Psonm 33
33
Kantik Louanz
Psonm David.
1Zot ki zis!
Sant an loner SENYER.
Zot ki drwat!
I bon pour zot loue li.
2Zwe lanmizik pour loue SENYER!
Loue li lo laarp dis lakord!
3Sant en nouvo kantik an son loner!
Zwe byen zot lenstriman e kriye dan lazwa!
4Parol SENYER i vre;
i akonpli tou avek fidelite.
5SENYER i kontan lazistis ek ladrwatir.
Fidelite SENYER i ranpli later.
6Lesyel ti ganny kree par parol SENYER.
Par souf son labous,
in fer lesyel ek tou bann zetwal.
7In rasanble delo lanmer ansanm dan en sel plas.
In met delo bann losean dan bann rezervwar.
8Later antye i ador SENYER!
Tou zabitan later i rann li omaz.
9Koman in koze, later i egziste.
Koman in donn lord,
later in egziste.
10SENYER i kas plan bann nasyon;
i anpes zot realiz zot bann proze.
11Me bann plan SENYER i dire pour touzour.
Son bann proze i reste pour leternite.
12I byennere sa nasyon
ki annan SENYER koman son Bondye!
I byennere sa pep
ki SENYER in swazi pour son patrimwann!
13Depi lesyel, SENYER i gete:
I war tou dimoun.
14Lo son tronn kot in asiz,
i obzerv tou bann zabitan later.
15Li menm ki'n form zot leker.
Alor, i konn tou sa ki zot fer.
16En lerwa pa ganny sove
akoz i annan en larme pwisan.
En solda pa ganny delivre
par grander son lafors.
17En seval pa kapab donn laviktwar;
son gran lafors pa sov son kavalye.
18Me SENYER i vey lo sa enn ki annan respe pour li;
lo sa enn ki'n met son konfyans dan li,
19pour delivre li dan lanmor
e gard li vivan menm dan letan lafanmin.
20Nou'n met nou lespwar dan SENYER.
Li menm ki nou lafors e nou protekter.
21Nou'n met nou konfyans dan son non sen,
i lazwa ki dan nou leker.
22SENYER! Antour nou dan ou fidelite.
Nou'n met nou lespwar dan ou.
Currently Selected:
Psonm 33: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
