Matye 2
2
Bann Savan I Rann Vizit Zezi
1Zezi ti ne Betlehenm dan Zide, dan lepok ki Herod ti lerwa. Apre son nesans, bann savan sorti dan Les ti ariv Zerizalenm. 2Zot ti demande, “Oli sa lerwa bann Zwif ki fek ne? Nou'n war son zetwal dan Les, e nou'n vin ador li.”
3Lerwa Herod ek tou dimoun dan Zerizalenm ti trakase kan zot ti antann sa. 4I ti apel tou bann gran-pret ek bann profeser Lalwa. I ti demann zot, “Kote Mesi ti devre ne?”
5Zot ti reponn, “Betlehenm dan Zide. La sa ki profet in ekri:
6Ou Betlehenm, dan later Zida!
Ou sertennman pa mwen enportan
parmi bann lavil dan Zida.
Annefe, kot ou, pou sorti en sef
ki pou vin berze Izrael, mon pep#2.6 Mis 5.1..”
7Alor, an sekre, Herod ti apel sa bann saz. I ti demann zot lepok egzakt ki sa zetwal ti aparet. 8Apre, i ti anvoy zot Betlehenm. I ti dir zot, “Al rod byen lenformasyon lo sa zanfan. Kan zot ava'n war li, vin fer mwan konnen, pour ki mwan osi, mon ava al ador li.”
9Apre ki lerwa ti'n fini koz avek zot, zot ti ale. Alor, zot ti war sa menm zetwal ki zot ti'n remarke dan Les, pe avanse devan zot. 10Kan zot ti revwar sa zetwal, zot ti dan en gran kontantman. 11Zot ti antre dan lakaz; zot ti war sa zanfan avek son manman, Mari. Zot ti tonm azenou e ador li. Answit, zot ti ouver zot kof e ofer li bann kado: Lor, lansan ek lamir. 12Apre, zot ti retourn se zot par en lot semen, akoz Bondye ti'n averti zot dan en rev pour pa retourn kot Herod.
Depar pour Lezip
13Apre ki bann savan ti'n ale, en lanz Senyer ti aparet avek Zozef dan en rev. I ti dir li, “Leve! Pran sa zanfan ek son manman e sov Lezip. Reste laba, ziska ki mon donn ou lord retournen, akoz Herod pou rod sa zanfan pour fer touy li.”
14Zozef ti leve. I ti pran sa zanfan ek son manman e pandan lannwit, i ti sov Lezip. 15I ti reste laba ziska lanmor Herod. Sa ti arive pour ki sa ki Senyer ti'n dir par lentermedyer son profet, i ganny realize:
Mon'n apel mon garson pour sorti Lezip#2.15 Oz 11.1..
Herod I Fer Touy bann Zanfan
16Kan Herod ti realize ki sa bann savan ti'n zwe en trik avek li, i ti tre ankoler. I ti fer touy tou bann garson 2 an e mwens, dan Betlehenm e dan zalantour, dapre lepok ki sa bann savan ti'n dir li. 17Sa ti arive pour ki parol profet Zeremi i ganny akonpli:
18Dan Rama mon antann en lavwa
pe plere e pe lamante.
Rasel pe pler son bann zanfan;
i refiz tou konsolasyon,
akoz zot in mor#2.18 Zer 31.15..
Retour Sorti Lezip
19Apre lanmor Herod, en lanz ti aparet avek Zozef Lezip, dan en rev. 20I ti dir li, “Leve! Pran sa zanfan ek son manman e retourn dan pei Izrael, akoz sa bann ki ti pe esey touy li in mor.”
21Alor, Zozef ti leve. I ti pran sa zanfan ek son manman, e retourn dan pei Izrael.
22Me kan Zozef ti tande ki Arkelais ti'n vin lerwa Zide dan plas son papa Herod, i ti per pour al laba. Apre ki i ti'n ganny averti dan en rev, i ti al dan rezyon Galile. 23I ti al etabli li dan en lavil ki ti apel Nazaret. Alor, parol bann profet ti ganny realize: I pou ganny apele Nazareen#2.23 Sa non Nazareen pou ganny servi koman en tit avek non Zezi. .
Currently Selected:
Matye 2: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.