Salmai 132
132
Nöinyö Ngam Töhet Chūök
1Mā Tēv, köpölōn tö Tāvit: i nuk kanihngen;
2Tö Ò nö kilēḵngôre nö im Mā Tēv: chūökuṙô inrē nö im Tökeuheūttöre Chöngö Tēv Yāköp.
3Öt hòṅ kuhēthötre chin min el inrūkui re: öt rēhĕn chuh el chamam re.
4Öt halöngten në mat re chin nö haṙòh, öt leūmlö inrē;
5Hanööngen chu kôtökūö min tö chūök ngam Mā Tēv: ap inrūkui ngam Tökeuheūttöre Chöngö Tēv Yāköp.
6Yĕh meuk, hāngö e in i Efrata: kôtökūö tö e nö el inchōnngö.
7Chuh el minë inrūkui Ò in min: sōntöre in min ip ranöönö röön Ò.
8Choholre, Ō Mā Tēv, im chūök haneūheu meh: Me-eṅ, tap kasòng chöngö kumlēḵ Meh.
9Hökngen yip kūönṙô Meh nö hayūtö tö lanöökö: hökngen yip töhet Meh nö pōitô nö hū-a tö kūö ṙanāmölōn.
10Pòkūö ngam kūön Meh Tāvit: un havööṙikūö ngam rācha Meh.
11Chūöku ṙô An ngam Mā Tēv, nö in Tāvit nö kilēḵngô re; öt hō min nö heūlköre tö e: ha-ūichlö ngam kūön Meh chin min el ngam kantēra Meh.
12Yē yip kūön Meh min, nö haköp ngam kinlēḵngô chu ngam chöngö chu inrē, öp inköptö cha tö chu min: ūichhak min yip kūön cha nö örheūheu nö el ap kantēra Meh.
13Pò ngam Mā Tēv nö atöllen Siyôn: ahō-o Ò an nö elyöngö Ò.
14Chūök haneūheu chu ön ngih nö örheūheu: ihih chin iyöng; pò e nö lōn chu.
15Ṙūölö ṙôken nup nya-aṅkūö chin min öich hakôlò ò: hatööḵngen yip yāich chin min tö nya-aṅkūö.
16Hayut yip kūönṙô Ò chin min tö inyööken: ngaich yip töhet Ò min, pōitô nö hū-a nö rāmölōn.
17In e chū-ö min vīten ngam sinrōl Tāvit nö meuiny: halēn ëāṅvö ngam Rācha re chin min.
18Hayutlö yip lā-al Ò chin min tö sumrōngkūö: i kui Ò pöri min ap sapīöv tökôlò.
Currently Selected:
Salmai 132: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
