Tit 2
2
Vre Lansennyman Kretyen
1Me ou, Tit! Ansenny sa ki konform avek vre doktrin. 2Dir bann vyeyar ki zot devre modere dan tou, respektab, rezonnab e solid dan vre lafwa, lanmour ek lapasyans.
3Dir osi bann fanm aze, ki zot devre konport zot koman dimoun ki pe viv en lavi sen. Zot pa devre kolport zaksyon ki fer ditor, ni vin lesklav lalkol. Zot devre sirtou donn bann bon konsey. 4Ki zot aprann bann zenn fanm ki mannyer pour kontan zot mari ek zot bann zanfan. 5Zot devre osi senp e pir, byen tenir zot, konn byen okip zot lakour, bon e obeisan anver zot mari, pour ki personn pa kritik Parol Bondye.
6Ou devre ankouraz bann zennzan pour vin rezonnab. 7Ou menm, ou devre donn legzanp par bann bon aksyon. Ou devre senser, e serye dan ou lansennyman.
8Swazir ou bann parol, pour ki personn pa kapab kritike. Konmsa, ladverser ava kanmi akoz i pou napa okenn keksoz mal pour dir lo nou.
9Ankouraz bann serviter pour obei zot met; ki zot fer plezir zot met dan tou keksoz e ki zot evit diskisyon. 10Fodre pa ki zot vole. O kontrer, ki zot montre zot touzour bon e fidel. Konmsa, dan tou sa ki zot fer, zot fer loner lansennyman Bondye, nou Sover.
11Annefe, Bondye in revel son lagras pour sov tou dimoun. 12Sa lagras i ansenny nou pour abandonn nou move lavi ek bann move dezir, pour viv en lavi rezonnab, zis e fidel lo sa later anver Bondye. 13Konmsa ki nou devre viv, an atandan sa gran Zour, kan laglwar nou gran Bondye ek nou Sover Zezi-Kri ava aparet. 14Annefe, Zezi-Kri i'n donn son prop lavi pour nou, pour delivre nou dan tou mal e pirifye nou koman en pep ki pour li, en pep zele pour fer sa ki byen.
15Konmsa ki ou devre ansennyen, par servi tou ou lotorite pour ankouraz oubyen repros bann ki ekout ou. Pa les personn mepriz ou.
Labib An Kreol Seselwa © Seychelles Bible Society, 2013.