MARKA 7
7
Upate Thugosia ah Kipat Thuhilna
(Mat 15.1-9)
1Pharisaite leh lekhazikte khen khat Jerusalem ah kipat a kiang in a hung un,
2a nungzuite lak ah khenkhat in khut thiang lo ah; zia chu khut sawp lo ah, ti’na ahi’n, an a nêk uh a hung muu a.
3(Pharisaite leh Judate zosia hin upate thugosia a zui ziak un, khut sawp lo in an a ne ngai puau in;
4kaithial ah thil kizuak him himle sawp lo in a ne ngai puau hi; zia gual chun thil chan ding a hau ma mau a, no sawp ding, bêl sawp ding, kuang sawp ding leh ûm leh bêlte sawp ding tite haw hi.)
5Tichun, Pharisaite leh lekhazikte chun, “Bang ding ah la nungzuite hin upate thugosia gual lo tak ah khut sawp lo ah an ne ziang a hiu em?” ti’n a hung dong un.
6 #
Isa 29.13
Ama chun a kiang un, “Nanghaw miphalêmte haw, Isai in la chungthuu a la gen hi a dik ngut hilam:
Zia mite hin a kam un ei chawihoi un,
a lungthim un vang ei gamlat ma mau hi.
7Mihing thupiakte chu thugin gual in a zilsak un,
ei biaknau chu a thawn mai ahi,
ti a zik gual khan,” a tia.
8Pathian thupiakte chu ngaisak lo in, mihing thugosia chu la zui ui, a tia.
9Chuleh, a kiang un, “Nangmau thupiakte chu la zuitheina ding un, Pathian thupiakte chu la paitha sik sek ui!
10 #
Pdt 20.12; Dan 5.16; Pdt 21.17; Thp 20.9 Mosi chun, la nu leh pa ja in, kuale a nu leh pa hosia chu thi mai hen, a ti’n;
11himaleh, nang uh chun, kua’nle a nu a hem, a pa a hem kiang ah, lei matna ding chu Korban ti leh, (zia chu, Pathian kiang ah piakdaw, ti’na ahi,)
12a nu â ding a hem, a pa â ding a hem in bangma a bawl piak la phal ngai ta puau in,
13nangmau thugosia ziak ah chun, Pathian thupiak chu bangmalo in la koi un; zia gual chun thil tam tak la hitau hi,” a tia.
14Ziazaw chun mipite chu a ko khawm kit ah, a kiang un, “La leng un ka thugen hi ngai phau inla, hethiam tau in;
15pawlam ah kipat mihing sung ah lutte hin kuama a subuak pua hen, mihing ah kipat hung pawtte chun mi chu a subuak zaw sek ahi.
16Kuale hetna ding ah nakhang nei chun he tau hen,” a tia#7.16 zia châng hi I text un a um puai.
17Mipi lak ah kipat a pawt daw phatin, In sung in a lut ah; a nungzuite chun a tekhinthu umzia chu a dong ua.
18Ama chun a kiang un, “Nang unle hethiam nailo la hiu maw? Paw lam ah kipat mihing sung ah lutte chun ama chu a subuak thei puai, ti helo la hiu em?
19A lunggil sung khoi lo in, a gilpi sung ah lut ahi ziakin, a hung pawt theng mai sek hilo a hem?” a tia. (Zia chu an zosia a thiang hi ti a genna ahi.)
20Ama ma chun, “Mihing sung ah kipat hung pawt chun mi a subuak zaw sek hi.
21Mihing lunggil ah kipat chun ngaituana phalo: Ângkawmnate, gûkchâknate, tualthanate,
22thanhuainate, du-âmnate, phatlonate, mithep nopnate, huknate, kisaktheinate, mi demsiat nopnate, ngolnate haw hi a hung pawt sek hi.
23Zia tawhbang thil phalote hi sunglam ah kipat hung pawt in, mihing chu a subuak sek hi,” a tia.
Grik Numei Ginna
(Mat 15.21-28)
24Zia tak ah kipat chun a pawtdok a, Tura leh Sidon bial sung lam ah chun a chia ah, In khat ah a lut ah, kuama kihiatsak a nuam pua’n; himaleh, a kisêl thei diak ta puai.
25Numei pakhat, a chanu naupang neucha thitha buak vop chun a chanchin a hun he, a kiang in a hung ah, a kengbul ah chun a hung bokkhup a.
26Numei chu Jentel mi a hia, pianna lam ah chun Sirophoiniki mi ahi. Ama chun a chanu sung ah kipat thitha buak nawdok dingin a hung don a.
27Himaleh, Jesu’n, “Naupangte chu hung vâ masau hen, chate vaithum lâkpiak ah, uichate piak chu a kilawm puai,” a tia.
28Amanu chun a kiang in, “Lalpa, hi’ vang a hinai, ahi’n la, uichate’nle naupangte khachenên dawkân nuai ah um chu a ne sek uh hilam,” a tia.
29Ziaphatchun, Jesu’n a kiang in, “La thu gen ziak ah chun, chia ta’n, la chanu sung ah kipat chun thitha buak a pawt tai,” a tia.
30Tichun, In lam in a chia ta’n, a chanu thitha buak in a nutsia sa, lupna lum chu a vamu tai.
Bengngong Sukdamna
31Tura gam chu hun pawtsan in, Sidon lampi haw ah, Dekapolis bial hun haw malam pek in, Galili Dil chu a hung tung kit ta’n.
32Zia tak ah chun a kiang in, mi pakhat bengngong, pau kichian theilo a hun pui un; a chung ah khut nga dingin a don un.
33Ama chu mipi lak ah kipat chun a puidok chuam ah, a bilhawmte ah chun a khutzung a thun ah, a chil a sek ah, a lei le a vak khoi piak a;
34van lam a en ah, a hung khuaisa, “Ephphatha,” a hun tia, zia chu, “Hung kihong in,” ti’na ahi.
35Tichun, thakhat in a nakhang chu a hung kihong ah, a lei chu a hung tawi thei ah, kichian tak in a hung pauthei tai.
36Zia thu chu kuama gen lo dingin thu a pia; himaleh, a ha-khap po leh nasa zaw diak in a tângkopiu a;
37“Ama chun bangkim a bawlpha tai; bengngongte khua a hetsak a, pautheilote le a pausak hi,” ti’n lamdang a sa ma mau hi.
Currently Selected:
MARKA 7: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
