Isayā 3
3
Öt Lanënö Nö I Yeruselem
1Yĕh meuk, pò ngam Mā, ngam Mā Tēv yip tömaṙôngö, nö kēngö ngam inköp nö ṙā-ang Yērusalem Yūtā inrē, keuheūtngöre ngam inköp nyā-aṅkūö, keuheūtngöre inrē ngam inköp mak;
2Öp tökalēḵ tarik, öp tarik kumyung inrē; öp ma-akah fālen pròfĕt inrē, chamòng alaha, mā misī inrē;
3Öp yöngkūö tö taneui anāi, tö-akaha tarik, mahalēn inrē, öp tömilichngen inrē tömilūönö, öp töhuveū-en inrē mahachū.
4Ngaich chū-ö min kētö nyīö nö mākūö cha, tënö nyīö inrē nö mahayöngö cha.
5Ngaich hakihtuṙen min yip tarik, kö hakihtuṙen inrē tö holre: ngaich min ngam tököiny, ngam yāich inrē nö im tökôlò.
6Yē öp tarik min nö kētö tīre nö ip mëm re kikōnyö nö el patī öp yöng re kikōnyö, nö ngö ṙô, Inyūtu man me-eṅ; hayöngö hī man yĕh, hökngen ngih töpayāyi nö eltī meh:
7Ip sakāmö angū-ö anga-aṅ min nö pōitô, nö ngö ṙô, Hö-ö chin chū-ö hòṅ mahalinken tövahavö; pò chu öt aṅhaṅv patī rēhĕn tö nyā-aṅkūö öt rēhĕn inyut: uh yin pöchö vīlen chu mahayöng vē tarik.
8Pò Yērusalem nö payāyi, fukngö inrē Yūtā: kūö ngam litāk cha ngam vahīṙen cha inrē nö lā-al ngam Mā Tēv, nö harunnyö mat ngam kanôlò ò.
9Hameuktö arëkūöre cha-a nö inmeuktö e nö lā-al cha; ve-eny tökööl re cha-a sā Sôtöm, hö-ö cha-a nö hayunngö e. Tökôklò an yēḵ ngam nômö cha? Pò cha nöng kahngenre nö reushöre tö öt lanöökö.
10Ngö ṙô yin tö ngam tölöök, tö e min nö lööken nö in ò: pò cha min nö nyā ṙòng nup la-en re.
11Tötkôlò an yēḵ ngam tötlöök! ötlööken an min nö in ò: pò nup raneushö tī min nö kētu nö in ò.
12Vē tarik chu pöri, hakihtuṙen tö yip nyīö, ngaich kikānö min mahayöngö cha, Ō yī-ö tarik chu, lō-ongkūö tī yin tö meh më mahachōkūö meh, ngaich yin nö pasū-utī tö ngam töng kanröönö talöökö meh.
Akah Fālen Tarik Re Ngam Tēv
13Söklöre an ngam Mā Tēv nö hòṅ hāngö ṙô, söklöre inrē nö akah fālen vē tarik.
14Kuhēthötre an min ngam Mā Tēv nö im inkaha fālen nö holtö yip mā vē tarik ò, tö yip kūön rācha inrē umuh: yī-ö yin tökeūheūt nyāngö ap panô-òṅ vāin; el patī yīö nuk tökīlö tö yīö nö i yāich:
15Asuh öng angū-ö kinrāchngö yik tarik chu, kinröichngö kūö yip yāich inrē? Ṙô ngam Mā ngam Mā Tēv yip tömaṙôngö.
16Hēkngö ṙô inrē ngam Mā Tēv, Kūö yip kikānö kūön Sīyôn nö ngë-eṅkūö, kiröönngöre cha-a nö hakeh likeun re chilī matre inrē, kiröönngöre uṙākūöre inrē, nö kiröönngöre, ngaich piring kalröön re.
Mikahlöng Lōn Yip Kikānö I Yeruselem
17Lökten an min ngam Mā nö hachök aṅtī tap vah tömôlnyi nö el chalòng kui yip kikānö aṅ Sīyôn, ngaich min ngam Mā Tēv nö lingānyö nup töhayūni alaha cha.
18Ip sakāmö angū-ö ngam Mā min nö kēngö nup tövai mörkul cha, tö nup tösā mat inhāṅl, nup tösā vanônö chingëṅt inrē; 19Tö nup kinlöl kūö aneūmö, sayōk inrē, tö inyul kuntī inrē: 20Tö yanöṅtö keūyö, sayōk kël inrē, tövöntu hilā, kasòng chūök tötahūsa inrē, kane-engkūö tötlöök inrē: 21Kinlong, inlök elmeh inrē; 22Inyut el tökiröng sakāmö, kinṙum, vanön likeun inyul inrē; 23Tinmël kūö tökiṙapka, tövai linen hilā, vanön kui, kinṙulkui inrē.
24Ngaich ngö inlahen angū-ö min, nö ṙënngen nup tötahūsa min öp chinhūngö; ṙënngen öp nyanëkṙat min öp pisik tölöinyö; ṙënngen öp tövai keūyö min öp nganānyö kui; ṙënngen öp nyanëk aich öp sāk min nö vöntu; ṙënngen öp vanāyö tarik öp töfönghötvö minkahngö alaha.
25Fukngö yip min tarik meh tökūö sanët, yip tökalēḵ kūö meh inrē nö fukngö nö i kinyūngö.
26Ngaich nup inkūp ò min nö haṙivlōn nö harāmöre; öt aṅhaṅvkūö min ngaich anga-aṅ höng ūichhakṙen nö el tumlat.
Currently Selected:
Isayā 3: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
