Nonm 19
19
Lasann Bef Rouz
1SENYER ti dir Moiz ek Aaron: 2Sa i lalwa ki SENYER ti donnen: Dir pep Izrael anmenn devan ou en bef rouz ki napa okenn defo e ki pa ankor anmenn okenn fardo. 3Ou ava donn sa bef pret Eleazar. Zot ava anmenn li an deor kan, kot i ava ganny egorze dan prezans Eleazar. 4Pret Eleazar ava pran en pe son disan avek son ledwa e asperz set fwa dan direksyon lantre Latant Rankont SENYER. 5Answit, sa bef ava ganny brile antye devan li avek son lapo, son lavyann, son disan ek tou son zentesten. 6Pret ava pran dibwa sed, izop ek en riban rouz e zet tousala dan dife kot sa bef pe brile. 7Pret ava lav son lenz e pran en ben dan delo; apre, i ava antre dan kan. Me i pou reste enpir ziska aswar. 8Sa enn ki'n bril sa bef i ava osi lav son lenz e pran en ben dan delo; i pou reste enpir ziska aswar.
9En zonm ki pir, ava ranmas lasann sa bef e depoz li dan en landrwa pir, an deor kan. Pep Izrael ava servi sa lasann pour pirifye delo ki pou servi pour pirifikasyon. Sa i ava en sakrifis pour pardon pese. 10Sa zonm ki ranmas lasann sa bef ava osi lav son lenz; me i pou reste enpir ziska aswar.
Sa i en regleman pour tou zenerasyon pour touzour, menm pour bann etranze ki reste parmi zot.
Kontak avek Lekor Mor
11En dimoun ki tous nenport lekor mor, pou reste enpir pandan set zour. 12I pou bezwen pirifye li avek delo pirifikasyon lo trwazyenm zour e lo setyenm zour. Si i pa fer pirifikasyon lo trwazyenm zour, i pa pou pir lo setyenm zour.
13En dimoun ki tous en kadav e ki pa ganny pirifye, pou rann tanp SENYER enpir. I devret ganny met an deor kominote pep Izrael, akoz i pa'n vers delo pirifikasyon lo li. I pou reste dan son leta enpir.
14La en lot lalwa: Ler en dimoun i mor dan en latant, dimoun ki antre dan sa latant, pou vin enpir pandan set zour, parey sa bann ki ti dan sa latant. 15Tou bann resipyan ouver e ki napa en kouvertir sere lo la dan latant, pou osi vin enpir.
16Si en dimoun i dan laplenn e i tous lekor en zonm ki'n ganny touye oubyen ki'n mor en lanmor natirel, si i tous kadav en dimoun mor oubyen en latonm, i pou reste enpir pandan set zour. 17Pour pirifye li, zot ava pran lasann ki dan brazye sakrifis pour pese, met dan en resipyan e vers delo larivyer ladan. 18En dimoun ki pir, ava pran en brans izop, tranp li dan sa delo e fer aspersyon lo latant, lo tou bann resipyan, lo tou dimoun ki la, lo sa enn ki'n tous sa kadav, e osi swa lo sa zonm ki'n ganny touye, swa lo sa lekor mor, ou swa sa latonm.
19Lo trwazyenm zour e lo setyenm zour, sa enn ki pir ava fer laspersyon delo lo sa bann dimoun ki enpir. Zot pou ganny pirifye lo setyenm zour. Apre, i ava lav son lenz ek son lekor dan delo e aswar, i ava vin pir.
20Dimoun ki vin enpir e ki pa fer rityel pirifikasyon, pou ganny met deor kominote Izrael. Annefe, zot pou rann Latant SENYER enpir, akoz zot pa'n ganny asperze avek delo pirifikasyon; zot pou reste enpir.
21Sa lalwa i valab pour touzour. Sa dimoun ki pe fer aspersyon delo pirifikasyon ava lav son lenz. Alor, dimoun ki tous delo pirifikasyon pou vin enpir ziska aswar. 22Tou keksoz ki en dimoun enpir i touse pou vin enpir. Tou dimoun ki i touse pou vin enpir ziska aswar.
Currently Selected:
Nonm 19: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
