Nonm 28
28
Bann Lofrann Ordiner
1SENYER ti dir Moiz: 2Donn sa bann lord pep Izrael: Dan letan fikse, zot ava ofer mon lofrann mon nouritir, brile par dife, ki donn loder ki fer mwan plezir.
3Ou ava dir zot: La bann lofrann ki zot ava prezant devan SENYER: Tou le zour, de zenn mouton mal, aze enn e an san defo, koman en sakrifis konplet.
4Ou ava ofer en zenn mouton bomaten e en lot zenn mouton, soley kouse.
5Pour lofrann vezetal: En kilo lafarin melanze avek en lit delwil doliv pir. 6Sa i zot lofrann ordiner ki ganny brile parey sa ki ti ganny ofer lo montanny Sinai: En sakrifis konplet ki donn en loder ki fer plezir SENYER.
7Pour lofrann bomaten, ou ava ofer en lit diven ki ou ava vers lo lotel pour sak zenn mouton devan SENYER. 8Ler soley i kouse, ou ava ofer lot zenn mouton avek menm lofrann delwil ek diven, parey bomaten. Sa i ava en lofrann brile par dife ki donn loder ki fer plezir SENYER.
Lofrann pour Saba
9Zour saba, ofer de mouton mal, aze enn an e san defo, avek de kilo lafarin petri ansanm avek delwil e avek son lofrann diven. 10Sa sakrifis konplet devret ganny ofer sak saba, an plis sakrifis ki zot ofer sak zour avek lofrann diven.
Lofrann pour Premye Zour Lemwan
11Lo konmansman sak mwan, zot ava ofer SENYER en sakrifis konplet: De toro, en mouton mal, set mouton enn an, san defo. 12An plis ki sa, pour sak toro, zot ava ofer en lofrann trwa kilo lafarin petri dan trwa lit delwil. Avek sa mouton mal, de kilo lafarin petri avek delwil. 13Avek sak mouton, ofer en kilo lafarin petri avek delwil. Sa i pou en sakrifis konplet ki donn loder ki fer plezir SENYER.
14Lofrann diven ki ganny verse kot lotel ava konmsa: De lit pour en toro; en lit edmi pour en mouton mal; en lit pour sak mouton.
Sa i bann regleman pour bann sakrifis ofer konmansman sak mwan tou dilon lannen. 15An plis ki sa bann sakrifis ordiner e bann lofrann diven, zot ava ofer en bouk pour pardon pese.
Lofrann pour Lafet Dipen san Lelven
16Lafet Pak an loner SENYER devret ganny selebre katorzyenm zour premye mwan. 17Son lannmen, kenzyenm zour sa premye mwan, zot ava fer en lafet. Zot ava manz dipen san lelven pandan set zour. 18Son premye zour, zot ava fer en rasanbleman sakre: Sa zour, zot pa pou fer okenn travay. 19Zot ava ofer SENYER en sakrifis konplet: De toro, en mouton mal ek set zenn mouton mal enn an, san okenn defo. 20Zot ava azout lafarin petri dan delwil, trwa kilo pour en toro, de kilo pour en mouton mal, 21e en kilo pour sak mouton. 22Zot ava ofer avek sa sakrifis en bouk pour pardon pese. Konmsa, rekonsilyasyon dan ou faver i ganny fer.
23Sa i ava en sakrifis an plis ki sakrifis ordiner pour tou le zour. 24Zot ava repet sa sakrifis tou le zour pandan sa set zour, en sakrifis konplet avek lofrann vezetal ki donn loder ki fer plezir SENYER.
25Setyenm zour, ou ava konvok en lasanble spirityel. Zot pa pou fer okenn travay sa zour.
Lofrann pour Lafet Rekolt
26Zour ki ou prezant lofrann premye rekolt sereal devan SENYER, konvok en rasanbleman sakre. Zot pa pou fer okenn travay sa zour.
27Zot ava ofer en sakrifis konplet ki fer plezir devan SENYER: De toro, en mouton mal ek set mouton enn an. 28Pour lofrann vezetal: Petri lafarin dan delwil: Nef kilo pour sak toro, sis kilo pour sak mouton mal, 29trwa kilo pour sak mouton enn an.
30Ofer osi en bouk pour rityel pardon ou pese. 31Anplis, avek sa sakrifis konplet ek sereal tou le zour, ou ava ofer lofrann diven. Tousala devret san defo.
Labib An Kreol Seselwa © Seychelles Bible Society, 2013.