Isayā 59
59
Pehngö Nup Ötlanöökö Tarik Ngam Prôfĕt
1Yĕh meuk, öt cheūḵngöre rôta kël an ngam Mā Tēv, töp lökten e nö ötkô nö hayööken, hēk öt filngö elnang, töp lökten nö ötkô nö hang:
2Nup tökööl yīö pöri tököhngen tī tö hôi yīö tö ngam Tēv yī-ö inrē, hanyatngö kūö ò inrē nup tökööl yīö tö yīö, lökten an nö öt hang.
3Pò minë eltī meh nö chōich tökūö mahām, minë kuntī meh inrē tökūö öt lanöökö; ṙô-òvö mine minug inrē tö minyôiny-aṅ kakkö öt lanöökö inrē ngam litāk meh.
4Öt hĕng tak töchiplen nö i kinṙòkkö fālen, öt hĕng tak töt michūṙen nö chuh im chöngö: hayönglenre yin i töng kaṙū-aṙôre, ṙô-òv yin nö minyôiny-aṅ, halēn ellōn re yin tö tötlöök ngaich kēnyö öt lanöökö.
5Ruknyö kūö uhöö pēch yin, kupāt haveūngö kilrööngö yin inrē: ngaich kapah öp kamā uhöö u ngaich löknyö ël ngam tölakukköiny kūö nö ruknyi kūö öp pēch.
6Hö-ö nup haveūngö u nö kanfantenkūö min nö hilā, öt rēhĕn nö kafānöre min yip tarik tö nup kupāt cha. Öt lanöökö nup nö la-en cha, chanökhuṙen tī inrē nö eltī cha.
7Fal nup röön cha nö kū-ötö ngam tötlöök, ka-eūyen cha-a inrē nö kitaknyö mahām tötakhaṙa: lōn ötlanöökö nup lōn cha, inhatngö tinṙōlngö inrē nup el talöökö cha.
8Rö-ö yin nö akahakūö tö talöökö tölām, öt el talöökö cha inrē ngam kinṙôka cha inrē ngam kinṙôka tötmichūṙen: vī talöököre yin nö kuròk; ngaich yip töng lamök umuh nö öt akahakūö tö lanāmö.
Vë-eny Tökööl Re Më Tarik
9Lökten an ngam kinṙôka töt michūṙen nö marôvat tö hī, ngam lanöökö inrē nö ötkôlö nö in hī; ngëichkö hanātö ayī-ö, yĕh meuk, ngaich nöng sinngūlö; ngëichö töyang ayī-ö, ngaich pöri öi höng lök ël sinngūlö.
10Ṙēpkö kaha kinlōngö in sā tötmeuk, ṙēpa inrē sā töng ötmātu: kavē-ĕre in i ranònglö ngam tavūöi sā hē ranaklö ò; ngaich in cha ayī-ö yip tökalēḵ alaha öi höng sā tarik tökapah.
11Ayôṙa ṙô in sā ṙô për, sā ṙô nyö-öṅ inrē öi haṙīvölōn ngëichkö inkaha fālen in, hö-övö pöri nö umuh; ngëichkö inyööken in, marôvat pöri angū-ö tö hī.
12Pòn ṙūölöre ṙôken në tanôichngen ih nö i kūö meh nö tökööl ih inrē nö hameuktöre nö lā-al ih; pò në tanôichngen ih nöng in ih, akahalōn in tö në kanöölöre:
13Mahngö ngam Mā Tēv in i në tanôichngenre, ngaich havööngökūöre i tinömörit ngam Tēv ih, kahôkkö inkihten in inhôngö chöngö inrē, löknyö ellōn nup minyôiny-aṅ ṙô nö chöhlöng löklö, ngaich kaknyuvö nö ṙô.
14Havööri kūö an ngam tötmichūṙen kinṙôka, sökhak inrē ngam lanöökö nö marôvat: pò ngam kanô-en nö fukngö nö el talöökö, ngaich ngam chaniplen nö ötkô nö kuhēthötre.
15Hôṅ, hāṅten an ngam kanô-en; ngaich anga-aṅ ngam kumröönngöre nö ṙā-ang im tötlöök nö vītöre nö pôḵ:
Halēnkö Ṙinānyö Më Tarik Re Ngam Tēv
Meūkö e ngaich ngam Mā Tēv, kunyāhalōn ngaich tö pòn öt kinṙôkavö töt michūṙen umuh.
16Meuk törö-övö anga-aṅ tarik, ngaich pingangkūö tö törö-övö vamë-elkui: ngaich ap kël ò nö kētö minhôiṅyö ò, öp lanöökö ò inrē nö haköpka nö in ò.
17Hayutlöre anga-aṅ tö lanöökö nö lanak elngòh ò, i kui ò inrē nö sapīöv ngam inyööken; hayutlöre anga-aṅ tö tökiröng inyut nö invahal vah, kahūmöre inrē tö kinṙum nö i tanānyöre.
18Sā nuk la-en cha ngatī tī min anga-aṅ nö kē-ĕti, lanīnö in yip lā-al ò inṙënhanga in yip tökunyāha elmat tö ò; kētö invahal min anga-aṅ nö i nup kun panam.
19Lökten cha min nö löktökūö lā sūng nö pa-ekūö tö minë-eny ngam Mā Tēv, löktökūö lā maneutlö ngam tavūöi öp kanôlò ò: pòn yih min anga-aṅ sā töpôpnyi töhëm mak töföönyuvö tö ngam kuföt ngam Mā Tēv.
20Ngaich yih min anga-aṅ nö i Sīyôn nö sā ṙamānyö, nö in cha yip mahavööngökūöre in Yāköp tö öt lanöökö ṙô ngam Mā Tēv.
21In chu pöri, ngih ön kinlēḵngô chu in cha, Ṙô ngam Mā Tēv: öp töhet fanöinylö chu öp mī-ikui meh, nup ṙô chu inrē töchaphötvö nö elvāng meh tö chu, hö-ö min nö meutnyi nö ṙā-ang elvāng meh, ṙā-ang elvāng yip kūön meh hēk ṙā-ang elvāng yip kūön yip kūön meh, ṙô ngam Mā Tēv, löktökūö ngih hē höng örheūheu.
Currently Selected:
Isayā 59: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
