Romen 5
5
Zistifye, Rekonsilye e Sove
1Ensi, aprezan ki nou'n ganny zistifye par nou lafwa, nou anpe avek Bondye par nou Senyer Zezi-Kri. 2Gras a Zezi, nou kapab, par lafwa, ganny lagras Bondye, dan ki nou annan lavi. Sa ki fer nou fyer, se lespwar pour ganny en par dan mazeste Bondye. 3Anplis ki sa, nou rezoui osi menm dan nou bann soufrans, akoz nou konnen ki lasoufrans i prodwi lapasyans; 4lapasyans i prodwi fidelite malgre leprev, e fidelite i prodwi lesperans. 5Sa lesperans pa tronp nou, akoz lanmour Bondye in ganny deverse dan nou leker par Lespri Sen ki Bondye in donn nou.
6Annefe, kan nou ti ankor san okenn lafors, Kris dan letan fikse, ti mor pour bann peser. 7Apenn si nou pou aksepte mor pour en dimoun ki zis. Petet ki nou ti ava annan kouraz mor pour en bon dimoun. 8Me la koman Bondye in prouve ki i kontan nou: Kris in mor pour nou kan nou ti ankor peser. 9Par son sakrifis, in rann nou zis devan Bondye. A pli fort rezon, i pou sov nou aprezan devan lakoler Bondye. 10Kan nou ti ankor lennmi Bondye, nou ti ganny rekonsilye avek li par lanmor son Garson. A pli fort rezon, aprezan ki nou'n rekonsilye avek li, nou pou ganny sove par lavi son Garson. 11Sa pa tou: Nou fyer dan Bondye akoz nou Senyer Zezi-Kri, ki'n rekonsilye nou avek Bondye.
Adan ek Zezi-Kri
12Pese in antre dan lemonn akoz en sel zonm: Adan. Pese in anmenn lanmor. E akoz nou tou nou'n komet pese, lanmor in tous tou bann et imen#5.12 War Zen 2.17; 3.6,17-19.. 13Pese ti egziste dan lemonn avan ki Bondye ti donn Lalwa avek Moiz. Me akoz pa ti ankor annan lalwa, pese pa ti konte. 14Pourtan, depi Adan ziska Moiz, lanmor ti domin lo tou zonm, menm bann ki pa'n komet menm pese parey Adan ki ti dezobei lord Bondye.
15Me nou pa kapab konpar don gratwi ki Bondye i fer, avek fot Adan. I vre ki bokou dimoun in mor akoz lafot en sel zonm. Me don gratwi ki Bondye in akord lo en gran nonm dimoun par en sel zonm, Zezi-Kri, i pli enportan ankor.
16La ankor, rezilta don Bondye i diferan avek pese en sel zonm: Zizman provoke par lafot en sel zonm, ti anmenn kondannasyon, tandis ki don gratwi akorde apre bokou fot, ti anmenn zistifikasyon total. 17I vre ki akoz pese en sel dimoun, akoz sa sel zonm, lanmor in pran pouvwar. Me, par Zezi-Kri li tousel, nou ganny plis ankor: Tou dimoun ki resevwar lagras Bondye annabondans ek don gratwi son lazistis, pou viv e rennyen gras a Zezi-Kri.
18Ensi, pese en sel zonm: Adan, in antrenn kondannasyon tou dimoun. Demenm, aksyon zis en sel zonm: Zezi-Kri, in liber tou dimoun dan zizman e fer zot viv.
19Annefe, par dezobeisans en sel zonm, en kantite dimoun in tonm dan pese. Demenm, par lobeisans en sel zonm, en kantite dimoun in vin zis devan Bondye.
20Lalwa in vini e pese in ogmante. Me la kot pese in ogmante, lagras Bondye in ogmant plis ankor. 21Ensi, pese in rennyen par son pouvwar lanmor. Demenm, lagras i renny par lazistis pour lavi eternel par Zezi-Kri nou Senyer.
Labib An Kreol Seselwa © Seychelles Bible Society, 2013.