimro ching dükhea tsoshang. 9Tüsho kheahang; mürangkhüh nihbuh lomi limro lim, Beth-shemesh lim wutusho, isa kheak tode athsümüchikhi ju api ah; tüshe jude yungsho isa kheak shikkhi ju api khah yung de isanü amükheahbah; isa kheak ha limmekhühnü dünjia lah.”
10Mihtsürübonü jude rhimo; arünü moshi dreto mahne lubah lolungbe kheak rhükkih, tüsho anunubo ayam ching rihdoa zo. 11Arünü Atungpuh sangdan tüsho suna phihnu le arü mü kiphahde anungkhibo zahkhi tsüm ju lolungbe kheak yihkih. 12Moshibonü limto khülang yande langakindo Bethshemesh lim yü, arü yü yande koyude, arünü tsülim yungsho huzulim she manguh, tüsho Filistia kiulongthsürübonü arü dunglim Beth-shemesh aredungyean khiungde yü.
13Kheakü Beth-shemesh mihtsürübo jindükhün ching wheat hi yimlude alakheah. Küyimki arünü abinkih-a kheahbah sangdan ngükhea, arünü asühachihde ju kheah. 14Lolungbe ju Beth-shemeshrü Jihusua lu ching arü, tüsho ju ching tuklo. Ju ching lung ato khülang lakheah; jumonü arünü lolungbe sang chenak tüsho moshibo ju Atungpuh kilim taka kingaün. 15Levirübonü Atungpuh sangdan tüsho suna kukruk zahkhi tsüm shuhkhi, tüsho jurübo lung ato kheak duboa zo. Judüki Beth-shemesh mihtsürübonü taka kingaün tüsho ju nimung Atungpuh kilim laksah-a kingaünkhi jih. 16Küyimki Filistiarü kiulongthsürü phüngünü ju ngükhea, arü ju nimungnü Ekron lim alodarü.
17Harübo ha Filistiarünü A TUN GPU H kilim amülimkhi kingaün dünkheak mühahlokhi suna mübo; Ashdod, Gaza, Ashkelon, Gath tüsho Ekron arü abande khülang khülang; 18kheaküshe suna phihnubo kiulongthsürü phüngü lapung Filistia kiutobo ayannü, chipi ayünkhi kiutobo tüsho mayünkhi kiulongbo. Arünü Atungpuh sangdan zokhi lung ato ju Beth-shemeshrü Jihusua lu ching khihni khiungde thiyumütsan thsüde lah.
19Beth-shemesh mihtsürübonü Atungpuh sangdan ching abinyuka kheahmonü arü kheak apinü shik; apinü arü mihtsürü 70 laksah. Mihtsürübonü tüzho tümütüsho Atungpuhnü mihtsürü bolung muliuhde laksah.
Kiriath-jearim ching Tangzüng Sangdan
20Judüki Beth-shemesh mihtsürübonü tha, “Shepünü ha amüsüh Thrünpuh, Atungpuh müngüh zhipkhukba? Ha chingnü sangdan she kilim yüshihba?” 21Jumonü arünü yunithsürübo Kiriath-jearim ching larü kilim yüshih tüsho tha, “Filistiarünü Atungpuh sangdan jihloa arüshihdo. Akiang tüsho nüsanü shuh-a lung.”
Currently Selected:
1 SAMUEL 6: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
