Matye 22
22
Parabol Festen Maryaz
(Lk 14.15-24)
1Zezi ti servi ankor parabol pour koz avek zot. 2I ti dir zot, “Rwayonm lesyel i resanble en lerwa ki ti prepar en festen maryaz pour son garson. 3I ti anvoy son bann serviter pour al apel son bann envite pour lafet; me zot pa ti oule vini.
4I ti anvoy ankor lezot serviter pour al dir bann envite: Mon'n fini prepar repa. Mon'n touy bann bef ek mon bann zannimo byen gra; tou keksoz in pare; vini pour festen maryaz!
5Me bann envite pa ti pran okenn ka. Enn ti al lo son laferm, en lot ti al fer son komers. 6Lezot ti atrap sa bann serviter, bat zot e touy zot.
7Alor, lerwa ti ankoler. I ti anvoy son larme touy sa bann kriminel e met dife dan zot lavil. 8Apre, i ti apel son bann serviter. I ti dir zot: Mon festen maryaz in pare, me sa bann dimoun pa ti merit ganny envite. 9Alor, al dan tou krwaze semen e envit tou dimoun ki zot war.
10Bann serviter ti al dan semen e envit tou dimoun ki zot ti war, sa ki move koman sa ki bon. Alor, lasal ti ranpli.
11Kan lerwa ti antre pour war son bann envite, i ti remarke ki en zonm pa ti'n met lenz maryaz. 12Lerwa ti dir li: Zanmi! Koman ou'n kapab antre isi san met en lenz lafet? Me sa zonm ti reste labous fermen. 13Alor, lerwa ti dir avek bann serviter: Anmar son lipye ek son lanmen e zet li deor dan fernwanr, la kot zot pou plere e grens ledan.”
14Zezi ti azoute, “Annefe, bokou in ganny envite, me zis en pti gin ki ganny swazir.”
Kestyon Pey Taks
(Mrk 12.13-17; Lk 20.20-26)
15Alor, bann Farizyen ti al fer konplo pour met Zezi dan pyez par en kestyon. 16Zot ti anvoy serten zot bann disip ek serten manm dan parti Herod kot Zezi pou dir li, “Met! Nou konnen ki ou fran e ki ou ansenny semen Bondye dan tou laverite, san les personn enfliyans ou, akoz ou pa fer lapreferans pour personn. 17Dir nou, ki ou krwar: Dapre nou Lalwa, eski nou devre pey taks Sezar, wi ou non?”
18Me Zezi ki ti konn zot riz, ti dir zot, “Bann ipokrit! Akoz zot pe esey met mwan dan en pyez? 19Montre mwan larzan ki zot pey taks avek!”
Zot ti donn li en pyes larzan. 20Zezi ti demann zot, “Figir ek non lekel ki lo la?”
21Zot ti reponn, “Sezar.”
Zezi ti dir zot, “Alor, rann Sezar sa ki pour Sezar e rann Bondye sa ki pour Bondye.”
22Kan zot ti antann sa, zot ti etonnen. Alor, zot ti kit Zezi e zot ti ale.
Lo Size Rezireksyon
(Mrk 12.18-27; Lk 20.27-40)
23Sa menm zour, bann Sadiseen, ki pa krwar dan rezireksyon, ti vin poz Zezi sa kestyon, 24“Met! Moiz in dir: Si en zonm i mor san zanfan, son frer i bezwen marye avek son fanm pour gard desandans son frer ki'n mor#22.24 War Det 25.5-6..
25Ti annan set frer. Premye ti marye e i ti mor san zanfan e les son fanm pour son frer. 26Demenm dezyenm, apre trwazyenm, ziska ki setyenm ti'n marye avek sa fanm.
27Finalman, apre zot tou, sa fanm osi ti mor. 28Zour rezireksyon, i pou vin fanm lekel? Annefe, tou le set frer ti'n marye avek li.”
29Zezi ti reponn zot, “Zot dan lerer, akoz zot pa konn ni Lekritir, ni pwisans Bondye. 30Zour rezireksyon pou napa kestyon maryaz; pou napa mari ek fanm. Zot pou viv parey bann lanz dan lesyel. 31Lo size rezireksyon, pa zot i'n lir sa ki Bondye in dir zot: 32Mwan menm Bondye Abrahanm, Bondye Izaak e Bondye Zakob.
Bondye pa Bondye bann mor, me Bondye bann vivan#22.32 Egz 3.6..”
33Lafoul ti dan gran letonnman kan zot ti antann lansennyman Zezi.
Pli Gran Komannman
(Mrk 12.28-34; Lk 10.25-28)
34Kan bann Farizyen ti aprann ki Zezi ti'n ferm labous bann Sadiseen, zot ti rasanble. 35Enn parmi zot, en spesyalis Lalwa, ti poz Zezi sa kestyon pour esey met li dan en pyez. 36I ti demann li, “Met! Lekel pli gran komannman dan Lalwa?”
37Zezi ti reponn li, “Kontan Senyer ou Bondye avek tou ou leker, avek tou ou et antye, e avek tou ou lespri#22.37 Det 6.5.. 38Sa i premye e pli gran komannman. 39Dezyenm komannman i parey: Kontan ou prosen parey ou kontan ou prop lekor#22.39 Lev 19.18. 40Lalwa antye ek lansennyman bann profet i depann lo sa de komannman.”
Lo Size Kris
(Mrk 12.35-37; Lk 20.41-44)
41Ler bann Farizyen ti'n rasanble, Zezi ti poz zot sa kestyon, 42“Ki zot mazinen lo Mesi? I garson lekel?”
Zot ti reponn li, “Garson David.”
43Zezi ti demann zot, “Alor, akoz David, enspire par Lespri, ti apel li Senyer? Annefe, David ti dir:
44Senyer ti dir avek mon Senyer:
Asiz lo mon kote drwat,
ziska ki mon met ou bann lennmi anba ou lipye#22.44 Ps 110.1..
45Si David ti apel li Senyer, ki mannyer alor, i kapab son garson?”
46Personn pa ti kapab reponn li en sel mo. Depi sa zour, personn pa ti oze poz li ankor kestyon.
Labib An Kreol Seselwa © Seychelles Bible Society, 2013.