Salmai 69
69
Ayôkö Hinòlṙen
1Ō Tēv, hayööken chu: tön meuthöt nup mak nö el nômö chu.
2Lōngti chin el tö-aṙū-uti tilin, i chūök törö-ö sanökö: yih chin el tö-aṙū-uti mak, i chūök ngam tinṙēichlö nö pavngökui chu.
3Chei chin tö ṙô re peuiny; nyôp ön ngih kilööp chu nö ngaich: paṙūöyi mat chin ip hē re hökkö ngam Tēv chu.
4Pōyen yip tö keūyö elkui chu, yip töt chöönyu nö surīkhen chu: kalēḵ cha-a yip töhòṅ rökngen chu, yip tökunyaha-elmat tö chu, samūöcha; ngaich chū-ö havantö nup töt kahëre.
5Ō Tēv, akahalōn Man tö kumlō-ov chu: öt nyatngö nup tökööl chu inrē tö Meh.
6Uh yip yēḵ hamökken Meh nö sirōngkūö nö lökngö kūö chu, Ō Mā Tēv, yip tömaṙôngö: un miṙē-ĕyö nö lökngö kūö chu yip chamöhö Meh. Ō Tēv, Israĕl.
7Tön pòkūö meh chin öich keun sumrōngkūö: haṙungngökūö chu an ngam sumrōngkūö.
8Ngaich chin vītöre aṅ tahëng in yip hanöngkisānöre, aṅ tahëng öich in yip kūön öp yöng re kikānö.
9Pò ngam kumlēḵ lōn chu tö ngam patī Meh nö kēnyen chu: ngam minṙēngö tī cha yip mumṙēngen Meh nö fuk kui chu.
10Hē chu peuiny, ngaich hachök ngih nômö re tö inhikö: angū-ö an minṙēngö chu.
11Hē chu vī sāk nö inyut re: ngaich vītöre öich minnôn cha.
12Ṙôten chu chā-a yip amūichhak nö i kūö inkūp: tinkökö mihiyōi chin inrē.
13Nup ṙô chu pöri vë-ekūö Meh nöng löö in Meh, Ō Mā Tēv, ip ṙētak töhō-ov: Ō Tēv, i ṙôkö miṙēlōn Meh, sap ṙô chu i kanô-en ngam aṅ in Meh inyööken.
14Ṙānyen chu ṙā-ang el ngam tilin, uh chin halöngtenvö lōngti: hökngen chu ṙānyuvö ṙā-ang in cha yip tö sumrīk tö chu, ṙā-ang el minë tö aṙū mak inrē.
15Uich hökiṙen öt kô tö tinṙēichlö ngam mak, un rēhĕn nö hökiṙen ngam tö-aṙū nö ngeūkten chu: un tiköptökūöre inrē ngam anūlö nö i kui chu.
16Ō Mā, sapṙô chu; tön tölöök an ngam hanāngen neūkölōn Meh: sā ṙôken nup miṙēlōn Meh havöötökūöre in chu.
17Um hanyatngökūö re tö ngòh kūön re: tön el kanihngen chin, hēṙen sapṙô chu.
18Haröhtöre im nômö chu, ṙānyen e inrē: havaha chu, tön kumnyah elmat chin.
19Akahalōn Man tö miṙē-ĕv chu, sumrōngkūö chu inrē, minṙēngö chu inrē: ṙòkhöre yin vē lā-al chu nöng i kūö chu.
20Lakūkötī öp minṙēngö nö ellōn chu; tööḵngen chin tö lumngan: ngëichkö öp tö-aṙē-ĕlōn chin, öt hĕng tak pöri mahaṙamlōn inrē, öt hĕng tak mahaṙamlōn kanôtö kūö chu.
21Kē-ĕvkūö chin tö cha tö tö-angūṅöv nö nya-aṅkūö chu: i inṙëhe nômö chu, kē-ĕkūö chu cha-a tö töhikīölhu vain nö òk.
22Hökngen ap mīs i kūö cha, nö nūöt cha: ngaich hē cha nö i lanāmö, hökngen e nö tinngöp cha.
23Hökngen nup mat cha nö sanglköti: vīten nup ṙat cha nö iruhen nö kichëyöre.
24Vōknyö öp lanīnöre Man i kui cha: hökngen ap tanānyö Meh nö kô-òl nö in cha.
25Hökngen ap elyöngö cha nö ahātiyö: un hĕngtit tak aṅ nup inrūkui cha.
26Tön öt hakôlò Ò yin ngam töchök tö tī meh: ngaich cha-a nö ve-eny chanökö ò, öp töhanyahka tö meh.
27Ṙūöten öt lanöökö nö i öt lanöökö cha: un höktu cha-a nö yih nö im ötlanöökö Meh.
28Hökngen cha nö sīchiyö nö i mat līpöre nômö: un kūchö nö hol yip tölöök.
29Yāich pöri chū-ö halöinyöre inrē: Ō Tēv, hökngen öp inyööken aṅ i Meh nö asöklen chu lātulöng.
30Ha-öiny ngam Tēv chin min tö tinkökö: hapōilen Ò chin min hol tö nöinyö.
31In e min ngam Mā nö ṙāmölōn, mötlö töre nö i kōiny nuā: tö kōiny nuā tö sinrōlu, kinsôsu kunröön inrē.
32Meūkö e yip töyāchö ellōn, ngaich ṙāmölōn: yī-ö chamöh ngam Tēv, aṅ ap yēḵ ellōn yīö.
33Pò ngam Mā nö hang ṙô tö-iyāich: mikūöṙen tö tökē-ĕ tö Ò.
34Hökngen ngam halīöngö, tumlat inrē, nö ha-öinyö Ò: minë mai tö nup mahalöinyköre aṅ u.
35Pò ngam Tēv min nö hayööken Siyòn, vīlö nup el pinnāmen Yūtā inrē: in e cha-a min nö iyöng ngaich minööngö cha angū-ö.
36Aminten tö e öp kūön yip kūön ò min: ngaich acha-a yip töhangenlōn tö ngam minë-eny Meh, iyöng el e min.
Currently Selected:
Salmai 69: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
