INLAHEN 16

Holröön Nā Pôl Nāṅ Sāiles Ang Timôtī

1Yihtöre ngaich anga-aṅ nö i Törpī, Listra inrē. Ngaich hĕng tak ök mahaköp umuh, Timòti ök minë-eny ò; Yahūti ök kikānö yöng ò. 2Tö-eūka tök māṅ i Listra, Ikôniöm inrē. 3Ngaich hòṅ ngôṅ an Pôl nö holre; kēḵ an ngaich anga-aṅ nö tunyinyngen ò, kūö yik Yahūti mu-umuh; pòn ṙòkhöre cha-a nö akahalōn tök yöng ò kikōnyö nö tahëng mihëṅrö. 4Ngaich hē cha nö kiröönngöre nö lök i nup panam, ngaich cha-a nö nö kē-ĕkūö cha, tök hachöngten yik tanīnöṙô, yik mā inrē i Yerūsalem. 5Ngaich nuk māṅ nö ngëḵ nö im mikah; öt hĕng hang sumkam ṙanūölö ṙôngö.

Hameukhumat Ang Pôl Nö I Trôas

6Lök i nup chīṙö Pruki cha-a, Kalatī inrē; pòn tahayö tö ngam töhet Fanöinylö nö ṙô-òv tö ngam ṙô nö i Asi. 7Ngaich hē cha nö yih nö i Musi; ngaich hòṅ kalah cha-a nö chuh Pitunī; ngaich pöri ngam Fanöinylö aṅ in Yēsū nö öt halöngten cha. 8Chööḵngö Musi cha-a, ngaich yihtöre nö i Trô-as. 9Ngaich meūkö tö Pôl tö hatööm, nö i heūvö, ök hĕng tak tarik aṅ Maketònī, samökhaka; vame-eṅkūö ò, nö ngö ṙô, Ta-ih, yihtöre i Maketòni; hayööken ih. 10Keuheūthëmat anga-aṅ nö meuk nö im heūvö, ilööṙen ngaich īhö hòṅ chuh Maketòni; ngaich tö lōn ih, ngam Tēv nö havëken ih, ahangken cha tö ngam tölöök inhānga.

Invöötö Ellōn Litīa Nö I Filipī

11Hatēhĕre īhö ngaich, ṙā-ang Trô-as, hachipkūöre ku-ötö Samòtrakī; ngaich im huṙöich īhö i Neapòli. 12Ngaich ṙā-ang umuh, öi chuh Filippī, ök tökiröng panam nö umuh i Maketònī, tö iyöngö tö aṅ Rōma. Rĕh tum sumkam īhö höngngöh im panam. 13Ngaich hē el töhet sakāmö ihö kunyī-inyre, lā-uk kinlōngö, i kui ap tahël, i chūök ök chūök vine-eṅkūötēv, tö lōn ih. Ūichngöre ihö ngaich, ngaich ve-ekūö yik kikānö mahamūl yanihihre. 14Ngaich hĕng tak ök kikānö, Litiā ök mine-eny ò, mī-inyihkö tö pōi ṙāi tö huṙing hilā, aṅ ap panam Tuatirā, mahayönglenre nö im Tēv, hamāngö ih; ök tö löpnyukūö ellōn tö ngam Mā, nö hangihtöre tö ṙô Pôl. 15Ngaich hē ò nö vōkö, tö yik aṅ patī ò inrē; ngaich ve-ekūö ih anga-aṅ, nö ngö ṙô, Yē chu öich ngaich tökô-en i ngam Mā Tēv, tö lōn yīö; ta-a, yih yin i patī chu, öi höngngöh. Ngaich līpten ih anga-aṅ.

Hakövö Nö I Filipī

16Ngaich hē ih chuh ip chūök vine-eṅkūötēv, ngaich hĕng taka ök kikānö mahalanṙen, tömilūönö, mameukkūö ih. Pōyen kanôlò tī anga-aṅ tö yik yöngṙenre, nö lökten i vine-eny mu-unôich. 17Anga-aṅ tamömkörit ih, īhö Pôl; ngaich hūḵa, nö ngö ṙô, Mahalanṙen ngam Lamātulöng Tēv, yin vē tarik; ma-ahangken yīö tö ngam talöökö inyööken. 18Ṙōl sumkam anga-aṅ nö ngatī; ngaich pöri ang Pôl nö uhā-en, havöölökūöre ngaich anga-aṅ, ngaich ngö ṙô tök sī-ö, Tölṙô meh chin, i Mine-eny Yēsū Kristū, öm meutnyi ṙā-ang in ò. Ngaich iṙūö meutnyi anga-aṅ hē e. 19Ngaich hē yik yöngṙen ò nö akahalōn tö chanuhngen kanôlòre min; ngaich cha-a nö kē-ĕ nā Sailes nāṅ Pôl; ngaich tūökten cha nö elpanam, i kūö yik mahayöng. 20Ngaich hē kinëtö cha nö i yik kamhôṅka; ngaich ngö ṙô cha-a, Yahūti nan nāṅ tarik, töpōyen tī nö hakihten ngih panam. 21Vītö fālen nan tö kô nö kahëḵ ih, öt rēhĕn nö haköpö, pò ih aṅ Rōma. 22Choholre yik tömaṙôngö nö lā-al cha; ngaich nak yöngṙen nö chilulngö kinṙum cha; ngaich hōten cha nö nyahaṅ tö chōn nö fōhoh. 23Ngaich hē cha nö keuheūtö tī nö fōhoh cha nö ṙōl höt; ngaich kalonghöt cha nö el kinlōngö. Tölṙô ök yōm kinlōngö nö haköpngen cha, 24Ngaich hē ò nö ngatī tinöölô, kalonghöt cha ngaich anga-aṅ nö latuhēt takô; ngaich halökngö kalröön cha tö chōn,

