Nonm 26
26
Dezyenm Resansman
1Apre sa lepidemi, SENYER ti dir Moiz ek Eleazar, garson pret Aaron: 2Fer en resansman dapre fanmir parmi pep Izrael, an kontan bann zonm aze depi 20 an, an montan, ki kapab al lager.
3Moiz ek pret Eleazar ti rasanble tou dimoun dan sa group laz obor larivyer Zourden, vizavi Zeriko. Zot ti dir: 4Kont tou dimoun ki annan 20 an, an montan parey SENYER in ordonn Moiz.
La non pep Izrael ki ti sorti Lezip:
5Tribi Riben, premye garson Izrael; klan Henok, Palou.
6Hesronn, klan bann Hesronit; pour Karmi, klan bann Karmit. 7Sa ti bann klan bann Ribenit. Ti annan an tou 43,730 zonm resanse.
8Desandans Palou: Eliab. 9Son bann desandan: Nemouel, Datann ek Abiranm. Sa menm Datann ek Abiranm ki ti'n ganny swazi par kominote; ki ti revolte kont Moiz ek Aaron, ansanm avek troup Kore, kan zot ti revolte, kont SENYER. 10Later ti ouver e anval zot avek Kore, kan dife ti bril 250 parmi zot; zot ti vin en lavertisman pour lepep. 11Me bann zanfan Kore pa ti mor.
12Bann desandan Simeon, klan par klan: Nemouel, dan klan Nemouelit; Yamin, dan klan bann Yaminit; Yakin, dan klan Yakinit; 13Zera, dan klan Zerait; Saoul, dan klan Saoulit. 14Sa i bann klan bann Simeonit; an tou 22,200 zonm.
15Bann zanfan Gad, dapre zot bann klan: Sefonn, dan klan Sefonit; Hagi, dan klan Hagit; Souni, dan klan Sounit; 16Ozni, dan klan Oznit; Eri, dan klan Erit; 17Arod, klan Arodit; Areli, dan klan Arelit. 18Sa i bann klan Gad; an tou, ti annan 40,500 zonm resanse.
19Bann garson Zida: Er ek Onann. Zot ti mor dan pei Kanaan.
20Bann desandan Zida dapre zot bann klan: Sela, dan klan Selanit; Peres, dan klan Parsit; Zera, dan klan Zarit. 21Bann zanfan Peres: Hesronn, dan klan Hesronit; Hamoul sorti dan klan Hamoulit. 22Sa ti bann klan dan Zida. Ti annan an tou 76,500 zonm resanse.
23Bann desandan tribi Isakar, klan par klan: Tola, dan klan Tolait; Pouva, dan klan Pounit; 24Yasoub dan klan Yasoubit; Simronn sorti dan klan Simronit. 25Sa ti bann klan Isakar. Ti annan 64,300 zonm resanse.
26Bann desandan tribi Zabilon dapre zot klan: Sered, dan klan Sardit; Elonn, dan klan Elonit; Yaleel, dan klan Yaleit. 27Sa ti bann klan dan tribi Zabilon. Ti annan an tou 60,500 zonm resanse.
28Desandans tribi Zozef: Ti annan de garson: Manase ek Efraim.
29Bann desandan tribi Manase: Makir, dan klan Makirit; Makir ti papa Galaad; Galaad ti sorti dan klan Galaadit.
30Bann desandan dan tribi Galaad: Yezer, dan klan Yezerit; Helek, dan klan Helekit. 31Asriel dan klan Asrielit; Sikenm, dan klan Sikemit; 32Semida, dan klan Semidait; Hefer, dan klan Hefrit. 33Selofad, garson Hefer ti napa garson, me zis fiy: Mala, Noa, Hogla, Milka, Tirsa. 34Ti annan an tou 52,700 zonm resanse.
35Bann desandan tribi Efraim, klan par klan: Soutela, dan klan Soutelit; Beker, dan klan Bakrit; Tahann, dan klan Tahanit. 36Bann garson Soutela: Erann, dan klan Eranit. 37Sa ti bann klan Efraimit. Ti annan an tou 32,500 zonm resanse. Zot ti bann desandan Zozef, klan par klan.
38Bann desandan Benzamen klan par klan: Bela, sorti dan klan Belait; Asbel, sorti dan klan Asbelit; Ahiranm sorti dan klan bann Ahiramit; 39Soufanm, sorti dan klan Soufamit; Houfanm sorti dan klan Houfamit. 40Bann garson Bela: Ard ek Naaman, sorti dan klan Ardit ek bann Naamanit. 41Zot ti bann desandan Benzamen. Ti annan an tou 45,600 zonm resanse dan sa klan.
42Bann desandan tribi Dann, klan par klan: Souhanm, dan klan Souhanmit. Zot ti bann klan sorti dan tribi Dann kan sa resansman ti ganny fer. 43Ti annan an tou 64,400 zonm resanse dan klan Souhanmit.
44Bann desandan dan tribi Aser, klan par klan: Yimna, dan klan Yimnit; Yisva, dan klan Yisvit; Beria, dan klan bann Berit. 45Bann garson Beria: Heber, dan klan bann Heberit; Malkiel, dan klan bann Malkielit. 46Fiy Aser ti apel Sera. 47Zot ti bann klan bann garson Aser. An tou ti annan 53,400 zonm resanse.
48Bann desandan dan tribi Neftali, klan par klan: Yaseel, dan klan Yaseelit; Gouni, dan klan Gounit; 49Yeser, dan klan Yeserit; Silenm, dan klan Silemit. 50Sa ti bann klan Neftali, klan par klan, dapre resansman. Ti annan an tou 45,400 zonm.
Direktiv pour Partaz Pei
51An tou, ti annan 601,730 Izraelit.
52SENYER ti dir avek Moiz: 53Diviz pei Kanaan par tribi dapre zot popilasyon e zot grander. 54Partaz later dapre grander sak tribi. En gran morso later pour sa ki pli gran, en pli pti morso pour sa ki pli pti. Partaz dapre rezilta resansman. 55Partaz ava ganny fer lo tiraz osor, dapre non sak tribi, zot zanset. 56Later ava ganny divize par tiraz osor. Donn en pli gran morso tribi ki pli gran, en par pli pti pour tribi ki pli pti, dapre rezilta resansman.
Resansman bann Levit
57La tribi Levi par klan dapre resansman: Gersonn, sorti dan klan Gersonit; Keat, dan klan Keatit; Merari, dan klan Merarit.
58La klan bann Levit: Bann Libnit, Hebronit, Malit, Mousit e bann Koreit. Keat ti papa Anmranm.
59Fanm Anmranm ti apel Yokebed. I ti fiy Levi ki ti ne Lezip. I ti ganny de garson ek en fiy: Aaron, Moiz e zot ser Mirianm. 60Aaron ti ganny kat garson: Nadab, Abihou, Eleazar e Itamar. 61Nadab ek Abihou ti mor akoz zot ti prezant en dife ordiner devan SENYER.
62Bann garson ki ti annan en mwan an montan, ti ganny konte apar. Zot pa ti ganny en par dan partaz later. Ti annan 23,000 zot an tou.
63Tou sa bann klan ti ganny resanse par Moiz ek Eleazar dan laplenn Moab, obor larivyer Zourden, vizavi Zeriko.
64Tou dimoun ki ti dan premye resansman ki Moiz ek Aaron ti'n fer dan dezer Sinai, ti'n mor. 65SENYER ti'n dir ki zot tou, zot pou mor dan dezer, eksepte Kaleb garson Zefoune ek Zozye, garson Noun.
Labib An Kreol Seselwa © Seychelles Bible Society, 2013.