1 KORINT 7

Yamkhün Thsükhi dünkheak Keokhikhibo

1Kheakü nüsanü athrütkhi dünkheak. Athrürü khülangnü yamkhün müthsükhi ju atsü ah. 2Tüshe müzammüram rükaki lakhi hode athrürü abannü nihbuh niuberü tüsho aliberü abannü nihbe niubuhrü labeah. 3Niubuhrünü niuberü alim yihnüpü lakhi rhimobeah, tüsho niuberünü niubuhrü ki junangde athsübeah. 4Tümüde niuberünü nihbe pang kurungkheak atungrü müthsü, tüshe niubuhrünü ahorichoh; junangde niubuhrünü nihbuh pang kurungkheak atungrü müthsü, tüshe niuberünü ahorichoh. 5Nüsanü shuhmülanga jihde tamkhüntamnüpü baplapkhi kim kheak hode khülangnü khülang ki darochih; tüshe jushu shoruachihloang, jude yungsho zangrü müdanyukkhi hode amüneannü nüsa rükakibah. 6Inü ha thiyukhümnü yungde alungki lakhi limronü thachoh. 7Alala I ruk lakhülaa de inü lümchoh, tüshe mihbüm aban Thrünpuh kilimnü thsambah büthsüthsü, khülang kilim khülang tüsho püpü kilim püpü de lah.

8Yamkhün mükamrü tüsho khimoberü ki I nangde langzü lasho tsülah de inü thachoh. 9Tüshe arünü nihbuh küdah thsüde müdankhuksho, arünü yamkhün thsübeah. Tümüde mulong phurude alapü dün a yamkhün thsükhi atsübe ah.

10 # Mt 5.32; 19.9; Mk 10.11,12; Lk 16.18 Yamkhün kamrü, niuberünü niubuhrü kheaknü müchambeah de inü yungde Atungpuh yukhüm jihchoh. 11Tüshe anihbenü jude thsüsho, alibe ju mürhangde alabeah yungsho aniubuh ki chingkihbeah. Tüsho niubuhrünü nihbuh niuberü mübahbeah.

12Püpürü ki Atungpuhnü yungde inü thachoh: Keoniorü khürü amükinrü niuberü lasho tüsho alibenü api lung lapü mulongsho, apinü anihbe mübahbeah. 13Tüsho keonioberü khürü amükinrü niubuhrü lasho, tüsho apinü anihbe lung lapü mulongsho, alibenü api kheaknü müchamkhibeah. 14Tümütüsho amükinrü niubuhrü ju aniube hode müsühkhitchoh, tüsho amükinrü niuberü ju aniubuh hode müsühkhitchoh. Jude yungsho, nüsa tsührübo mümüsühde alabah, tüshe ha hode arü amüsüh ah. 15Tüshe amükinrü yamkhünrünü chamachihpü künsho, jude thsüshang; hadürü ching niubuhrü yungsho niuberü rhüka müla. Tümüde Thrünpuhnü nüsa mungtsü ching lapü jikheah. 16Niuberü, nünü nü niubuh khümkhitba shi yungnü küde thsah mükheahla? Niubuhrü, nünü nü niube khümkhitba shi yungnü küde thsah mükheahla?

Thrünpuhnü Nü Jikhi nangde Laang

17Mihbüm abannü Atungpuhnü api kilim thsambah jihkhi tüsho Thrünpuhnü api jichoki nangde alabah. Ha borü alala ching I yuzüng lah. 18Khürü api jikhi kim ching tsütabah-a lakhea de? Apinü tsütabahkhi areak yihkhita bahpü dümürang. Khürü api jikhi kim ching tsütamübah-a lakhea de? Apinü tsütabahpü dümürang. 19Tümütüsho tsütabahkhi yungsho tsütamübahkhi yungde Thrünpuh yuzüng zokhi khechoh. 20Mihbüm abannü nihbuh jichoki nangde alabeah. 21Ajichoki nü azhorü lakhea de? Masühde düla. Tüshe nü zuzu ngükhuka lasho, jude laang. 22Tümüde shepü azhorü thsüde Atungpuhnü ajikheanü Atungpuh zuzu mihtsürü ah. Junangde ajichoki shepü zuzu lakheanü Khrista yo azhorü ah. 23Nü ju amo jihbah athulokheah; mihtsürü yo azhorü dükam. 24Jumonü keoniorübo, mihbüm aban künangde alachoki jikhea, api Thrünpuh lung lashang.