25Ngaich im chūöl hatööm nā Pôl nāṅ Sailes nö ve-ekūötēv, tikökṙôre inrē; hang ṙô cha yik tökē-ĕ. 26Ngaich nönglūk ök yöng kumyeūnö; ngaich kalöka röönti ök kinlōngö, ngaich löpnyörekūö nuk inkūp, ngaich aluh köṅny nuk nyanëk cha nö ṙòkhöre. 27Ngaich ök yōm kinlōngö nö rötlö nö mahaṙòh, ngaich meuk nuk inkūp ök kinlōngö nö luve-akkūö, hōknyö sanëtre ngaich anga-aṅ, nö hòṅ fëlngöre, pò yik tökē-ĕ nö meutnyöre, tö lōn ò. 28Pōitô pöri Pôl nö hūḵa, nö ngö ṙô. Uh man chökhu tī töre; ṙòkhöre in ihih. 29Ngaich havëtö ëāṅvö anga-aṅ, tisòkhötre ngaich nö lātuhĕt, kichëyöre, pòn pa-ekūö. Afukngöre nö i kūö nā Pôl, nāṅ Sailes; 30Ngaich kēḵnyen cha, ngaich ngö ṙô, Mā! Asuh ap la-en chu, hòṅ chu hayöökaṙen?

31Ngaich ngö ṙô cha-a, Ṙātö ellōnre im Mā Yēsū; ngaich hayöökaṙen min me-eṅ, yip aṅ patī meh inrē. 32Ngaich cha-a nö ṙô tö ṙô ngam Mā Tēv nö in ò, i yik aṅ patī ò inrē nö ṙòkhöre. 33Ngaich hē e anga-aṅ nö ngô-òṅ cha, im hatööm; söichlökūö nuk nyāhaṅ cha ngaich. Ngaich iṙūö vōkö anga-aṅ; ṙòkhöre inrē yik aṅ patī ò. 34Ngôṅten cha ngaich anga-aṅ nö i patīre, ngaich ha-aṅlen cha; ngaich pōi ṙanāmölōn, pò cha nö ṙòkhöre nö ngaich nö ṙātö ellōnre nö im Tēv, tö yik aṅ patī ò.

35Ngaich hē e nö peuheū, ngaich nak yöngṙen nö tīnngö tösökhaka, nö ngö ṙô, Luhlö nap tarik ngaich. 36Ngaich ök yōm kinlōngö nö ve-eny minë ṙô nö in Pôl; nö ngö ṙô, Tīntö ṙô nap yöngṙen nö hōten nāṅ ngaich luhlöngö. Lökten nan ngaich kunyī-inyrel kumchikngenre an kiröönngöre.

37Ngö ṙô pöri Pôl tö cha, Hangāṅlnyö tīre nap yih nö fōhoh ai, öt kahòkkaṙen, ai aṅ Rōma ai tarik; ngaich kalonghöt ai el kinlōngö; ngaich hòng töngamuh cha-a nö ulāikenre nö luhnyen ai? Höng rö-ö; hökten cha nö hakôtenre nö yih, nö ngôṅnyen ai.

38Ngaich yik tösökhaka nö ve-eny minë ṙô nö i nak yöngṙen; pa-ekūö cha-a ngaich, hē cha nö hāngö cha nö aṅ Rōma. 39Yihtöre cha-a ngaich nö ve-ekūö cha; ngaich hē cha nö ngaich nö ngôṅnyen cha, hōten cha ngaich nö kiröönngöre, nö ṙā-ang ap panam. 40Kunyī-inyre cha-a, nö ṙā-ang el kinlōngö; ngaich yihtöre nö i patī Litiā, Ngaich hē cha nö meuk yik holre, ngaich ṙūhöl alaha cha, ngaich kiröönngöre.

Currently Selected:

INLAHEN 16: CANIBSI

Highlight

Copy