NASEPTE 12
12
Jakob Tha ah Um; Peter in Suangkul Ngak
1Zia ban ah chun, Lengpa Herod in kochuamte lak ah kuate a hem hi’genthei gua’n a hung kipan a.
2Johan suapi Jakob kha le chemjam in a that ta’n.
3Zia gual ah a bawl chun Judate a kipaksak hi ti a het phat in, Peter chule mat a gua kit ngen a. (Zia chu Thawipanglo Kût hun lai a hin.)
4 #
Pdt 12.1-27
A mat nung in suangkul in a khum ah, a ngâk dingin sepai pawl li, pali chiat in a kisânsak ah, Chiakân Kût zaw phat leh mipi mai ah puidaw a guat ahi.
5Peter chu suangkul ah a um lai in, kochuamte’n ama â dingin phatchuamngai tak in Pathian kiang in a la pauchap piak tau a.
Peter Suangkul ah Kipat Hukdawna
6Herod in puidaw a guat jan tak ah chun, Peter chu sepai pani kikâl in thikkhau pani but in a ipmu; a vêngte chunle kotkhak bul ah chun, suangkul chu a vêng un.
7Lalpa vansawlchâk pakhat a kiang in a hung lut ah, suangkul sung chu a hung salvâk tai. Peter pangche a hun bêng ah, “Tho vak in,” a tia. Chuleh, a kihênna khaute chu a khut ah kipat in a kitham tai.
8Vansawlchâk chun a kiang in, “La kawng gâk inla, la kengtawdap but in,” a tia. Zia gual ah chun a bawl tai. Chuleh, a kiang in, “La puan sil inla ei zui in,” a ti kit a.
9Peter chu a pawt ah, a zui ta’n; vansawlchâk tawidan chu a tak ahi ti a hepua’n, kilâkna a mu hizaw dingin a ngaitua a.
10Tuatil pen leh a ban ah a vêngte chu a khêl nung un khawpi sung lam lutna thik kotkhak bul chu a tung tau a. Kotkhak chu amau â dingin a la kihong kawm in a la um ah; a pawt ua, khua sung lamlian khat a zui un, vansawlchâk chun a nusia tai.
11Peter chu a hung pil phatin, “Lalpa‘n a vansawlchâk a hun sawl ah, Herod khut leh Juda mite kinepna zosia ah kipat ei hukdok ahi ti tu’hin dik tak in ka he tai,” a tia.
12Chutia, a kingaitua zaw ah chun, Johan Marka a tiu, a nu Mari In ah chun a vachia ah; zia tak ah chun pauchap in mi tam tak a la um khawm ua.
13Peter in sumkûl kotkhak a hun kiu phatin, Rhoda kiti nungak pakhat a dawnhu dingin a vachia a.
14Peter aw chu a het phat in, kipak talua’n kotkhak chule hong lo in, a tailut kit ah, Peter kotkhak bul in a ding hi, ti’n a vagen a.
15Himaleh, amau chun, “A ngol la hita maw!” a tiu a. Ama chun, “Ahi tak tak hi,” a tia, a pang tei tei a. Chuleh, amau chun, “A vansawlchâk ahi chu,” a tiu a.
16Zia hun sung chun Peter chun kot chu a kiu zing ah; kot a hon phat un, ama chu a mu tau ah, mak a sa ma ma ziang ua.
17Ama chun a thipna ding un a khut a jap ah, Lalpa‘n suangkul ah kipat a hung puidaw dan chu kichian tak in a hil a. Ziazaw chun, “Chiau in la, zia thilte hi Jakob leh unau dangte kiang in vahil un,” a tia. Tichun, a pawtdok ah, mundang in a chia mang tai.
18Khua a hung vak phatin Peter khoi ah bangti a tam, ti ngaitua in sepaite chu buai namai in a buai ta puau a.
19Herod in a hawl phat in a mu ta him him pua’n, a ngâkte chu a dawpchian ah, tha dingin thu a pia tai. Peter chu Judea gam ah kipat Kaisaria khua’n a chia suk ah, zia chun a um den tai.
Herod Thina
20Zia hun lai ah chun, Tura leh Sidon mite chung in Herod chu a lungna ma ma a. Tichun, kithutuak tak in a kiang in a hung un; Blasta, lal In ah vaihawm pakhat chu a hun ho lungdam masau ah, kichamna thu a hung gen tau ah; amau chu zia lal gam neipa gam ah kipat chu nêk leh châk hung la sek ahi ngal un.
21Tichun, a nitiam niu ah chun, Herod chu a lal puan ah kithuam in, a lalchutpha’n a kichu ta’n, a kiang un thu a hun gen a.
22Mi zosia chun, “Pathian aw ahi, mihing aw ahipuai,” ti in a hung kiko tau a.
23Ziaphatchun, ama’n Pathian kiang ah lopina a piak lo ziakin, Lalpa vansawlchâk in phutlo in a gawt ah, gûlkût in a ne, a thi tai.
24Ahi’n, Pathian thu chun ma a sawn jel ah, gingtu le a hung pung deu deu tau hi.
25Barnaba leh Saul chun a nasep ding siau a hun sukbutin phat un, Jerusalem ah kipat in Johan, Marka kiti kha tawh kiton in a hung kile’kit tau hi.
Currently Selected:
NASEPTE 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
