Lik 6
6
Lo Size Saba
(Mat 12.1-8; Mrk 2.23-28)
1En zour saba, Zezi ti pe travers dan bann plantasyon dible. Son bann disip ti kas detrwa zepi ki zot ti frot dan zot lanmen, e manz bann lagrenn#6.1 War Det 23.26.. 2Me detrwa Farizyen ti dir, “Akoz zot fer sa ki Lalwa i defann fer zour saba#6.2 War Egz 34.21.?”
3Zezi ti reponn zot, “Zanmen zot in deza lir sa ki David ek son bann zonm ti fer, kan zot ti lafen? 4David ti antre dan tanp Bondye; i ti pran dipen lofrann#6.4 War 1 Sam 21.2-7. ki i ti manze e partaz avek son bann zanmi ki ti avek li. I ti fer sa alor ki personn pa ti annan drwa manze, apard bann pret#6.4 War Lev 24.9..”
5Alor, Zezi ti dir zot, “Fis-de-Lonm i li menm met saba.”
Zezi I Geri En Zonm avek Lanmen Paralize
(Mat 12.9-14; Mrk 3.1-6)
6En lot zour saba, Zezi ti antre dan sinagog pour ansennyen. La, ti annan en zonm ki son lanmen drwat ti paralize. 7Bann profeser Lalwa ek bann Farizyen ti pe rod en rezon pour akiz Zezi. Alor, zot ti veye pour war si i ti pou geri dimoun zour saba. 8Me Zezi ki ti konn zot panse, ti dir avek sa zonm ki ti annan lanmen paralize, “Leve! Vin debout isi devan tou dimoun.”
Sa zonm ti leve e al debout devan. 9Zezi ti dir zot, “Les mwan demann zot: Eski Lalwa i permet fer dibyen zour saba oubyen fer dimal? Sov lavi, oubyen detri lavi?”
10Zezi ti fikse zot tou e i ti dir avek sa zonm, “Dres ou lanmen.”
Sa zonm ti fer li. Deswit, son lanmen ti geri.
11Me bann profeser Lalwa ek bann Farizyen ti tre ankoler. Zot ti diskit ant zot, ki zot pou kapab fer Zezi.
Zezi I Swazir Son Douz Zapot
(Mat 10.1-4; Mrk 3.13-19)
12Dan sa letan, Zezi ti al lo montanny pour priye. I ti priy Bondye tou lannwit. 13Kan lizour ti fer, i ti apel son bann disip e swazir douz parmi zot, ki i ti donn non zapot: 14Simon, ki i ti'n donn non Pyer, Andre son frer, Zak ek Zan, Filip, Bartelemi, 15Matye, Toma, Zak, garson Alfe, Simon, ki zot ti apel Zelot, 16Zid, garson Zak, Zida Iskaryot ki ti vin en tret.
Zezi I Ansenny Lafoul
(Mat 4.23-25; 5.1-12)
17Zezi ti desann avek son bann zapot. Zot ti aret dan en landrwa plat, kot en lafoul son bann disip ti'n rasanble sorti dan Zide, Zerizalenm e lo lakot Tir ek Sidon. 18Sa bann dimoun ti'n vin ekout Zezi e pour li geri tou zot maladi. Dimoun ki bann move lespri ti pe tourmante, ti osi ganny geri. 19Lafoul ti esey tous Zezi, akoz en lafors ti sorti avek li e ti geri zot tou.
20Alor, Zezi ti fikse son regar lo son bann disip. I ti dir:
Byennere bann ki pov,
Rwayonm Bondye i pour zot!
21Byennere bann ki lafen aprezan,
akoz zot pou rasazye.
Byennere bann ki pe plere konmela,
akoz zot pou riye!
22Zot byennere, kan dimoun i ay zot,
e malparl zot;
kan zot ganny rezete, ensilte
e dimoun i dir dimal lo zot
akoz Fis-de-Lonm!
23Rezoui sa zour,
sote avek kontantman,
akoz zot rekonpans pou gran dan lesyel.
Annefe, konmsa ki zot bann zanset
ti tret bann profet.
24Me maler lo zot, bann ris!
Zot in deza ganny zot konsolasyon!
25Maler lo zot ki annan tou annabondans konmela!
