Salmai 135
135
Tinkökö Nöinyö
1Ha-öiny ngam Mā Tēv yin, Ha-öiny ngam mine-eny ngam Mā Tēv: ha-öinyan, Ō yī-ö tarik ngam Mā Tēv.
2Yī-ö samökhaka el patī ngam Mā Tēv: el milūkö ngam patī ngam Mā Tēv hī.
3Ha-öiny ngam Mā Tēv yin; tön tölöök An ngam Mā Tēv: tiköknyö nöinyö ngam mine-eny Ò: tön angū-ö an tö vai.
4Pò ngam Mā Tēv nö atöllen Yāköp nö tarik Ò: Israĕl inrē nö tarik Ò.
5Pò chu akahalōn tö ngam Mā Tēv nö tökiröng: tö ngam Mā Tēv hī tö tulöng tö taṙòkhöre tēv.
6Öp tölöök lōn ngam Mā Tēv, ngaich angū-ö tī Ò: el halīöngö, el tumlat, el mai, el ngam tö-aṙū inrē.
7Vītö nup hanusngö anga-aṅ nö yônlö löklö manā-angkūö ngam tumlat: vī hanyālö ngam kumrah Anga-aṅ; kētö kuföt Anga-aṅ nö ṙā-ang öp chūök re.
8Ngam tö kapaha tī tö yik lanòh i Aikup: tarik, hĕnghöre töṙeūla inrē.
9Tīntö minkahngö Anga-aṅ, pinngangkūö inrē, nö in Meh, Ō Aikup: in Fërō, in yik tarik ò inrē nö ṙòkhöre.
10Ngam famòhtö kui pumnāmö tarik: tö kiröng rācha inrē;
11Sihòn rācha yik aṅ Pāsan: ṙòkhöre inrē pūlngö aṅ Kanā-an.
12Ngaich kētö öp panam cha nö amin: nö amin Israĕl öp tarik Ò.
13Ō Mā Tēv, köp an ngam mine-eny meh nö örheūheu: Ō Mā Tēv, inköpkölōn tö Meh i tumkölchap.
14Pò ngam Mā Tēv min nö akah fālen vē tarik re: ngaich havöörit lōn re min nö i vē tarik re.
15Rupīö, humlum nun në insā tēv vē pumnāmö tarik: vahīṙen kuntī tarik.
16Elvāngu nun, öt meuk pöri: mātu nun, öt meuk pöri;
17Nāngu nun, öt hang pöri: öt rēhĕn nö unhômu nö elvāng re.
18Höng sā u yip cha-a, yip vamī-i u: hôṅ, ṙòkhöre yip mahayönglenre nö in u.
19Ō yī-ö aṅ patī Israĕl, hakôlò ngam Mā Tēv: Ō yī-ö aṅ patī Āròn, hakôlò ngam Mā Tēv.
20Ō yī-ö aṅ patī Lēvi, hakôlò ngam Mā Tēv: yī-ö tö pa-ekūö tö ngam Mā Tēv, hakôlò ngam Mā Tēv.
21Tökôlò An yēḵ ngam Mā Tēv nö i Siyôn: ngam mi-iyöng Yērusalem. Ha-öiny ngam Mā Tēv.
Currently Selected:
Salmai 135: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
