Nahoum 2
2
1Pep Niniv!
En larme pe monte pour atake.
Met bann solda lo miray defans.
Vey bann semen.
Rasanble tou ou lafors.
2SENYER pou retabli
laglwar desandan Zakob
ensi ki grander Izrael,
malgre bann bandi ti'n deza fini depouy li.
3Boukliye son bann lennmi i rouz,
son bann gerye in abiye an rouz.
Bann kales i pare pour konba.
Zot briye parey flanbo;
bann seval i azite.
4Lo semen, bann kales i fonse avek vites.
Zot ale vini parey tors,
zot rapid parey zekler.
5Lerwa i apel son bann zofisye.
Zot avanse me avek lezitasyon.
Lennmi i fons dan direksyon miray lavil,
pour met zot defans an plas.
6Bann laport lo larivyer i ganny defonse;
pale rwayal i degrengole.
7Zot tir larenn touni e anmenn li.
Son bann servant i lamante.
Zot plennyen parey bann pizon, e tap zot lestoma.
8Lavil Niniv i parey en rezervwar defonse.
Zot kriye: Arete! Arete!
Me personn pa get deryer.
9Fer piyaz larzan, fer piyaz lor!
Larises i annabondans;
Lobze presye pa manke.
10Tou in ganny vole; tou in kase; tou in ganny kraze!
Bann leker in perdi kouraz, zenou i tranble,
lafors in afebli, bann figir in vin pal!
11Ki'n arive avek Niniv sa landrwa kot bann lyon ti reste?
Ki'n arive avek sa kavern bann zenn lyon,
kot lyon, femel lyon ek piti lyon ti pronmnen,
san ki zot ganny deranze?
12Lyon i desir zannimo an morso
pour son femel ek son bann piti.
I ranpli son kavern avek lavyann son bann viktim ki i'n desire an morso.
13La sa ki SENYER liniver i deklare: Mon kont ou, e mon pou fer ou bann kales lager vin lafimen; ou bann zenn lyon pou ganny masakre. Mon pou aras ou tou sa ki ou ti pran lo later. Zot pa pou antann lavwa ou bann mesaze ankor.
Labib An Kreol Seselwa © Seychelles Bible Society, 2013.