LUKA 7
7
Sepai Za hotu Suak Sukdamna
(Mat 8.5-13)
1Jesu’n, mipite kiang ah thu a gen zaw phatin, Kapernaum khua lam in a chia ta’n;
2zia tak ah chun sepai zahotu suak, a doichuam ma ma khat, damlo thi vâng vâng in a um a.
3Jesu chanchin a la het phat in, a suakpa chu hung hi’dam ding ah don dingin, a kiang in Juda upate chu a sawl a.
4Jesu kiang a hung tun phat un, ama chu panpi tâk tak ahi dan hung gen kawm in, phatchuamngai tak in a hung don tau a.
5“Ama chun ka nam uh le a lungsiat ah, ka sunagog In uh le ei sak piak ahi,” a tiu a.
6Ziaphatchun, Jesu’n a zui a, In ah kipat gamla lo ah chun, sepai zahotu chun a lawite chu a kiang in a hun sawl a, “Lalpa, hung kisukbuai dâ mai in, ka Insungle nangma lutna tâk ei puai.
7Keima le la kiang ah hung tâk ka hi puai; himaleh, thu bep gen lechinle ka suak chu dam mai in a;
8keima le mi thunuai ah um ka hi’n, ke’n le ka nuai ah sepaite ka nei ah, pakhat kiang ah, chia in, ka tileh a chia ah, a dang khat kiang ah, hung in, ka tileh a hung a; ka suak kiang inle, zia hi bawl in, ka tileh a bawl mai sek hi,” a vatisak a.
9Jesu’n zia thute chu a het in mak a sa ma ma ah, a kihei a, ama zui mipite kiang ah chun, “Ka hil la hiu, Israel lak inle zia gual lawm ah ginna nasa hi ka mu nai puai,” a tia.
10A mi sawlte chu a hung un, In a hung tun kit phat un zia suak damlo chu dam in a mu tau hi.
Nain Khua Meithâinu Chapa Thisa Kaithawna
11Chomkhat zaw in, khawpi pakhat Nain a tiu ah chun a chia a; a nungzuite leh mi tam tak inle a hun zui un.
12Khawpi kul kotkhak a hun nai phat un, mithi pakhat a hun jawndok ua. Ama chu a nu chapa changkhat neisun ahi’n, a nu chu meithâi ahi; khawpi mipi tam tak inle a hun zui un.
13 Lalpa‘n ama chu a mu in a lainat ma ma ah a kiang in, “Kap ta kin,” a tia.
14Ziaphatchun, a hun nai ah, a lâng chu a vak khoi phatin a jawnte chu a ding tau a. Jesu chun, “Tangval, hung tho ta’n!” a hun tia.
15Ziaphatchun, mithi chu hung kitung in a hung pau ta’n; a nu kiang in a pia tai.
16Mi zosia chu a lau tau a; Pathian a chawihoi ua, “I lak un jawlnei lopi tak khat a hung pawt ah, Pathian in a mite a hung kantha ta ahi,” a tiu a.
17Tichun, a chanchin chu Judea gam zosia leh a kîmvêl gam zosia ah chun a kithang suak tai.
Baptispa Johan Palaite
(Mat 11.2-19)
18Johan nungzuite chun, zia thil umdan zosia chu kim tak in a hil tau a.
19Johan in a nungzuite pani a ko a, Lalpa kiang in a sawl a, “Nangma hi a hung ding chu la hita em? ahiloleh, midang a la ngâk nalai ding ka hiu em? vatiu in,” a tia.
20Jesu kiang a tun phat un, “Baptispa Johan in ei sawl ka hiu a, Nangma hi a hung ding chu la hita em? ahiloleh, midang a la ngâk nalai ding ka hiu em?” a vatiu a.
21Zia lai tak chun, mi hivei chuam chuam nei leh, natna chuam chuam ah damlote chu a la hidam ah, thitha buakte a la nawdok ah, mitthûm tam takte le a mit uh a la hi’vâk piak a.
22 #
Isa 35.5,6; Isa 61.1 Jesu’n a dawnhu a, “Chia kit unla, la thil muteu leh la thil hiatteu hi Johan kiang in vagen un: Mitthûmte’n a muthei tau hen, kengbite keng in a chia tau in; phâkte sukthiantho in a um un, bengngong te’nle a hethei tau in, mithite le kaithaw in a um un; gentheite kiang ah le chanchinpha gen ahi tai.
23Chuleh, keima ah lung hilona neilote chu mi hampha a hiu!” a tia.
24Johan nungzuite a chia kit zaw phat un, Johan chung thu chu mipite kiang in a gen pan ta’n. “Aleh, gamthip ah khan bang en ding ah chia la hiu em? Luang hui in a mut lîng maw?
25Aleh, bang en ding him him ah chia la hiu em? Puan nêm silte maw? Ngai tiam un, puan lopi sil leh mi nuamsate chu lal In ah ei vei a um sek uh.
