NASEPTE 17

Thessalonika Khaw sung Buaina

1Amphipoli leh Apolonia khua haw malam ah chia pek in, Thessalonika khua a tung ua; zia chun Judate sunagog khat a um a.

2Paul chun a hi’dan ngai gual in a lut ngal a, sabbath ni thumvei amau tawh Pathian Lekha thu ah kinial in a um un,

3Messiah chun gentheina thuak ah, thina ah kipat thodok ding him a hi’dan chu gunchu tak in a suidawpi ah, a hilchian pek a; “Zia Jesu, a chanchin la kiang ua ka gen hi Messiah chu ahi ngei hi,” ti’n a hil a.

4A lak ua khenkhatte chun a ging un, Paul leh Sila chu a zui tau a; ziate lak ah chun Grik mi kipezo tak takte leh numei lak ah mala thei ngenle tam tak a pang ui.

5Himaleh, Judate lak ah a taksang lo pawlte chu itsikna’n a dim tau ah, khawlai ah mi vak mai maite leh, mi a mu tapoteu chu a kaikhawm ua, khawpi sung chu a subuai tau a. Paul leh Sila chu mat ah vantâng lak ah puidaw gua’ a hawlna lam un, Jason In chu a buluu tau a.

6A mu zaw lo phat un Jason leh gingtu khenkhatte chu khua sung vaihawmte kiang in a kai lut ua, a kiko ua, “Khawvel subuaite kha zia hinle a hung ui:

7Zia Jason hin a la tunsak a. Amau haw hi Lengpa, Kaisar vaihawmna dan botsia a hiu a, ‘Leng dang pakhat Jesu kiti a um hi,’ a tiu a,” ti’n a kiko pek ua.

8Zia thute chu a hun het phat un, mipi zosia leh khua sung vaihawmte’n le a hun buaipi tau a;

9Jason leh a dang dangte kipat chun a thasâng ua hên ding thil khat a lau ah, a thâdok tau hi.

Beroea Khua ah Paul leh Sila Nasepna

10Unaute chun Paul leh Sila chu a jan a jan in Beroea lam ah a sawl tau ah; zia tak chu a tun phat un Judate sunagog in a lut ngal tau a.

11Zia ah Juda mite chu Thessalonika mite sâng in a lungthim uh a kihong zaw’n, thu chu thanuam tak in a lop un, a thugenteu chu a dik leh diklo hetna dingin, nisi’n Pathian lekha thu’n a sui sek un.

12Mi tam tak in a ging tau a; Grik numei ja umte leh pawsal tam tak in le a ging tau hi.

13Himaleh, Thessalonika khua Judate lawi khan Beroea ah le Paul in Pathian thu a gen hi ti a het phat un, zia lam tiang ah chunle a hung pek ua, mipi chu a hung tîlsiau a.

14Ziaphatchun, unaute’n Paul chu tuipi lam in a sawl ngal tau a; Sila leh Timothi chu vang zia chun a umzing tau hi.

15Tichun, Paul vathakte chun Athen khua chan in a vathak tung tau a; Sila leh Timothi chun kin tak ah amau hun del kit ziang ding ah a vaithâk ziakin, a kile’kit pai tau hi.

Athen Khua Paul Nasepna

16Paul chun Athen khua amau a la ngâk sung in zia khawpi chu milim ah dim ahi dan a mudaw ziakin a dâ ma ma a.

17Ziaziakchun, sunagog ah chun Judate leh sakhaw mi deu deute chu tawh a kinial sek un, kaithial lai inle nisi’n leh a kituakna mun mun un a kinialpi sek un.

18Epikuria mi leh Stoik mite lak ah mithiam khenkhat inle a hung kinialpiu a. A kim khat in, “Zia mi kamtampa hin bang a hem a gennop?” a tiu a; a dangte chun Jesu leh thawkitna thu a gen ziak ah chun, “Gamdang pathiante thu genpa hi’n a,” a tiu a.

19Tichun, Areopaga ah chun a pui ua, a kiang in, “Zia thugin thak la gen sek hi ka hethei diam uh?

20Ka het ngailo uh la thugen hi mak ka sau in, zia thil umdan hi het ka nuam ui,” a tiu a.

21Athen khua mite zosia leh gam dang mi a chêngdente chu, thuthak him him gen leh ngaithâkna bep in a hun uh a mang sek ui.

22Paul chu Areopaga mazawn tak ah chun a ding a, Nang haw, Athen khua mite haw, bangkim ah sa’khawmi tak la hiu ti ka hia’i.

23Khawpi sung ah ka vâk vêl vêl in, la ho leh biak danteu hi ka mu ta’n, mâichâm pakhat ah chun lekha kizik, “Hetlo Pathian Kiang Ah,” kiti ka mu hen. Zia hetlo ah la biak uh chanchin chu ahi ka hun hiatsak nop.

24 # 1 Le 8.27; Isa 42.5; Nas 7.48 Zia Pathian chu khawvel Siampa leh a sung ah um zosia Siampa, lei leh van Lalpa, tempul khut ah kisate ah hin a chêng pua’n;

25ama chu thil tâksap nei gual in mihing khut ah zen lum let ngai le ahi puai; ama chun thithei zosia kiang ah hinna, hiattheina leh thil zosia a piak ahi zawi.

26Lei chung zosia ah um dingin suanpa pakhat ah kipat in namtin ah mite a siam ah, amau â dingin hun bîte a guat piak ah, a umnau gamgî le a khen piak a;

27tichun, Pathian chu a hawl ua, a kimai ua, a hun mudaw theina ding un; ama chu eimau ah kipat gamla lo cha ah um zing ahi ngal a.

28Ama ah chun hing in I tawi un, I khawsau ahi, ti leh; la La phuakteu pakhat inle,

Eihaw hile a suanteu I hiu,

tia a gen gual ah khan.

29Pathian suante I hiziak un, Pathian chu sana a hem, dangka a hem, suang a hem, mihing khutthiam ah bawl kawm thil a hem gual ah I ngai ding uh ahi puai.

30Pathian in I mawllai hunteu ah ei ngaithiam ah; ahi’n la, tu’hin gamtin ah mi zosia chu lunghei dingin thu a pia ta ahi;

31ama’n ni a tep ziakin, ziaphat chuleh, a mi guat chu lei ah mite dik tak in vaihawm piak in a, Pathian in ama chu mithi lak ah kipat kaitho in, mi zosia kiang ah a hiatsak tai, a tia.

32Mithite thawkitna thu a gen khâk phat ah chun, khenkhat chun a nuisan un; midangte chun, “Zia gual thu chu ngaithâk kit ka nuam ui,” a tiu a.

33Himaleh, Paul chu amau lak ah kipat chun a pawtdok tai.

34Ahi’n, a lak ua khenkhatte chun a thu gen chu a hun zawm un, a ging tau a, ziate lak ah chun Areopaga mi, Dionisia leh numei pakhat a min Damaris tawh, midang khenkhat le a hiu hi.

Currently Selected:

NASEPTE 17: VAIPBSI

Highlight

Copy