NASEPTE 8
8
Saul in Kochuamte A Sukgentheina
1Zia ni chun, Jerusalem ah kochuamte chung in sukgentheina nasa tak a hung kipan ta’n, apostolte tilo ngal chu a leng un Judea leh Samaria gam pâmlam te tiang ah naw jak in a um tau a.
2Pathian ngaisak lawi khat chun, Stephen luang chu a vui un, ngai tak in a sûn tau hi.
3 #
Nas 22.4,5; 26.9-11 Ahi’n, Saul chu intin ah lut in; numei, pawsal hitaleh a kaidok ah, suangkul in a khum pek ah, kochuamte chu a sugenthei ma ma tai.
Philip in Samaria ah Chanchinpha Gen
4A taijakte chu mun tin in a chia tau a, thu chu a puang jak pek un.
5Philip chu Samaria khawpi’n a vachia suk ah, a kiang un Messiah thu chu a tângkopi ta’n.
6Philip thugen chu zia tak ah mipite chun kithu gual tak in a ngaithau ah, a thugente chu hia’n, a thilmak bawlte chu a muu a.
7Thitha buakte chule, aw ngai tak tak ah kiko jak in a lutnateu ah kipat chun a pawtdok ua; zeng tam takte leh kengbai tam takte le sukdam in a um un,
8zia khawpi chun kipakna nasa tak a tung tai.
9Himaleh, zia khawte lak ah chun mi pakhat a min Simon kiti a um a. Ama chun tu’ma sia mitvaidawi mang in Samaria mite chu a thêm sek a, milian tak gual in a kisiam a.
10“Zia pa hi Pathian thihitheina thupi tak chawi milian ahi,” a tiu ah, a lian a neu chun a la ngaisân ma ma sek uh a la hia.
11Zia gual ah chun hun sawt tak chu, a mitvaidawi chu mang in mi ngaisân tak in a la um a.
12Himaleh, Philip thugen, Jesu Khrista min leh Pathian gam thu a gente chu a hun gin phat un, a numei a pawsal in baptisma a chang chiat tau a.
13Zia Simon ngei chunle a hun ging ta’n; baptisma a hun chan phat in, Philip mang ah thilmak kibawlte leh tepte’na kibawlte chu ngaitua kawm in, a kiang ah chun a um zing in, mak a sa thei ma mau a.
14Jerusalem khua um sawlchâkte chun, Samaria gam ah mite chunle Pathian thu a hun awi tau hi ti a hun het phat un, a kiang un Peter leh Johan a hun sawl tau a.
15Amau chu a hung suk un, Thagau Thiangtho a chan theina ding un a hung pauchap piak ua.
16(Amau haw chu Lalpa Jesu min bep ah baptisma chang ahi nâklai ziak un, Thagau chu a chung un a tung kha naipua’n.)
17Tichun, a chung un a khut uh a ngau ah, Thagau Thiangtho chu a chang tau a.
18Simon chun, apostolte khut ngat ziakin Thagau Thiangtho piak in a um thei hi, ti a mu phât ah chun,
19“Keima’nle mi chung ah ka khut ka ngak ah, Thagau Thiangtho a nei theina ding un, zia thilhitheina chu keima le ei piau in,” ti’n dangka piak dingin a don a.
20Himaleh, Peter chun a kiang in, “La dangka tawh mangthai khawm ta’n, Pathian thilthawnpiak chu dangka sum ah chawk thaw ding la guat ziakin.
21Zia chung thu ah hin bangma chan nei pua’n la tin, pannale nei diak pua’n la; la lungthim chu Pathian mit mu’n a dik pawngal a.
22Ziaziakchun, zia la gitlona hi kisik inla, la lungthim ngaituana gilo hi a hun ngaidam thei khâk leh, Pathian kiang in pauchap ta’n.
23Ênna’n la dim ah, gitlona kol ah tâng la hi ti ka he ngal a,” a tia.
24Simon in, “La thil gen uh bangma ka chung ah a tun lona dingin, nang un Lalpa kiang in ei pauchap piak un,” a tia.
25Chun, amau chun Lalpa thu chu a hiatsak ua, a gen zaw phat ua chun Jerusalem khua a chia kit un; Samaria gam ah mite khua tam tak in chanchinpha a gen pek ui.
Philip leh Ethiopia Mitilge
26Ziaphatchun, Lalpa vansawlchâk pakhat hin Philip kiang in, “Kipan in la, gamkeu ah lampi, Jerusalem ah kipat Gaza lam zotna simlam zuan ah kithung kha zui in,” a ti’n.
27Tichun a kipan ah, a chia ah; zia lampi chun, Ethiopia lengnu Kandaki nuai ah nasem mi lal tak khat, Ethiopia mi kiget, lengnu vaihawmna a go zosia enkolpa chu, Jerusalem ah Pathian ho ding ah hung,
28a kile’kit lam ahi’n, a kângtalai chung ah chuang in jawlnei Isai lekhabu a hun sim malam pek a.
29Thagau in Philip kiang ah chun, “Chia inla, a kângtalai ah sawn nang le vachuang in,” a ti’n.
30Philip le kin tak in a tai to ah, jawlnei Isai lekhabu a sim chu a hia’n, a kiang in, “La lekha sim chu a thu umzia la hethiam em?” a ti’n.
31Ama chun, “Mi ei hilchian piak umlo in bangti’n hethiam thei ding ka hem?” a tia. Tichun, Philip chu a kiang ah chuang dingin a ko a.
32 #
Isa 53.7,8 Pathian lekha thu a simna chu zia hi ahi’n:
“Ama chu belam gual ah tha ding ah pui in a um in;
belamno a mulmêtpa ma’ a thip hiat hiat gual in,
ama’nle a kam a ka puai.
33Musit ah a um lai in a chung ah thu dik chu pom ahi puai.
A suan khanggui thu kua a hem gen ta ding?
Khawvel ah kipat in a hinna a lâkpiak tangal un,” ti hi.
34Mi kigetpa chun Philip kiang in, “Zia tak ah jawlnei in a gen hi kua a genna a hem? Ama leh ama kigen ahi diam? Ahiloleh midang a genna ahi diam?” a ti’n.
35Ziaphatchun Philip in, zia Lekha thu ah kipat chun Jesu chanchin chu a hun gen ta.
36A kiton pek lai ua chun lui pakhat a tung ua, mi kigetpa chun, “Entia, zia tak ah hin tui a um hi, baptisma ka channa ding bang ei dâl a um em?” a hun ti’n.
37Ziaphatchun, Philip in, “La lunggil zosia’ la gin leh chang thei inla,” a tia. Chun, ama chun a hun dawnhu a, “Jesu Khrista chu Pathian Chapa ahi, ti ka ging hi,” a tia.
38Tichun, a kângtalai chu a cholsak ah; Philip leh mi kigetpa chu a paniu in tui umna chun a chiau a; Philip in ama chu a baptis tai.
39Lui ah kipat a hung pawtdaw phat un, Lalpa Thagau chun Philip chu a lamang ta’n, zia mi kigetpa chun ama chu a mu ta puai; chuleh, ama chu kipak tak in a chia kit tai.
40Himaleh, Philip chu Azota khua mu in a um kit a; khawpi chuam chuam in thu a gen vêl vêl ah, Kaisaria tiang in a hung pek hi.
Currently Selected:
NASEPTE 8: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
