ZEKARIA 2
2
Athatpektsün Auo Atsangshei
1Amao atsangshei tsak ko ngü khaiunia tsak apa pha nai athatpektsün auo semkü ep. 2Nungaih ngü sangh, “Ni tiai khuji?”
Apaüh thalakü ngiom, “Ngü Yirusalem atheng atham titithatso noin ta thatluau thaiutha khuji.”
3Nungaih ngüko chitetsün hong nou kha ai shiküta apa ko amao hong tsak nou tü ngiom, 4Chong nou amao tsak nou tü ngiom, “Yirusalem nai pe petaiu au tsüshiokü khaiunia naiuso thainian piakü noi-e ta nungh athatpektsün auo semkü noitsün oum nou hau jingkü khukü lüchite. 5Nung noknio lemkü solouau in pe tsakli Apaou apa pem the-e naiuso nungko Apaou apa ajinka apem nouko kih-e”
Thaloukü Khuwantsünso Yashiau Jonji
6-7 Apaou nou apa khaiuniaso tü ngiom, “Ngü asam apem nai pengpun-i. Lüko lo, asam thaloukü khuwantsünso, Babilon ainou lükhushi, küta Yirusalem nai laokü ashi. 8Ajantsoüh nitü shiuhtsün nungh jü thaiutha thatü chaiouting nou tü shiuhji.”
Nungtiphe Apaou Akongting nou apa khaiunia kamhetsün mele nouso hau nung ngiongem kiuau ngü hong. 9“Apaou pem asam tü khengshikü ehli tsalou-e, naiuso ataojam asam yathsüokü shitsünsoüh asam kamhean-e.”
Tilai nung thawao-e Apaou Akongting nou ngü hongkü noin ta khaiunia pungkü nou nge-e.
10 Apaou nou ngiom, “Yirusalem khaiuniaso, amongling thaiutha jih lühang! Tiautenai ngü asam ongko kih au shiji!”
11Nungh taoko mele piakü Apaou dongai shi-e, naiuso apa khaiunia au iula-e. Apa asam ongko noi-e, nungaih asamüh ngü asam dongai apaüh hong ta nge-e. 12Loühjam Yihuda nung apa asio goh nai Apaou ün amothi tengkam noi-e, naiuso Yirusalem nung apem chiko apaüh tsüojintsün noknio noi-e.
13Khaiunia pungkü Apaou khako nyankü anoi, tititenai apa asio anoithang ainou shiji.
Currently Selected:
ZEKARIA 2: KHIABSI
Highlight
Copy
Compare
Share
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
