RŪT 3
3
Kôtökūö Rūt Tö Pīhöre
1Ngaich ök kikānö yöng pīhö ò ang Naōmī nö ngö ṙô tö ò, Kakūönö uh öichu chöh chūök haneūheu meh, hòṅ meh lēnen? 2Yĕh röh öp Pō-as nö mak alaha hī öp tö tarīku tö yip kikānö hol meh taheui? Yĕh meuk sōngnyö ṙòng pālrī öp i ngih hatööm nö el patī chūök pinṙōngö ṙòng. 3Vōk man lökten hachāmöre tö tavī-i, hayutlöre më-eṅ inrē, kiröönngöre ngaich chuh ip chūök pīnṙōngö ṙòng el patī; uh pömchö mikah tölōn öp tarik töre, hanöng saha kinheūtökūö ò nö nyā òk inrē. 4Ngaich mīnö hē ò nö ṙōlngöre, ngaich më-eṅ hakamngö öp chūök ò nö ṙōlngöre, kuhēthötre ngaich më-eṅ, fehlö röön ò, ṙōlngöre ngaich më-eṅ el patī; ngaich min anga-aṅ nö vë-eny nang meh töp inlahen meh. 5Ngaich ngö ṙô anga-aṅ tö ò, Hōḵ chin i nup töng ṙô meh tö chu.
6Kiröönngöre ngaich anga-aṅ nö chuh ik chūök pinṙōngö ṙòng el patī, ngaich nöng asā inlēnöre tök kikānö yöng pīhöre. 7Hē Pō-as nö keuheūtökūö nö nyā òk inrē, ṙāmö ellōn anga-aṅ ngaich kiröönngöre ngaich nö ṙōlngöre i manā-angkūö ök töfônghak ṙòng pārlī: hiṙeūttöre ngaich anga-aṅ nö yihtöre, fehlö kunröön ò ngaich, ṙōlngöre ngaich nö el patī. 8Ngaich ik chūöl hatööm, ngam tarik nö pa-ekūö, havöölö kūöre ngaich: ngaich yĕh meuk, hĕng tak ök kikānö i röön ò nö hulalhaka. 9Achīöm më-eṅ ngö ṙô anga-aṅ? Ngaich ngö ṙô anga-aṅ nö sap ṙô ò, Rūt chin chū-ö tarik meh kikānö: lökten man yĕh hanyāknyö ngam kinfanre i kui ngòh kikānö tarik meh; tön töröhta man më-eṅ mak alaha chu. 10Ngaich ngö ṙô anga-aṅ, Kūön chu kikānö, tökôlò man yēḵ im Mā Tēv: pōyen hameukti man tö neūkölōn ing lā unôich töre ik raneh, pò meh öt tömrit ṙālö tarik yāich hēk tökòlò. 11Kūön chu kikānö, yĕh ngaich, um pa-ekūö; ngaich chin min kētöre in nup ṙô meh: pòn ṙòkhöre vē tarik aṅ ngam elpanam nö akahalōn tö meh kikānö tölöökö inlahen. 12Ngaich an nö kô-en tö chu öich töröhta mak alaha meh: hĕng tak öp pöri mak alaha meh tömötlö ranöhta tö chu. 13Ngöh man ing hatööm ngaich ip peuheū min, yē ò nö hōḵ nö kē la-en mak alaha nö in meh; ngaich löök; hökngen ò nö la-en töl-en mak alaha: yē ò pöri min nö sōḵ nö la-en töla-en mak alaha nö in meh, ngaich min chū-ö tö la-en tö la-en mak alaha in meh, sā ngam Mā Tēv nö tö-aṅ: ṙōlngöre man hanöng saha öp peuheū.
14Ṙōlngöre ngaich anga-aṅ nö iröön ò nö söllö peuheū: choholre ngaich anga-aṅ urēhĕkūö tarik nö akahakūö. Pòn ngö ṙô anga-aṅ, Un akahaiṙen pöngchö tö kikānö nö yih nö el patī chūök pinṙōngö ṙòng. 15Ngaich ngö ṙô anga-aṅ, Kētö ngam vanönre man ngam in meh, ṙapkö e; ṙapkö e ngaich anga-aṅ: tafūöl nyanum kalah ngaich anga-aṅ tö pārli, hakeunlen ò ngaich tö e: kiröönngöre ngaich anga-aṅ nö chuh elpanam. 16Ngaich hē ò nö taichta nö ik kikānö yöng pīhöre, ngö ṙô anga-aṅ, Kūön chu kikānö, sitih lāinyngen öm? Ngaich anga-aṅ nö ve-eny nang ò tö nuk tī ök tarik tö ò. 17Ngö ṙô anga-aṅ, Tafūöl nyānum ön ngih pārlī kine-eṅkūö chu tö ò; pòn ngö ṙô anga-aṅ, Un kiröönngöre nö öt kūmu ip kikānö yöng pīhö meh. 18Ngö ṙô ngaich anga-aṅ, Ūichngöre, më-eṅ kikānö kūön chu, hanöng saha meh akahalōn töp lāinyngen e min: tön öthō ap min tarik nöng ngöh, hanöng saha kinheūten ò tö e ing sakāmö.
Currently Selected:
RŪT 3: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.