Salmai 44
44
Ṙô Linaklö
1Ō Tēv, hang nun në elnang ih, vënyu nang in tö yik muvöhngö ih: tö nuk sakāmö cha, hē nuk sakāmö misī.
2Aṅtī tö ngam kël re man misī ahōngö yik pumnāmö tarik, ngaich teūichten cha ël e: hakihten më tarik më-eṅ, ngaich pirātngen cha.
3Pò cha nö öt teūngen töm panam nö aṅtī tö minë fëlre, öt rēhĕn nuk kël cha nö hayöölen cha: tön ngam lahāmö kël meh, ngam takeun kël meh, ngam hanātö ngam arëkūö meh inrē, pò meh öm lā in cha lōn.
4Ō Tēv, më-eṅ man Rācha chu: chöngu man yēḵ tö ṙinānyö Yāköp.
5Lökten in meh in min kuring tö yip lā-alre: lökten i minë-eny meh in min röönten cha yip chamôhòlre nö lā-al ih.
6Pò chu öt hayönglenre im linrenyre: ötrēhĕn ngam fël chu min nö hayöölen chu.
7Më-eṅ pöri mahayöölen ih ṙā-ang in yip lā-al ih: ngaich sumrōngngökūö cha yip tö-sumrīk tö ih.
8Im Tēv in eū-eure i rôta në sakāmö: ngaich ha-öiny ngam minë-eny ò min ör-heūheu.
9Ngaich pöri më-eṅ töngamuh pehngen ih, kētu inrē tö meh i minṙēngö: öt in ih inrē më-eṅ kiyung.
10Vīten ih më-eṅ ngaich hapungtö ukre tö yip lā-alre: ngaich cha-a yip tösumrīk tö ih nö pôten ih.
11Kē-ĕyö in tö meh sā sīṅp tökā-a: ngaich inrē pirāti i vē pumnāmö tarik.
12Inyihngö vē tarikre man nöng öt ṙāyu: ngaich öt ṙūölö kanôlò re tö ṙāi cha.
13Minṙēngö in ngaich tö tī meh i vē holre: minôn, nāich-ngen inrē in cha yip mahavīlen ih.
14Vītu in tö meh ngaich kūöngô vē pumnāmö tarik: kinchinykūöre i vē tarik.
15I rôta në sakāmö ngam minṙē-ngö chu nö i kūö chu: ngam sinrōngkūö chu inrē nö hanyatten chu.
16Kūö ṙô ò ngam mumṙēngen chu ngam tötlamëkôre inrē: kūö ngam lā-al chu, ngam mahavahalvah inrē.
17Ṙòkhöre nun nö teunghö kui ih; hö-ö pöri īhö vaichngö tö meh: hö-ö in rēhĕn michūṙen im kinlēḵngô meh.
18Öt havanritre an ngam ellōn ih öt rēhĕn në vanāngö ih nö kānngöre töm talöökö meh;
19Pòrô me-eṅ ngaich pumlāmö ih i chūök chākal: am aṅ el inchōn kahul tö kui ih inrē tö nyat kinpaha.
20Yē ih vaichngö tö minë-eny ngam Tēv ih: hēk yē ih tarāklö këlre i tahëng tēv;
21Röh ang ngam Tēv min nö chöhö e? pò ò nö akahalōn tö töhayunka ellōn.
22Hòṅ, pòkūö meh in fëli irôta në sakāmö: kaheuktu in sā sīṅp töṙatnyu likeun.
23Ō Mā, hōklöre! Kūöyòh öm höng haṙòh? Chōholre, ui urāḵngen pëheyö tö meh.
24Kūöyòh öm hayunngö kūöre? Ngaich vaichngö tö kanihngen ih, tinṙāmö ih inrē?
25Pò në nômö ih nö yapūtköti nö el tumlat: tanti në aich ih inrē nö el tumlat.
26Chōholre holṙen ih: ṙānyen ih lökten im hanāngen neū-kölōn meh.
Currently Selected:
Salmai 44: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