Zot pou lafen.
Maler lo zot ki pe riye konmela!
Zot pou dan dey e zot pou plere.
26Maler lo zot,
si tou dimoun i dir dibyen lo zot!
Konmsa ki zot bann zanset
ti tret bann fo profet.
Kontan Ou Lennmi
(Mat 5.38-48; 7.12)
27“Me mwan mon dir avek zot tou ki pe ekout mwan: Kontan zot bann lennmi; fer dibyen bann ki ay zot. 28Beni bann ki modi zot; priy pour bann ki ensilte zot.
29Si en dimoun i tap ou lo en kote lazou, donn li lot kote osi. Si en dimoun i pran ou palto, les li pran osi ou semiz. 30Sa enn ki demann ou keksoz, donn li; pa reklanm sa ki en dimoun in pran avek ou.
31Fer pour lezot tou sa ki ou ti ava kontan lezot i fer pour ou.
32Si ou kontan zis sa bann ki kontan ou, ki rekonpans ou merite? Menm bann malfeter, zot kontan dimoun ki kontan zot.
33Si ou fer dibyen zis sa bann ki fer ou dibyen, ki rekonpans ou merite? Menm bann malfeter i fer parey.
34Si ou pret avek zis bann ki ou krwar pou rann ou, ki rekonpans ou merite? Menm bann malfeter, i pret avek bann ki move parey zot, pour ki zot rann an retour.
35Me ou, kontan ou bann lennmi, fer dibyen, e prete san esper nanryen an retour. Ou rekonpans i ava gran e ou ava vin zanfan Bondye Treo. Annefe, i bon anver bann ki engra e bann ki move. 36Annan konpasyon parey ou Papa i montre konpasyon.”
Pa Bezwen Zize
(Mat 7.1-5)
37“Pa zize e ou pa ava ganny zize. Pa kondann lezot, e ou pa ava ganny kondannen. Pardonnen e ou ava ganny pardonnen. 38Donnen e ou osi, ou ava gannyen. Zot ava vid dan ou sak en bon mezir, byen ranpli, foule e deborde. Menm mezir ki ou servi avek lezot, pou ganny servi avek ou.”
39Zezi ti osi dir zot en parabol, “Eski en aveg i kapab gid en lot aveg? Tou le de pou tonm dan en trou. 40En disip pa pli enportan ki son met, me sak disip ki'n byen aprann, ava vin parey son met.
41Akoz ou war lapay dan lizye ou frer, me ou pa war sa poto ki dan ou prop lizye? 42Koman ou kapab dir avek ou frer: Mon frer! Les mwan tir sa lapay ki dan ou lizye, kan ou menm, ou pa war sa poto ki dan ou prop lizye? Ipokrit! Tir sa poto dan ou lizye avan. Apre, ou ava war ki mannyer ou pou tir sa lapay dan lizye ou frer.”
Bon Fri ek Move Fri
(Mat 7.16-20; 12.33-35)
43“En bon pye fri pa raport fri pouri; en pye fri malad pa kapab donn bon fri. 44Ou rekonnet en pye dibwa par son fri. Ou pa rekolte fig lo zarbis pikan, ni rezen lo rons.
45En zonm ki bon, i tir dibyen dan kof son bon leker. Tandis ki en zonm ki pa bon, i tir dimal dan kof son move leker. Annefe, sa ki labous i dir, i sa ki deborde dan leker.”
Parabol De Lakaz
(Mat 7.24-27)
46“Akoz zot apel mwan: Senyer, Senyer, me zot pa fer sa ki mon dir zot? 47Mon ava montre zot ki sa enn ki vin kot mwan pour ekout mon parol e met li an pratik, i resanble: 48I parey en zonm ki konstri en lakaz. I fouy byen dan fon e poz son fondasyon lo ros. Kan linondasyon i arive, e delo i bat avek lakaz, i pa kapab sekwe li, akoz i'n ganny byen konstri.
49Me sa enn ki antann mon parol e ki pa met li an pratik, i resanble en zonm ki konstri son lakaz san fondasyon. Kan delo i bat avek li, deswit, i degrengole e dega sa lakaz i gran.”
Currently Selected:
Lik 6: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.