Romen 11
11
Labonte Bondye anver Izrael
1Alor mon demande: Eski Bondye in rezet son pep?
Pa ditou! Mwan menm, mon en Izraelit, en desandan Abrahanm, manm tribi Benzamen. 2Bondye pa'n rezet son pep ki i'n swazir davans. Zot konnen, sa ki Lekritir i dir dan sa pasaz kot Eli i plennyen devan Bondye kont Izrael, 3“Senyer! Zot in touy tou ou bann profet e zot in demoli ou bann lotel. Zis mwan ki reste e zot pe fer mannyer pour touy mwan.”
4Me ki Bondye ti reponn li? “Mon'n rezerv pour mwan 7,000 zonm ki pa'n pliy zenou devan Baal#11.4 1 Rwa 19.10,18..”
5Dan sa letan prezan, i parey: I reste en pti group dimoun ki Bondye dan son bonte, in swazir. 6Si i'n swazir par son bonte, se pa akoz zot bann aksyon. Si Bondye ti swazir dapre sa ki zonm i fer, son bonte pa ti pou en vre bonte.
7E alor? Pep Izrael pa ti ganny sa ki i ti pe rode. Zis sa pti group ki Bondye ti'n swazir ki ti gannyen. Lezot in persiste dan zot landirsisman, 8parey Lekritir i deklare:
Bondye in donn zot en lespri sonmey,
lizye ki pa war kler,
e zorey ki pa tande,
depi sa lepok ziska ozordi#11.8 War Det 29.3; Eza 6.10; 29.10..
9David osi in dir:
Zot festen pou vin en pyez,
en latrap ki pou fer zot tonbe
e resevwar sa ki zot merite.
10Zot lizye pou vin sonm,
zot pa pou war kler,
e zot ledo ava reste kourbe
pour touzour#11.10 Ps 69.23-24..
11Mon demande alor: Eski bann Zwif in fer en fo pa, pour zot tonbe pour touzour?
Non, pa ditou! Me akoz zot fot, bann non-Zwif i'n kapab ganny sove. Sa ti fer bann Zwif zalou. 12Alor, si par lafot bann Zwif, lemonn in anrisi; si par zot abesman, zot in anrisi lezot nasyon, zot partisipasyon total pour zot ganny sove ava anmenn ankor plis dibyen!
Delivrans pour bann Non-Zwif
13Aprezan, mon koz avek zot, bann non-Zwif:
Koman zapot pour bann non-Zwif, mon kontan sa minister. 14Mon swete eksit zalouzi pep mon prop ras, e ensi arive sov detrwa parmi zot. 15Annefe, kan zot ti'n ganny rezete, lemonn ti ganny rekonsilye avek Bondye. Ki pou arive alor, kan zot ava ganny aksepte a nouvo? Sa i ava en vre rezireksyon!
16Si sa premye morso dipen ki ou'n ofer Bondye i sen, alor dipen antye i sen. Si rasin en pye dibwa i sen, son bann brans osi i sen. 17Me si detrwa brans en pye zoliv in ganny koupe e si ou ki en brans zoliv maron, ou'n ganny grefe dan son plas, ou, non-Zwif, ou pou benefisye lasev ki mont depi rasin sa pye zoliv. 18Pour sa rezon, ou pa devre mepriz bann brans koupe. Si ou fer vantar, mazinen ki pa ou ki tenir rasin, me rasin ki tenir ou.
19Ou ava dir mwan: Me sa bann brans ti ganny koupe pour ki mwan mon ganny grefe dan zot plas.
20Sa i zis: Zot in ganny koupe akoz zot in mank lafwa, e ou, ou dan sa plas akoz ou lafwa. Me pa bezwen fer vantar. Fer plito atansyon. 21Akoz si Bondye pa'n eparny bann brans natirel, pa krwar ki i pou eparny ou. 22Remarke konman Bondye i montre son labonte ek son severite: Bondye i sever anver bann ki'n tonbe, me i bon avek ou, a kondisyon ki ou kontinyen kont lo son labonte. Sinon ou osi, ou ava ganny koupe parey en brans. 23Si bann Zwif i kontinyen pa krwar, zot ava ganny regrefe la kot zot ti ete avan. Annefe, Bondye i annan pouvwar gref zot ankor.
24Ou ki en non-Zwif, ou parey en brans zoliv maron ki Bondye in koupe e grefe lo en pye zoliv fran, kontrer avek ou natir.
Ou ki en Zwif, ou en brans natirel en pye zoliv fran. Alor, Bondye ava kapab regref ou lo ou prop pye.
Delivrans Pep Izrael
25Mon bann frer ek ser! Pour zot pa tonm dan lorgey e pran zot pour bann saz, mon oule revel zot en mister: En parti pep Izrael, pou persiste dan son landirsisman, ziska ki tou lezot pep ava'n aksepte Bondye. 26Konmsa ki pep Izrael antye pou ganny sove, parey Lekritir i deklare:
Liberater pou sorti Siyon.
I pou elimin revolt
dan bann desandan Zakob.
27Sanmenm lalyans ki mon pou fer avek zot,
kan mon pou fer disparet zot bann pese#11.27 Eza 59.20-21; 27.9..
28Bann Zwif in vin lennmi Bondye akoz zot ti refiz Bonn Nouvel. Sa in tourn pour zot byen. Me si ou konsider swa ki Bondye in fer, bann Zwif in touzour zanmi Bondye, akoz zot bann zanset. 29Annefe, don lagras ek swa ki Bondye i fer pa zanmen sanze. 30Otrefwa, zot ti dezobei Bondye; me aprezan, zot konn konpasyon Bondye, akoz bann Zwif ti dezobei Bondye. 31I parey pour zot. Aprezan, zot pa'n obei Bondye pour ki Bondye i annan pitye pour zot. Konmsa, bann Zwif osi ava kapab benefisye sa menm konpasyon. 32Annefe, Bondye in fer tou dimoun vin prizonnyen dan dezobeisans, pour ki i montre son konpasyon anver zot tou.
Larises Bondye I Vreman Gran
33Larises Bondye i vreman gran! Son konnesans ek son lasazes i vreman profon! Lekel ki kapab eksplik son bann desizyon? Lekel ki kapab konpran son bann plan? 34Parey Lekritir i deklare:
Lekel ki konn sa ki pas dan lespri Senyer?
Lekel ki kapab vin son konseye#11.34 Eza 40.13. ?
35Lekel ki'n donn li en kado an premye,
pour ki Bondye i rekonpans an retour#11.35 Zob 41.3.?
36Annefe, tou i sorti kot li; tou i egziste par li e pour li. Bondye i merit laglwar pour touzour! Amenn!
Labib An Kreol Seselwa © Seychelles Bible Society, 2013.