MATTHAI 20
20
Grep Huan ah Nasemte
1Van gam chu gam neipa, a grep huan ah nasem ding chial ah jingkal ma tak ah tho ah, pawtdok gual chu ahi.
2Ama chun ni khawtha’ a law ngai zat, denarii khat piak dingin a kihopi ah, a grep huan in a sawl tai.
3Dak kua vêl ah a vavakdaw leh, midang kaithial mun ah ding mai maite a vamu’n;
4ziate kiang ah chun, nang uh le grep huan ah vakuan unla, a kilawm kham hun pena’ng ka, a tia. Amau chule a vakuan tau a.
5Sûnkim leh nitâk lam dak thum tiang inle mi a sawl nalai a.
6Nitâk lam, dak nga vêl ah a vapawt daw kit leh, midang mawk din mai mai a vamu kit ah, a kiang un, bangatia, zia tak ah hi sun nitum ah mawk um la hiu em? a tia.
7Amau chun a kiang in, kua ma’n ei goi puau ah ahi, a tiu a. Ama chun a kiang un, aleh, nang haw le ka grep huan ah vakuan tau in la, a ti kit a.
8 #
Thp 19.13; Dan 24.15 Nitâk a hung hi in, grep huan neipa chun a sum voppa kiang in, nasemte kha ko inla, a nunung pen ah kipat a masa pen tiang in a law uh pia’n, a tia.
9Dak nga vêl in a mi goite a hung un, ni khat thaman zat chiat a muu a.
10Ahi’n, a kuan vaimate’n, a tam zaw deu mu a kigingchau ah; ahi’n la, amau chunle nikhat thaman zat chiat a mu tau a.
11A tha man uh a kilâk phat un gam neipa chung in a phunnawi tau a.
12A nunungte hin dakkal khat bep a sêm un, kei uh nisapi thuak ah gim tak ah a la pangte tawh law kibang in lei pia ziang ah, a tiu a.
13Ama chun a lak ua mi pakhat kiang in, Lawm, la chung un hi’khial bangma ka nei puai; ni khat law zat law ding ah kiho tuaksa hilo I hiu em?
14Nang â ding chu la’n la chia mai in; zia a nunung pen hile nangma ka piak jat chu piak ka nuam hi.
15Kei â hive’n, ka nop dan dan ah ka bawl thiang hilo a hem? Ahiloleh, keima huangphal ziakin nang in mitthipna la nei ziang a hem? a tia.
16 #
Mat 19.30; Mar 10.31; Luk 13.30 Tichun, a nunungle hung masa’n tin, a masale hung nunung in au, a tia.
Jesu’n A Thina Ding leh A Thawkitna Ding A Genlawk Thumveina
(Mar 10.32-34; Luk 18.31-34)
17Jerusalem lam ah Jesu a chia to lai in, a nungzui sawm leh nite chu pui chuam in, lamkâl in a holimpi ah, a kiang un,
18ngai tiam u, Jerusalem lam ah chia to ding I hitau hi; zia tak ah chun Mihing Chapa hi thiampu lalte leh, lekhazikte khut ah matsak in um intin, a thi dingin thiamlo hun chansak ding a hiu.
19Chuleh, nuisan ding leh jep ding leh kros ah khetden dingin, Jentelte khut in pia’n tiu in; himaleh, a ni thum ni leh tho kit ding ahi, a tia.
Jakob Leh Johan Nu Thildot
(Mar 10.35-45)
20Ziazaw chun Zebedai chate nu chu a chapate tawh a hung un, a ma’ hung bokkhup in, chanpha pakhat a hung don tau a.
21Ama chun a kiang in, bang a hem la dawi? a la tia. Amanu chun a kiang in, La gam ah chun zia ka chapa teni hi pakhat la changlam ah, pakhat la veilam ah chutsak lechin ka ti ahi, a hun tia.
22Himaleh, Jesu’n a dawnhu a, la thildot hi bang a hile helo la hi. Ka no dawn ding chu dawn thei ding la hiu ah a hem? a tia. Amau chun, thei ing kau, ti’n a dawnhuu a.
23Ama chun a kiang un, ka no dawn ding chu dawn in lau; himaleh, ka changlam leh ka veilam ah kichu ding chu keima piak ding a hipua’n, ka Pa’n a guatte kiang ah chun a piak ding a hizawi, a tia.
24Zia thu chu a dang sawmte’n a hun het phat un, zia unau pani’te chung ah chun a lungdam ta puau a.
25 #
Luk 22.25,26 Himaleh, Jesu’n a kiang in amau chu a ko ah, Jentelte chung ah vaihawmte chu a chung un a lal ma mau ah, a milianteu chunle a chung un thu a nei ma mau hi, ti la hiau hi.
26 #
Mat 23.11; Mar 9.35; Luk 22.26 Himaleh, nangmau lak ah chun zia gual chu hilo ding ahi; la lak ua a lianpen ding chu la suak ua a pan diu ahi.
27La lak ua a lalpen hi’nuam chu la suak ua a pan diu ahi.
28Mihing Chapa hial hile min a na a sep piak ding ah hung a hipua’n, nasem ding leh, mi tam tak tatna ding ah a hinna pia ding ah hung ahi zawi, a tia.
Jesu’n Mitthûm Pani A Sukdamna
(Mar 10.46-52; Luk 18.35-43)
29Jeriko ah kipat a pawt daw phat ua chun, mipi tam tak in a hun zui un.
30Lampi pâm ah mitthûm pani a la kichuu a, Jesu a hung hi ti a het phat un, a hung kiko ua, Aw Lalpa, David Chapa, ei lungsiat in, a tiu a.
31Mipite chun thip dingin a vau un; himaleh, amau chun, Aw Lalpa, David Chapa, ei lungsiat in, ti’n a kiko ngai zaw diak tau a.
32Jesu chu ding in, amau chu a ko a, bang hun hi’piak leng lei tiu em? a hun tia.
33Amau chun a kiang in, Lalpa, mu thei ka nuam ui, a tiu a.
34Jesu’n a lungsiat ma ma ziakin a mit uh a khoi a: Thakhat in a mu thei ngal tau a, ama a zui tau hi.
Currently Selected:
MATTHAI 20: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
