Zakari 8
8
Promes Restorasyon Zerizalenm
1SENYER liniver ti koz avek mwan. I ti dir:
2La sa ki SENYER liniver i deklare:
Mon annan en gran lanmour pour Zerizalenm.
En lanmour zalou ki brile
parey en dife.
3La sa ki SENYER i deklare:
Mon pou retourn Siyon.
Mon pou reste ankor dan milye Zerizalenm.
Zerizalenm pou ganny apele Lavil Fidelite.
Montanny SENYER liniver
pou ganny apele Montanny Sakre.
4La sa ki SENYER liniver i deklare:
Bann vye, zonm koman fanm,
pou vin asiz ankor dan bann plas piblik dan Zerizalenm.
Sakenn pou annan son baton dan lanmen, akoz son gran laz.
5En kantite garson ek fiy pou zwe dan bann semen lavil.
6La sa ki SENYER liniver i deklare:
Si i paret enposib pour restan lepep, dan sa lepok,
eski i devret enposib osi pour mwan?
SENYER liniver ki deklare.
7La sa ki SENYER liniver i deklare:
Mon pou sov mon pep
ki dan bann pei Les
e dan bann pei Was.
8Mon pou fer zot retourn dan Zerizalenm.
Zot pou vin mon pep
e mon pou zot Bondye
ki fidel e zis.
9La sa ki SENYER liniver i deklare:
Pran kouraz, zot ki ozordi
pe antann sa bann parol
ki bann profet ti prononse
zour kan fondasyon tanp SENYER liniver, ti ganny poze.
10Akoz avan sa letan,
travay zonm pa ti ganny peye,
ni travay zannimo akoz lennmi,
personn pa ti kapab deplase an sekirite.
Annefe, mon ti'n mont tou bann et imen, enn kont lot.
11La sa ki SENYER liniver i deklare:
Me aprezan, mon pa pou tret restan sa pep
parey mon ti fer dan letan pase.
12Annefe, mon pou senm lape;
bann plantasyon rezen pou donn bon rekolt,
later pou donn rekolt,
lesyel pou donn lapli.
Tousala, mon pou donn restan sa pep
pour posesyon.
13Parey tribi Zida ek tribi Izrael
ti anmenn malediksyon
parmi bann nasyon,
mon pou sov zot
e zot pou anmenn benediksyon.
Pa per! Pran kouraz!
14La sa ki SENYER liniver i deklare:
Parey mon ti'n deside detri zot
kan zot bann zanset ti provok mon lakoler,
mon pa'n sanz mon desizyon,
SENYER liniver i deklare:
15Aprezan, mon'n sanz mon desizyon;
mon'n deside fer dibyen Zerizalenm
ek tribi Zida. Pa bezwen per.
16La sa ki zot devre fer:
Koz laverite avek ou prosen;
devan tribinal, rann bann zizman korek.
17La sa ki SENYER i deklare:
Pa mazin fer dimal ou prosen dan ou leker.
Pa soutir dimoun ki fer fo serman;
mon deteste tel keksoz.
Konsernan Zenn
18SENYER liniver ti koz avek mwan. I ti dir mwan:
19La sa ki SENYER liniver i deklare:
Zenn ki ou fer dan katriyenm mwan,
zenn ki ou fer dan senkyenm mwan,
zenn ki ou fer dan setyenm mwan
e zenn ou fer dan dizyenm mwan,
pou vin pour tribi Zida bann zour lazwa, rezouisans ek lafet.
Alor, kontan laverite ek lape.
20La sa ki SENYER liniver i deklare:
Bann pep ek bann zabitan
sorti dan bokou gran lavil
pou retourn ankor.
21Zabitan en lavil pou al
dan en lot lavil kot zot pou dir:
Vini! Annou esey kalme SENYER
e esey rod SENYER liniver!
Zot ti reponn:
Nou osi, nou pe vini!
22En kantite pep ek en kantite nasyon pwisan
pou vin rod SENYER liniver dan Zerizalenm;
zot pou vin esey kalme SENYER.
23La sa ki SENYER liniver i deklare:
Dan sa bann letan, dis etranze
ki koz diferan langaz,
pou vin anpandan avek en Zwif.
Zot pou atrap son lenz e dir li:
Nou oule vin avek ou,
nou'n tande ki Bondye i avek ou.
Currently Selected:
Zakari 8: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