26Aleh, bang en mawng mawng ah chia la hiu em? Jawlnei maw? ahi, ka hil la hiu, jawlnei sâng ah le lopi zaw ahi!
27 #
Mal 3.1
Zia pa chanchin chu zia gual hin a la kizik hi:
En in, ka sawlchâk la ma’n ka sawl ah,
ama chun la ma-âng in la lampi chu a la siamtup in ah, ti kha.
28Ka hil la hiu, numei suan lak in Baptispa Johan sâng ah jawlnei lopi zaw a um puai; himaleh, Pathian gam ah a neupenle ama sâng in a lopi zawu hi,” a tia.
29 #
Mat 21.32; Luk 3.12 (Ziaphatchun, a thu ngai zosiate leh sedawlte chun, Johan baptisma a la changsa a hiziak un, Pathian dikna chu a mu chian tau hi.
30Himaleh, Pharisaite leh dan he mite chun, ama baptisma chansak ding chu a nop lo ziak un, amau â ding ah Pathian lemguat chu a dawi puau hi.)
31Lalpa chun, “Tu’lai khangthakte hi kua tawh te’thei ding la hita diam uh? Bang gual mi la hiu em?
32Amau haw chu naupang kaithial mun ah kichu,
‘Lilu ka mût piak leh le la lâm puau in,
Pul ka do ua leh le lei kâpi diak puau hi’
ti ah ki-uau tua gual chu a hiu.
33Baptispa Johan a hung ah, vaithum a ne pua’n, uain le a dawn diak puai; Thitha jawl ahi, la tiu a.
34Mihing Chapa a hung ah, ne leh dawn in a um ah; En tiam un, gawlhatpa, uain haipa, sedawlte leh migilote gualpa saw, la tiu a.
35Ahi’nla, pilna chu a chate’n a dik zia a gen ui,” a tia.
Numei Gilo Ngaidamna
36Pharisaite lak ah mi pakhat in a In ah an ne dingin Jesu chu a chial ah; tichun, zia Pharisaipa In ah chun a lut ah, an ne dingin a kichu tai.
37 #
Mat 26.7; Mar 14.3; Joh 12.3 Pharisaipa In ah chun Jesu an ne um ding ahi ti a het ziakin, zia khua numei dukdaklo pakhat chu a hung ah, sathau alabastar bûk in a hun chawi a.
38A nung ah chun a kengbul ah kap kawm kawm in a ding ah, a mitthitui in a kengpêk chu a hi’top ah, a sam in a thiak ta’n. A kengpêk chu a chawp ah, zia sathau chu a nu’ tai.
39Anne ding ah chialpa Pharisai chun a mu phât in a lungthim in, “Zia mipa hi jawlnei hileh vang, a hung khoi numei hi bang gual mi a hem ti leh migilo ahi dan tak hi he ding hi ve’n!” a tia.
40Jesu chun a kiang in, “Simon, la kiang ah hin gen ding pakhat ka nei hi,” a tia. Ama chun, “Hotupa, gen ta’n la,” a tia.
41Ama chun, “Dangka thung hawm mi pakhat hin a dangka ba mi pani a nei in; pakhat chun denarii za nga a ba’n, pakhat chun denarii sawmnga ba ahi.
42Himaleh, a ditna ding a neilo phat un a paniu in a ngaidam ziang ta’n. Aleh, ei hil tiam in, a kua zawk chun a hepi zaw ta diam uh?” a tia.
43Simon chun, “A tam zaw a ngaidampa zawk chun hi’n ah ti ka gingchâi,” ti’n a dawnhu a. Ama’n a kiang in, “La gingcha dik ma ma hi,” a tia.
44Chuleh, numei lam chu a nga, “Zia numei hi la mu em? La In ah ka hung lut in keng silna ding tui lei pepua’n; himaleh, ama hin a mitthi tui in ka keng a sil ah, a sam in a thiak hi.
45Nang in lei chawp pua’n, ama hin vang ka hung lut ah kipat khan ka kengpêk chawp a hâi nai puai.
46Nang in ka luchangle sathau la nu’ puai; ama’n vang ka kengpêk sathau gimtui ei nu’piak hi.
47Ziaziakchun ka hil la hi, a gitlona tam tak chu ngaidam a hi tai; ama chun ei hepi ma ma ngal a. Kuale ngaidamna dong tawm chun hepinale a nei tawm ui,” a tia.
48Chuleh, numei kiang ah chun, “La gitlonate ngaidam ahi tai,” a tia.
49Himaleh, a kiang ah a an nêkpite chun amau kihona chun, “Gitlonate ngaidam ziang thei hi kua ahi dia aw!” a kitiu a.
50Chuleh, numei kiang ah chun, “La ginna hin a hun hukdam tai, thamuang tak in chia ta’n,” a ti tai.
Currently Selected:
LUKA 7: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.