Nonm 5
5
Dimoun ki dan Leta Enpir
1SENYER ti dir Moiz: 2Donn lord pep Izrael e dir zot ki zot devre met an deor kan, tou bann dimoun ki ganny en maladi ki parey lalep, bann ki annan en desarz e tou bann ki'n vin enpir par kontak avek dimoun mor. 3Fer sorti tou zonm oubyen fanm; met zot an deor kan pour zot pa kontamin kan kot mon pe reste parmi zot.
4Alor, bann Izraelit ti fer sorti tou sa bann dimoun an deor kan. Lepep ti fer parey SENYER ti'n dir Moiz.
Reparasyon Domaz
5SENYER ti koz avek Moiz: 6Dir kominote Izrael: En zonm oubyen en fanm ki fer ditor son prosen i koupab devan SENYER i koupab. 7I devre konfes sa pese e repar domaz an azoutan en senkyenm son valer e donn sa dimoun ki i'n fer ditor.
8Si sa viktim napa okenn fanmir pour resevwar sa domaz, sa lobze ava al pour SENYER. Pret ava resevwar sa lobze ansanm avek sa mouton ki i pou ofer pour pardon son pese. 9Tou bann lofrann ek bann keksoz sen ki kominote Izrael i anmenn kot pret i pour li. 10Bann keksoz sakre ki dimoun i donn pret i pour li.
Ka bann Fanm avek Mari Zalou
11SENYER ti dir Moiz: 12Dir pep Izrael: Si en fanm marye i tronp son mari, 13si en lot zonm ki pa son mari i annan rapor seksyel avek li e sa i pas dan sekre, san ki son mari i konnen; si napa temwen akoz personn pa'n war li dan aksyon; 14si en lespri zalouzi i pran sa zonm akoz i annan soupson ki son fanm in dezonor son lekor; oubyen si en lespri zalouzi i pran sa zonm e i soupsonn son fanm me, son fanm pa'n dezonor son lekor; 15alor sa zonm ava anmenn son fanm kot pret. I ava anmenn lofrann neseser pour son fanm: 2.5 kilo lafarin lorz. I pa bezwen vid delwil e met lansan avek, akoz i en lofrann vezetal, en lofrann zalouzi pour denons en fot.
16Pret ava fer sa fanm aprose e prezant li devan SENYER. 17Pret ava pran delo sakre dan en bol an seramik. I ava pran lapousyer ki ater dan sanktyer e met dan sa delo.
18Pret ava fer sa fanm prezant li devan SENYER. I ava delarg son seve e met dan son lanmen lofrann vezetal ki i'n anmennen, akoz zalouzi son mari. Sa pret ava tenir dan son lanmen sa delo anmer ki donn malediksyon. 19I ava fer sa fanm fer en serman. I ava dir li: Si okenn zonm pa'n dormi avek ou e ki ou pa'n tronp ou mari pour fer sa ki mal e dezonor ou prop lekor, sa delo pou napa okenn lefe advers lo ou. 20Me si ou'n fer sa ki mal e ou'n avek en lot zonm apar ou mari, si ou'n dezonor ou lekor e ki en lot zonm in annan rapor seksyel avek ou, 21SENYER ava fer ou vin parey sa ki i dir dan sa serman parmi ou kominote. Ou de kwis pou deperi e ou vant pou gonfle. 22Sa delo ki donn malediksyon ava desann dan ou vant e fer li anfle e ou pou deperi. Sa fanm ava reponn: Amenn! Amenn!
23Apre, sa pret ava ekri sa bann malediksyon dan en liv e answit lav dan sa delo anmer. 24I ava fer sa fanm bwar sa delo anmer ki donn malediksyon. Sa delo anmer ki donn malediksyon ava penetre dan li e fer li santi douler. 25Pret ava pran sa lofrann dan lanmen sa fanm e depoz li lo lotel devan SENYER. 26Answit, pret ava pran en ponnyen lafarin dan sa lofrann, bril li lo lotel e apre fer sa fanm bwar sa delo.
27Apre ki pret in fer li bwar sa delo, la sa ki pou arive: Si i koupab e ki i'n tronp son mari, sa delo ki donn malediksyon pou penetre dan li e donn li douler; son vant pou gonfle e son kwis pou deperi. Sa fanm pou vin parey in dir dan son serman. I ava vin en legzanp malediksyon parmi son pep. 28Me si sa fanm pa'n dezonor son lekor e ki i pir, i ava ganny deklare inosan e i ava kapab fer zanfan.
29Sa i lalwa lo bann ka zalouzi ler en fanm ki anba lotorite son mari i dezonor son lekor; 30oubyen ler en zonm zalou i soupsonn son fanm: Son mari ava fer son fanm konparet devan SENYER. Pret ava aplik lo li tou sa ki lalwa i dir. 31Alor, sa zonm ava lib, me sa fanm ava anmenn konsekans son pese.
Currently Selected:
Nonm 5: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
