RŪT 1
1
Kū-ö Tö Môāp Ang Elimelek Tö Yik Mikūönö Ò
1Ngaich hē nuk sakāmö yik kamhôka nö hayöng, hē ök inyāichö im panam. Hĕng taka ök tarik aṅ Petlihem Yūtā kumröönngöre nö iyöng ip panam Mô-āp, anga-aṅ, tök pīhö ò inrē, nët tak nak kikōnyö kūön ò inrē. 2Elimelek minënyö ök tarik, Na-ōmī minënyö ök pīhö ò, Mahalòn, Chīlīön inrē, minënyö nak tönët tak kūön ò kikōnyö, aṅ Efrata i Pethlihem Yūtā. Yih cha-a nö ip panam Mô-āp, ngaich in e nö höngngöh. 3Kapah ngaich Elimelek ök pīhö Na-ōmī; ṙā-ayö ngaich Na-ōmī tö nak tönët tak kūön ò kikōnyö. 4Kē pīhöre cha-a ngaich tö kikānö aṅ Mô-āp; Òrpā, minënyö ök hĕng tak, Rūt, minënyö; ök tahëng tak: ngaich lohten cha-a nö söm samyeūheu nö iyöng umuh. 5Nëtre taka cha-a inrē nö kapah, nā Mahlòn nā Chilīön; ngaich ngam kikānö nö ṙā-ai tö nak tönët tak kūön ò tök pīhö ò inrē.
Havan Petlihem Ang Naōmi Nāṅ Rūt
6Hōklöre ngaich anga-aṅ holtö nak kankūönre, nö ṙā-ang panam Mô-āp nö hòṅ havan: pò ò nö i panam Mô-āp nö hang ngam Mā Tēv nö chöhken yip tarikre nö kētö nyā-aṅkūö cha. 7Kiröönngöre ngaich anga-aṅ nö ṙā-ang ik chūökre sin, nö holtö nak tönët tak kankūön ò; kiröönngöre cha-a nö el talöökö nö havan nö i panam Yūtā. 8Ngaich Na-ōmī nö ngö ṙô tö nak kankūönre, Kuṙòh, kö havan nan i patī yöngre tö kikānö. Aṙē-ĕlōn an yēḵ ngam Mā Tēv nö in nāṅ, sā tī nāṅ i tökapah, in chu inrē. 9Kē-ĕti an yēḵ ngam Mā Tēv nö in nāṅ hòṅ nāṅ kôtökūö tö haneūheu, an kö i patī pīhöre. Hāmkūö cha ngaich anga-aṅ; pōitô cha-a ngaich nö peuiny. 10Ngö ṙô cha-a tö ò. Hö-ö, hòṅ havan an in meh i yip tarik meh. 11Ngaich ngö ṙô Na-ōmī, Kūön chu kikānö, havöökūöre nan hēk: kūöyòh an hòṅ kiröönngöre in chu? Ōtre aṅ el chūök kanūönö ṙöng öich tö nyīö kikōnyö, hòṅ cha nö pīhö nāṅ? 12Kūön chu kikānö, havantöre nan hēk, kuṙòh kiröönngöre; tön ngaich chin köiny öt ṙētö töpīhövö. Yē chu öre ngö ṙô kūönu chin tölōnre, yē chu pīhövö öre i ngih hatööm, ngaich kūön tö kikōnyö öre inrē; 13Ngaich hòng nā-aṅ öre lökten hökkö sanīöplö cha? Ngaich kô-òren hòng nā-aṅ ngöh an öt pīhövö sin? Kūön chu kikānö, hö-ö; pò chu kiröngö miṙīvlōn tö pòkūö nāṅ, pò ngam kël ngam Mā Tēv nö ngaich nö lā-al chu. 14Kaknyöre cha-a ngaich nö pōitô, ngaich hēk nö peuiny: hāmkūö ök yöng pīhöre ngaich ang Òrpā, haköpngöre pöri Rūt nö in ò.
15Ngaich ngö ṙô anga-aṅ, Yĕh meuk ngaich ök holṙông meh nö havantöre nö in yip tarikre, ip tēvre inrē: havan man më-eṅ sā ök holṙông meh. 16Ngaich Rūt nö ngö ṙô, Uh chin līptuṙen ṙāngen meh, öich hōtu havan ṙā-ang i tinöömörit meh: hòṅ kiröönngöre chin, ip töng kū-ö meh; iyöng inrē, ip töng chūök meh iyöng: tarik chu min yip tarik meh, Tēv chu inrē ngam Tēv meh. 17Ip chūök meh kapah, in e min chū-ö kapah, ngaich umuh inrē öich lāpi: ngatī tī An yēḵ ngam Mā Tēv tö chu, hēk mötlö inrē, yĕn höng ngam kinpaha maharēvngen meh tö chu. 18Ngaich hē ò nö meūkan nö kalē-ĕlōn nö kiröönngöre nö in ò, ṙāngôre ngaich anga-aṅ nö vë-ekūö ò.
19Lökten cha nö ngaich nö kiröönngöre hanöng saha cha nö sölta nö i Pethlihem. Ngaich hē cha nö sölta nö i Pethlihem, ngaich ṙòkhöre yik aṅ ngam elpanam nö havantöre nö in cha ngö ṙô yik kikānö, Anga-aṅ ang Na-ōmī? 20Ngaich ngö ṙô anga-aṅ tö cha Uh chin havëka Naōmī, Māra, ngö ṙô pöri havëken chu: tön angū-öṅvö tī an ngam Tökeuheūttöre Chööngö nö in chu. 21Tööḵlö chin tök chanuhure, havanten chu hēk ngam Mā Tēv i patīre höng chalööpaṙen: kūöyòh öich Naōmī invëka tö yīö, yē ngam Mā Tēv nö hameuktö kumnyahṙen re nö in chu, hakihten chu inrē ngam Tökeuheūttöre Chöngö?
22Havan ngaich Naōmī, hol ò inrē Rūt ök aṅ Mô-āp, ök kankūön ò, mahavan nö ṙā-ang panam Mô-āp: yih cha-a nö i Petlihem i ranehtökūö inmūlö pārlī.
Currently Selected:
RŪT 1: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.