Yamkhün Mükamrü tüsho Khimoberü

25Kheakü yamkhün mükamrü dünkheak Atungpuh yukhüm müla, tüshe Atungpuh mihmüthsüm mulonglam hode I lümkhi jihchoh. 26Kheakü lümthsünü lakhi yandüa mihtsürü khülang ju api künangde lanü ju ruk lakhi atsübe ah de inü lümchoh. 27Nü niuberü la shi? Abahpü dümürang. Nü yamkhün müthsü shi? Yamkhün thsüpü dümürang. 28Tüshe nü yamkhün thsüsho nünü neak müyihbeakchoh, tüsho aliberü khülang ju rhangsho anihbenü neak müyihbeakchoh. Tüshe sherü yamkhün thsüchonü alomi küpkhukbo labah, tüsho inü ju chingnü nüsa tsokhitshihnelah. 29Keoniorübo, ju amütsan akhukhi kim khide khihabahdo; kheakünü rünbah sherü niuberü lanü arünü mülakhi nangde, 30tüsho sherü tüzhochonü, arünü mütüzhokhi nangde, tüsho sherü asühachihchonü, arünü masühachihkhi nangde, tüsho sherü thulochonü, arünü kukruk mülakhi nangde, 31tüsho sherünü alomi kukruk ahorichonü, arünü mahorikhi nangde laang. Tümüde kheakü alomi hode tsochoh.

32Inü nüsa mulong sansan chingnü zuzu kamshihnelah. Yamkhün mükamkhi mihtsürünü künangde Atungpuh asühshihbanü de Atungpuh rhimo dünkheak mulong sansanchoh; 33tüshe yamkhün kamkhi mihtsürünü, künangde aniube asühshihbanü de alomi rhimo dünkheak mulong sansanchoh, 34tüsho api lümkhi lümtrüp thsülah. Tüsho mürhangkhi liberü yungsho anünürünü, künangde pang tüsho me ching amüsüh laba de Atungpuh rhimo dünkheak mulong sansanchoh; tüshe arhangkhi liberü a künangde aniubuh asühshihbaki de alomi rhimo dünkheak mulong sansanchoh. 35Inü ha nüsa rhüka lapü yungde nüsa tsüpü thachoh, junangde nüsanü Thrünpuh kilim shuhmülanga jihkhi ching müchammüzütde alungki limro ching labah.

36Khürünü anihbuhnü thiyu zokhi anünürü ki yakli mülakhi rhimochoh de lümsho, tüsho apinü mulong phurude yamkhün thsübeah de lümsho, apinü akünkhi rhimoshang, apinü neak müyihbeak. Ane yamkhün kamshang. 37Tüshe shepünü anihbuh lümkhi ching adüngakhi la, shepü animkihkhi khüp mülacho tüshe nihbuh lümkhi kurungkheak adanyukkhi la, tüsho shepünü anünübe ju mulupü lümkihlanü, apinü alungki rhimochoh. 38Junangde shepünü anünübe luchonü alungki rhimochoh, tüshe shepünü alibe mulunü atsüdakbe rhimochoh.

39Niuberü ju aniubuh la khiungdüa zuzu müla. Aniubuh shesho, alibenü amulongkhi Khristanrü ki lang arhangpü zuzu labah. 40Tüshe alibe ju ruk lang alakhipü anihbe asühbe labah de inü lümchoh. Tüsho I a Thrünpuh Me lah de inü lümchoh.

Currently Selected:

1 KORINT 7: YIMCBSI

Highlight

Copy